რა მოხდა?
მიუხედავად იმისა, რომ ენების შემსწავლელ პოპულარულ კომპანიასთან დაკავშირებით სიახლეები არ გავრცელებულა, გუშინ Duolingo-ს აქციების ფასი 10%-ზე მეტით შემცირდა.
Duolingo-ზე იმოქმედა კიდევ ერთი საგანმანათლებლო კომპანიის — Chegg-ის კვარტალურმა ანგარიშმა. ამ უკანასკნელის მენეჯმენტმა განაცხადა, რომ ახალი მომხმარებლების ზრდა ChatGPT-სთან კონკურენციის გამო შეჩერდა. Chegg-ის აქციების ფასი 48%-ზე მეტით შემცირდა.
და რა?
Chegg არის საგანმანათლებლო კომპანია, რომელიც სახელმძღვანელოების გაქირავებითა და საშინაო დავალების შესრულებაში დახმარების გაწევით არის ცნობილი. მისი აქციების ფასმა ვარდნა მას შემდეგ განიცადა, რაც მენეჯმენტმა განაცხადა, რომ ChatGPT-ის მიმართ სტუდენტების ინტერესის მნიშვნელოვანი ზრდა დაინახა, რაც, კომპანიის წარმომადგენლების აზრით, ახალი მომხმარებლების შეძენაზე ნეგატიურად ზემოქმედებს.
Duolingo-სთვის ეს სიახლე მნიშვნელოვანია, განსაკუთრებით იმის გამო, რომ თარგმნა და ენის შესწავლის ხელსაწყოებიც ChatGPT-ის შესაძლებლობებს შორისაა.
შესაძლოა მარტში სწორედ ChatGPT-ის კონკურენციის მოლოდინში დაანონსა კომპანიამ ახალი სააბონენტო სერვისი — Duolingo Max, რომელიც უახლესი გენერაციული AI ტექნოლოგიით — GPT-4-ით არის აღჭურვილი.
Duolingo Max ამატებს ორ ახალ ფუნქციას — “Explain My Answer” და “Roleplay”. პირველი მათგანი მომხმარებელს სთავაზობს ჩათს იმის გასაგებად, თუ რატომ იყო მისი პასუხი არასწორი, ხოლო “Roleplay” ჩათში რეალურ სამყაროში არსებული სცენარით საუბარში ვარჯიშის შესაძლებლობას იძლევა.
ახლა რა?
Duolingo პირველი კვარტლის ანგარიშს მომავალ კვირაში — 9 მაისს წარადგენს და შედეგებმა უნდა მიაწოდოს საჭირო ინფორმაცია ინვესტორებს იმის შესახებ, თუ როგორ მუშაობს ენის შემსწავლელი სპეციალისტი ChatGPT-სთან ერთად და რამდენად წარმატებულია Duolingo Max.
