რა მოხდა?
Rivian Automotive-ის აქციების ფასი ყველა დროის მინიმალურ ნიშნულთან კვლავ ახლოს არის. გუშინ დილით ხანმოკლე ზრდის შემდეგ ეს მაჩვენებელი ისევ დაეცა და ამჟამად $16.45-ს შეადგენს. Rivian-ის აქციების ფასმა თითქმის კვლავ მიაღწია ყველა დროის დღიურ მინიმუმს — $15,84-ს, რომელიც მან გასულ კვირას დააფიქსირა.
და რა?
შესაძლოა, Rivian-ის აქციების მიმართ ინვესტორები უარყოფითად ორმა ფაქტმა განაწყო. პირველი ის არის, რომ კომპანიის ელექტრო პიკაპის მთავარი ახალი კონკურენტი ახლახან გამოვლინდა პოპულარულ Consumer Electronics Show-ზე (CES) ლას-ვეგასში. გლობალური ავტომწარმოებლის Stellantis-ის ახალი ელექტრო Ram სატვირთო მანქანა უახლოეს თვეებში გამოვა. ის პირდაპირ კონკურენციას გაუწევს Rivian-ის R1T-ს და სხვა მაღალი დონის ელექტრო პიკაპ მანქანებს.
მეორე მიზეზი შეიძლება იყოს Barron’s-ის მიერ გუშინ გამოქვეყნებული სტატია, რომელშიც Rivian 2022 წელს სუსტი წარმადობის მქონე აქციების სიაში მოხვდა. სტატიაში ნახსენებია 2006 წელს ჩატარებული კვლევა, რომელიც აჩვენებს, რომ საბაზრო კაპიტალიზაციის მიხედვით საუკეთესო 1,000 აშშ-ში დაფუძნებული კომპანია, რომელიც წლის განმავლობაში ყველაზე ცუდი შედეგებით ხასიათდებოდა, მომდევნო 12 თვის განმავლობაში ფართო ბაზრის წარმადობას საშუალოდ 4%-ით ჩამორჩებოდა. Rivian კი 2022 წელს Russell 1000 ინდექსში 15 ყველაზე ცუდი შედეგის მქონე აქციიდან ერთ-ერთია.
ახლა რა?
რა თქმა უნდა, არ არსებობს გარანტია, რომ ისტორია განმეორდება, თუმცა მნიშვნელოვანია მიზეზები, რის გამოც კომპანიამ ასეთი შედეგები მიიღო.
Rivian-ს წარმოებისა და საჯარო კომპანიის სტატუსით მოღვაწეობის პირველი სრული წლის განმავლობაში მრავალი წინააღმდეგობა შეხვდა. კომპანია ახალ გამოწვევებს, მათ შორის ზემოხსენებულ მზარდ კონკურენციას, უახლოეს თვეებსა და წლებში წააწყდება. გრძელვადიან პერსპექტივაში, აქციების ფასის ცვლილება Rivian-ის ბიზნეს საფუძვლებზე იქნება დამოკიდებული.
