რა მოხდა?
მიუხედავად იმისა, რომ Microsoft, ვიდეო თამაშების საუკეთესო მწარმოებლისა და დეველოპერის — Activision Blizzard-ის შეძენის მცდელობაში, დიდი წინაღობის წინაშე დგას, გუშინ მისი აქციების ფასი 3%-ზე მეტით გაიზარდა. შედარებისთვის, დროის იმავე მონაკვეთში, S&P 500-მა თითქმის 2%-ით მოიმატა. ინვესტორები Activision-ის შეძენასთან დაკავშირებით კომპანიის წარმომადგენლების კომენტარებმა და მათმა მიზანდასახულობამ გაახარა.
და რა?
როგორც Microsoft-ის, ასევე Activision Blizzard-ის ოფიციალურმა პირებმა გარიგების დასრულების შესახებ მათ მტკიცე გადაწყვეტილებას გაუსვეს ხაზი.
Bloomberg-ის მიერ ხუთშაბათს დილით გამოქვეყნებული სტატიის თანახმად, კომპანიის შეხვედრაზე, Microsoft-ის თამაშების მიმართულების ხელმძღვანელმა — ფილ სპენსერმა კიდევ ერთხელ დაადასტურა ტექნოლოგიური გიგანტის განზრახვა, წარმატებით დაასრულოს შესყიდვის გარიგება. კომპანიაში მიიჩნევენ, რომ ამ კვირის დასაწყისში გაერთიანებული სამეფოს კონკურენციისა და ბაზრის ორგანოს (CMA) გადაწყვეტილება, რომელიც ფაქტობრივად აბათილებს შესყიდვის შეთანხმებას, საბოლო ჯამში მხოლოდ შეანელებს გარიგების დამტკიცების პროცესს (CMA-მ გადაწყვიტა, რომ Microsoft-ის მიერ Activision-ის $68.7 მილიარდად შესყიდვა ქლაუდ გეიმიგ ბაზარს ზიანს აყენებს).
ამასთან, Bloomberg-ის სატელევიზიო ინტერვიუში, Activision-ის აღმასრულებელმა დირექტორმა — ბობი კოტიკმა გააკეთა ოპტიმისტური პროგნოზი, რომ გარიგება წარმატებულად დასრულდება. იგი CMA-ს გადაწყვეტილებას „ირაციონალურს“ უწოდებს და ირწმუნება, რომ მისი კომპანია და Microsoft ბრიტანეთის მარეგულირებლისადმი მიმართვის შემდეგ ამ დავაში გაიმარჯვებენ.
ახლა რა?
კომპანიების წარმომადგენლების ასეთი თავდაჯერება შთამაგონებელია, მაგრამ CMA-ს გადაწყვეტილება ადვილად გადასალახი წინაღობა არ იქნება. მარეგულირებელს დიდი ძალაუფლება აქვს მშობლიურ ქვეყანაში და მისი გადაწყვეტილებები საზღვარგარეთაც გავლენიანია. ამასთან, CMA-მ თავისი გადაწყვეტილების ძალიან კონკრეტული მიზეზები დაასახელა და შეიძლება არ სურდეს დიდ კომპრომისზე წასვლა (თუ საერთოდ გადადგა ნაბიჯი ამ მიმართულებით).
