რა მოხდა?
გუშინ CureVac-ის აქციების ფასი 20%-ზე მეტით გაიზარდა. კომპანიის აქციებისთვის ეს ზრდის ზედიზედ მესამე დღე იყო. მატების მიუხედავად, გასული წლის დასაწყისიდან ეს მაჩვენებელი 59%-ზე მეტით არის შემცირებული, თუმცა ბოლო სამი თვის განმავლობაში CureVac-ის აქციების ფასი 61%-ზე მეტით გაიზარდა.
და რა?
ბიოტექნოლოგიური კომპანიის მენეჯმენტმა პარასკევს განაცხადა, რომ CureVac-ის რამდენიმე რნმ ვაქცინა ცდების ადრეულ ეტაპებზე წარმატებით გამოირჩეოდა. კომპანიის წარმომადგენლების თქმით, COVID-19 ვაქცინის კანდიდატმა — CV0501-მა შეძლო ჯანმრთელ მოზრდილებში გაეძლიერებინა ანტისხეულები ომიკრონის BA.1 ვარიანტის წინააღმდეგ.
CureVac-ის მენეჯმენტმა ასევე თქვა, რომ კომპანიის Flu-SV-mRNA ვაქცინამ შეძლო ანტისხეულების გაძლიერება გრიპის ამჟამინდელი შტამის წინააღმდეგ. გერმანული კომპანია თავის ვაქცინებს GSK-თან პარტნიორობის ფარგლებში ავითარებს.
პოზიტიური ახალი ამბების ფონზე ინვესტორებმა უგულებელყვეს ორშაბათს გავრცელებული განცხადება, რომ 1 აპრილიდან ალექსანდერ ზეჰნდერი — Sanofi-ს ონკოლოგიის გლობალური ხელმძღვანელი, კომპანიის აღმასრულებელი დირექტორის თანამდებობაზე ფრენკ ჰაასს შეცვლის. ჰაასი CureVac-ის აღმასრულებელი დირექტორის თანამდებობას ბოლო სამი წლის განმავლობაში იკავებდა. ეს ორი განცხადება კომპანიის ინვესტორებისთვის გასაანალიზებლად საკმაოდ ბევრია.
ახლა რა?
მესამე კვარტალში კომპანიის შემოსავალმა სხვადასხვა თანამშრომლობითი ხელშეკრულებებიდან $11.29 მილიონი შეადგინა, რაც წინა წლის იმავე კვარტალთან შედარებით 62%-ით ნაკლებია. ამასთან CureVac-მა $47.89 მილიონის ოდენობით ზარალი დააფიქსირა. თუმცა, $529.86 მილიონის მოცულობის ნაღდი ფულისა და პერსპექტიული საცდელი შედეგების გათვალისწინებით, GSK-სგან მეტი საეტაპო ანაზღაურების მიღებაა მოსალოდნელი.
