რა მოხდა?
გადახდების გიგანტის – PayPal-ის აქციების ფასი გუშინ, სავაჭრო დღის განმავლობაში თითქმის 1%-ით გაიზარდა მას შემდეგ, რაც უოლ სტრიტის ანალიტიკოსმა თქვა, რომ, მისი აზრით, კომპანიის აქციები გადაჭარბებულად გაიყიდა.
და რა?
მზარდი საპროცენტო განაკვეთების გარემომ და ბნელმა ეკონომიკურმა პერსპექტივამ წელს ტექნოლოგიური აქციები ძალიან დააზარალა. წლის დასაწყისიდან PayPal-ის აქციების ფასი 56%-ზე მეტით შემცირდა.
ცოტა ხნის წინ, PayPal-ის წარმომადგენლების განცხადებით, პოლიტიკის განახლება, რომელშიც ნათქვამი იყო, რომ შესაძლოა მომხმარებლებს დეზინფორმაციისთვის $2,500-ის გადახდა მოუწიოთ, შეცდომით გაიგზავნა და კომპანია მომხმარებლების დაჯარიმებას არ აპირებს. თუმცა აქციების ფასი ამ კვირაში 9%-ზე მეტით არის შემცირებული მას შემდეგ, რაც Twitter-ზე #DeletePayPal ჰეშთეგი ტრენდული გახდა.
Jefferies-ის ანალიტიკოსი – ტრევორ უილიამსი თვლის, რომ ეს რეაქცია ხანმოკლე იქნება და კომპანიაზე, სავარაუდოდ, მინიმალური გავლენა ექნება. უილიამსმა კვლევით ჩანაწერში აღნიშნა, რომ ამ ჰეშთეგმა შაბათ-კვირას Twitter-ის 70,000 მომხმარებელი მოიცვა, რაც, PayPal-ის 400 მილიონ მომხმარებელთან შედარებით, ძალიან მცირე რიცხვია.
განცხადებაში უილიამსმა თქვა, რომ თუ მომხმარებელთა მიერ პოლიტიკის განახლების/გამოხმაურების საპასუხოდ მიღებული ქმედება შემოიფარგლება მათით, ვინც უკმაყოფილება სოციალური მედიის საშუალებით გამოხატა, ის არ მოელის, რომ ამას წმინდა ახალ აქტიურ ანგარიშებზე რაიმე შესამჩნევი გავლენა ექნება.
ამჟამად ანალიტიკოსები ვარაუდობენ, რომ PayPal მესამე კვარტალში 3,7 მილიონ ახალ ანგარიშს დაიმატებს, ხოლო მეოთხე კვარტალში – 4,5 მილიონს. უილიამსმა PayPal-ს „შენარჩუნების“ (“Hold”, აქციის შენარჩუნება) რეიტინგი და სამიზნე ფასი – $93 მიანიჭა. კომპანიის აქციის ფასი ახლა $85-ზე დაბალია.
ახლა რა?
ასობით მილიონ მომხმარებელთან ერთად, PayPal-მა შექმნა მასშტაბები, რომლის გამეორებასაც მხოლოდ რამდენიმე კონკურენტი თუ შეძლებს. ამასთან, მოსალოდნელია, რომ გადახდები მომავალში კიდევ უფრო მეტად გადაინაცვლებს ციფრულ სივრცეში. კომპანიის აქციების ფასი ახლა 4-წლიან მინიმუმზეა და, შესაძლოა, ეს გრძელვადიანი პერსპექტივისთვის ყიდვის კარგი შესაძლებლობა იყოს.
