წელს ტექნოლოგიური აქციების ფასები შემცირდა, რადგან ინფლაცია გაიზარდა. მაგალითად, თამაშების განვითარების პლატფორმის გამომგონებლის – Unity Software-ის აქციების ფასი 80%-ით შემცირდა. მიუხედავად ამისა, 2022 წლის პირველი ნახევრის უმეტესი ნაწილის განმავლობაში, IBM-ის აქციები უკეთესად მოქმედებდა, ვიდრე ბევრი მისი კონკურენტი და ივნისში 52-კვირიან მაქსიმუმს – $144.73-ს მიაღწია.
IBM ბაზრის ვარდნას წლის პირველი ნახევრის განმავლობაში დაუპირისპირდა მზარდი შემოსავლისა და მაღალი დივიდენდური სარგებლის წყალობით, რომელიც ამჟამად დაახლოებით 5%-ს შეადგენს. მაგრამ ეს ტალღა შეიცვალა მას შემდეგ, რაც IBM-მა მეორე კვარტლის შედეგები წარადგინა.
კვარტალური ანგარიშის წარდგენის შემდეგ კომპანიის აქციების ფასი $140-დან $130-მდე შემცირდა, რადგან IBM-მა 2022 წლისთვის თავისუფალი ფულადი ნაკადების (FCF) მითითებები შეამცირა. კომპანიის მიერ FCF-ის გამომუშავება ძალიან მნიშვნელოვანია ფინანსური სიძლიერისთვის, მათ შორის დივიდენდების გადასახდელად.
თუმცა, დივიდენდების შესახებ ნებისმიერი ღელვა არ ნიშნავს, რომ 2022 წლის IBM პანდემიამდელი ვერსიისგან განსხვავდება. კომპანია ახლა ინვესტორებს სთავაზობს ბევრად მეტს, ვიდრე უბრალოდ მიმზიდველი დივიდენდებია.
რა დაემართა IBM-ის თავისუფალ ფულად ნაკადებს?
მოდით, ჯერ FCF-ის მითითებების ვარდნა გამოვიკვლიოთ. ამ მაჩვენებლის შემცირებამ, შესაძლოა, უარყოფითად იმოქმედოს IBM-ის უნარზე – გაზარდოს დივიდენდები (რასაც კომპანია ზედიზედ 27 წლის განმავლობაში აკეთებს), ან უარესი, აიძულოს კომპანია შეამციროს დივიდენდური ანაზღაურება, რისი გაკეთებაც პანდემიის დარტყმის შემდეგ ბევრ კომპანიას მოუწია.
თუმცა, IBM-ის თავისუფალი ფულადი ნაკადების გამოწვევა არის მრავალი მაკროეკონომიკური ფაქტორის შედეგი, რომელიც დროთა განმავლობაში ჩაცხრება. მაგალითად, ძლიერი აშშ დოლარი ზიანს აყენებს IBM-ს, რადგან მისი მეორე კვარტლის შემოსავლის დაახლოებით ნახევარი საერთაშორისო ბაზრებზე მოდიოდა.
უკრაინაში რუსეთის თავდასხმის შემდეგ, IBM-მა რუსული ოპერაციები დახურა. მიუხედავად იმისა, რომ ამ ქვეყნის გაყიდვები 2021 წლის შემოსავლის 1%-ზე ნაკლებს შეადგენდა, ბიზნესს მაღალი მარჟა ჰქონდა, რაც მოგებას და FCF-ს ამცირებს.
მაკროეკონომიკური ფაქტორების ამ ერთობლიობამ განაპირობა კომპანიის მიერ FCF პროგნოზის $10.5 მილიარდიდან $10 მილიარდამდე შემცირება. მიუხედავად ამისა, მენეჯმენტმა გამოთქვა რწმენა, რომ 2022-დან 2024 წლამდე FCF $35 მილიარდს შეადგენს. ასე რომ, გრძელვადიან პერსპექტივაში, IBM მზად არის დივიდენდების გადახდის ვალდებულებები შეასრულოს.
განახლებული ბიზნესი
აღმასრულებელი დირექტორის – არვინდ კრიშნას დროს, რომელმაც ეს თანამდებობა 2020 წელს დაიკავა, IBM-ის აქცენტი ჰიბრიდულ ქლაუდ გამოთვლებზე გადავიდა, რომელიც საჯარო და კერძო ქლაუდ გარემოს აერთიანებს.
ეს არის პოპულარული IT (ინფორმაციული ტექნოლოგიები) ინფრასტრუქტურის მოდელი ისეთ ინდუსტრიებს შორის, როგორიც არის ფინანსები, სადაც მგრძნობიარე მონაცემები მოითხოვს კერძო ქლაუდის არსებობას, ხოლო იაფი საჯარო ქლაუდ კომპონენტები სხვა ბიზნეს საჭიროებებისთვის გამოიყენება. IBM-ის საყრდენი წარმატებული აღმოჩნდა, ბოლო 12 თვის განმავლობაში ჰიბრიდული ქლაუდ შემოსავალი 16%-ით – $21.7 მილიარდამდე გაიზარდა.
IBM-ის ქლაუდ შეთავაზებებს ავსებს მისი ინფრასტრუქტურული ბიზნესი, რომელიც კერძო ქლაუდ გარემოსთვის საჭირო აპარატურას ყიდის. მეორე კვარტალში კომპანიამ გამოუშვა უახლესი კომპიუტერული სისტემა IBM z16. კომპანიისთვის ეს მოდელი პირველია, რომელიც მოიცავს სპეციალურად შექმნილ ხელოვნური ინტელექტის (AI) ჩიპს. წინა წელთან შედარებით IBM z Systems-ის შემოსავალი 69%-ით გაიზარდა.
მეორე კვარტალში საკონსულტაციო განყოფილების შემოსავლები 10%-ით გაიზარდა. IBM მოელის, რომ წელს ამ მიმართულებით გაყიდვები ორნიშნა პროცენტულ ზრდას განაგრძობს.
IBM-ის უწყვეტი წარმატების მიზეზები
კომპანია პროგნოზირებს, რომ შემოსავლების ზრდა გაგრძელდება. მესამე კვარტლის გაყიდვების პროგნოზი გაიზარდა. მენეჯმენტს სურს წელს მიაღწიოს მიზანს – შემოსავლის $3 მილიარდით ზრდას. გასულ წელთან შედარებით, კომპანიის 2022 წლის შემოსავალი უკვე $2 მილიარდზე მეტით არის გაზრდილი.
უფრო მეტიც, IBM-ის ბიზნესს ინდუსტრიის ხელშემწყობი ფაქტორებიც ეხმარება. მოსალოდნელია, რომ ჰიბრიდული ქლაუდ გამოთვლების ბაზარი $56 მილიარდიდან (2020 წელი) $145 მილიარდამდე (2026 წელი) გაიზრდება.
კომპანიის მომავალი ნათელია, რადგან ის ტექნოლოგიების განვითარებას აგრძელებს. როგორც მისი ქლაუდ შეთავაზების ნაწილი, კომპანია ახლა უზრუნველყოფს წვდომას კვანტურ კომპიუტერზე, რომელსაც მონაცემთა ისეთი რთული ნაკრების დამუშავება შეუძლია, როგორსაც დღევანდელი სუპერკომპიუტერებიც კი ვერ უმკლავდება. ბანკებმა და მთავრობებმა ამ შესაძლებლობების გამოყენება უკვე დაიწყო.
ასევე, IBM-ის დიდი გამოცდილება AI ტექნოლოგიების მიმართულებით, ამ სივრცეში კომპანიის ლიდერობას განაპირობებს.
ეს წარმატება აჩვენებს, რომ კომპანიის ტრანსფორმაცია შედეგიანია. IBM მხოლოდ დივიდენდური აქცია არ არის. ის კარგად არის ბაზარზე პოზიციონირებული შემოსავლის ზრდისთვის, რაც IBM-ს სრულყოფილ ინვესტიციად აქცევს.
