რა მოხდა?
ორი კოლეგის მიერ წარმოდგენილი ძლიერი კვარტალური ანგარიშების შემდეგ, გუშინ Medtronic-ის აქციების ფასი დაახლოებით 4%-ით გაიზარდა. შედარებისთვის, სამშაბათს, სავაჭრო დღის განმავლობაში, S&P 500 უცვლელი იყო.
და რა?
კონკრეტულად Medtronic-თან დაკავშირებით რაიმე სიახლე არ გავრცელებულა. კომპანიის აქციებზე იმოქმედა Intuitive Surgical-ისა და Abbott Laboratories-ის კვარტალურმა ანგარიშებმა, რომლებიც მათ, შესაბამისად, ორშაბათს და სამშაბათს წარადგინეს.
Intuitive-ის შედეგები განსაკუთრებით გამამხნევებელი იყო. მისი da Vinci-ის სისტემით ჩატარებული პროცედურების რაოდენობა წლიდან წლამდე 26%-ით გაიზარდა. ამავდროულად, კომპანიამ შემოსავლის ორნიშნა ზრდა დააფიქსირა, ხოლო მოგება მნიშვნელოვნად გაუმჯობესა. Intuitive Surgical-ის კვარტალური შემოსავალი წლიდან წლამდე 14%-ით — $1.7 მილიარდამდე გაიზარდა (ანალიტიკოსების პროგნოზი — $1.6 მილიარდი). კომპანიამ პირველი კვარტალში $355 მილიონის ოდენობით მოგება გამოიმუშავა, ანუ განზავებულმა EPS-მა $1 შეადგინა (GAAP-ის (ბუღალტრული აღრიცხვის საყოველთაოდ აღიარებული პრინციპები) საფუძველზე). ეს მაჩვენებელი გასული წლის იმავე მეოთხედის შედეგთან ($366 მილიონი) შედარებით შემცირდა.
Intuitive-ის კორექტირებულმა მოგებამ პირველ კვარტალში $437 მილიონს მიაღწია, ანუ კორექტირებულმა EPS-მა $1.23 შეადგინა. 2022 წლის იმავე კვარტალთან შედარებით ეს მაჩვენებლები გაუმჯობესდა. ისინი, შესაბამისად, $413 მილიონს და $1.13-ს შეადგენდა. შედეგმა ასევე გადააჭარბა ანალიტიკოსების პროგნოზს — $1.20-ს.
Intuitive-ის მსგავსად, Abbott-ის მაჩვენებლებმაც გადააჭარბა ანალიტიკოსების მოლოდინებს. კომპანიის კვარტალურმა შემოსავალმა $9.75 მილიარდი შეადგინა (ანალიტიკოსების პროგნოზი — $9.66 მილიარდი), ხოლო EPS-მა — $1.03 (პროგნოზი — $0.99). ერთი შეხედვით, Abbott-ის შემოსავლის 20%-იანი კლება საგანგაშო იყო, თუმცა ეს ძირითადად გამოწვეული იყო COVID ტესტირების პროდუქტების გაყიდვების სრულიად მოსალოდნელი კლებით. მიუხედავად იმისა, რომ დაავადება არ გამქრალა, დაინფიცირების შემთხვევებისა და კორონავირუსით გარდაცვლილთა რაოდენობა კვლავ იკლებს, ბევრი ექსპერტი კი თვლის, რომ ის პანდემიურიდან ენდემურ სტადიაზე გადადის.
ახლა რა?
Medtronic იმავე სფეროებში მოღვაწეობს და ამიტომ ბიზნეს გარემო, რომელიც Intuitive-ისა და Abbott-ისთვის პოზიტიურია, როგორც წესი, მისთვისაც მომგებიანია. Medtronic-მა ფისკალური 2023 წლის მესამე კვარტლის შედეგები თებერვალში გამოაქვეყნა და როგორც შემოსავალმა, ასევე მოგებამ, ანალიტიკოსების მოლოდინებს გადააჭარბა. უფრო გამამხნევებელი კი ის არის, რომ მენეჯმენტმა მიმდინარე ფისკალური წლისთვის მოგების პროგნოზი გაზარდა.
