რა მოხდა?
S&P Global Market Intelligence-ის მიერ მოწოდებული მონაცემების მიხედვით, გასული კვირის განმავლობაში KB Home-ის აქციების ფასი 14%-ზე მეტით გაიზარდა. წლის დასაწყისიდან ეს მაჩვენებელი 24%-ზე მეტით არის მომატებული. წინა კვირის ზრდა საცხოვრებელი სახლების მაშენებელი კომპანიის წამახალისებელმა სიახლეებმა გამოიწვია.
და რა?
KB Home-მა კვარტალური ანგარიში გასულ კვირაში, ოთხშაბათს, წარადგინა. წლიდან წლამდე კომპანიის გაყიდვები 3%-ით — $1.38 მილიარდამდე შემცირდა (ანალიტიკოსების პროგნოზი — $1.31 მილიარდი), რადგან ინდუსტრიამ, საპროცენტო განაკვეთების ზრდის გამო, ზეწოლა იგრძნო. მიუხედავად ამისა, გაყიდვების საშუალო ფასების ზრდამ ეს შემცირება გარკვეულწილად აანაზღაურა.
გარდა ამისა, KB Home-ის EPS-მა (მოგება თითო აქციაზე) $1.45 შეადგინა და მნიშვნელოვნად გადააჭარბა ანალიტიკოსების პროგნოზს — $1.15-ს. „ჩვენ პირველ კვარტალში მყარი ფინანსური შედეგები მივიღეთ“ — განაცხადა აღმასრულებელმა დირექტორმა — ჯეფრი მეზგერმა პრესრელიზში.
ახლა რა?
კომპანიის წარმომადგენლებმა განაცხადეს, რომ პირველი კვარტლის დასასრულისკენ გაყიდვების ტენდენციები გაუმჯობესდა, ამასთან, შეკვეთების მოცულობა ძლიერი იყო მარტის პირველ კვირებში. „ჩვენ ეს პროგრესი მხნეობას გვმატებს“ — აცხადებენ აღმასრულებლები.
აშშ-ის ბაზარზე მთავარ გამოწვევებად საპროცენტო განაკვეთების ზრდა და პოტენციური რეცესია რჩება. რამდენიმე წლიანი ძლიერი ზრდის შემდეგ, ამ სცენარით, საბინაო ბაზარი მომავალში, სავარაუდოდ, შემცირებას განიცდის.
თუმცა KB Home-ის განახლებული პროგნოზები 2023 წლისთვის გულისხმობს სტაბილურ გაყიდვებსა და ფასებს. მთლიანი მოგების მარჟა, სავარაუდოდ, 20%-ზე მაღალი იქნება, რაც წელს ძლიერი მოგების დაფიქსირებას შეუწყობს ხელს.
