რა მოხდა?
S&P Global Market Intelligence-ის მონაცემების თანახმად, გასული თვის განმავლობაში კიბერუსაფრთხოების კომპანიის — CrowdStrike Holdings-ის აქციების ფასი თითქმის 14%-ით გაიზარდა. ზრდაზე გავლენა იქონია კომპანიის ძლიერმა კვარტალურმა ანგარიშმა, რასაც ცნობილი ანალიტიკოსების დადებითი კომენტარები მოჰყვა.
და რა?
CrowdStrike-მა ფისკალური 2023 წლის მეოთხე კვარტლის შედეგები 7 მარტს წარადგინა. შემოსავალმა $637.4 მილიონი შეადგინა (ანალიტიკოსების პროგნოზი — $624.77 მილიონი), ხოლო EPS-მა (მოგება თითო აქციაზე) — $0.47 (პროგნოზი — $0.43).
8 მარტს კი ანალიტიკოსებმა თავიანთი შეფასებები განაახლეს. მაგალითად, UBS-ის ანალიტიკოსმა — როჯერ ბოიდმა CrowdStrike-ის აქციების სამიზნე ფასი $150-დან $165-მდე გაზარდა და განაცხადა, რომ მეოთხე კვარტლის ფინანსური შედეგები იყო „ნაბიჯი სწორი მიმართულებით“.
კონტექსტისთვის, ანალიტიკოსთა უმეტესობამ CrowdStrike-ის აქციების რეიტინგი ჯერ კიდევ ნოემბერში შეამცირა მას შემდეგ, რაც კომპანიამ ფისკალური მესამე კვარტლის შედეგები წარადგინა. უოლ სტრიტს აწუხებდა კომპანიის წლიური განმეორებადი შემოსავლის (ARR) ზრდის ტემპის შენელება. თუმცა, მეოთხე კვარტალში CrowdStrike-მა რეკორდული — $222 მილიონის ტოლი წმინდა ახალი ARR დაამატა, რაც მნიშვნელოვანი ნახტომია წინა კვარტლის შედეგთან — $198 მილიონთან შედარებით. სხვა სიტყვებით რომ ვთქვათ, CrowdStrike-მა ახალი მომხმარებლები დაიმატა, ხოლო არსებულებმა თავიანთი ხარჯები გაზარდეს.
9 მარტს CrowdStrike-ის ხელმძღვანელობამ მონაწილეობა მიიღო Morgan Stanley Technology, Media & Telecom-ის კონფერენციაში. ეს ღონისძიებები ნამდვილად არ ავრცელებს ახალ ინფორმაციას, მაგრამ ეს კარგი შანსი იყო ინვესტორებისთვის, მოესმინათ მენეჯმენტის მოსაზრებები და გაეგოთ დეტალები CrowdStrike-ის მიერ დაანონსებულ Dell Technologies-თან პარტნიორობის შესახებ.
ახლა რა?
ფისკალური 2024 წლისთვის (რომელიც თებერვალში დაიწყო), CrowdStrike-ის მენეჯმენტი რეკორდულ შემოსავალსა და მომგებიანობას პროგნოზირებს. მისი ზრდის ტემპი ნელდება. ფისკალურ 2023 წელს შემოსავალი 54%-ით გაიზარდა 2024 წლისთვის მოსალოდნელ 34%-იან ზრდასთან შედარებით, თუმცა ეს მატება ჯერ კიდევ ძლიერია.
CrowdStrike-ის კიდევ ერთი ძლიერი მხარე მისი ბალანსია. კომპანიას დაახლოებით $2 მილიარდის ოდენობით წმინდა ფულადი პოზიცია გააჩნია, რომელსაც, მენეჯმენტის მოლოდინით, CrowdStrike ოპორტუნისტულად გამოიყენებს სხვა კომპანიების მიმზიდველ ფასად შესაძენად.
კიბერუსაფრთხოებას ზრდის უზარმაზარი პოტენციალი გააჩნია და, როგორც ჩანს, მომდევნო წლებშიც ასე იქნება. CrowdStrike-ის ფინანსური შედეგები ყოველთვის არ ახდენს შთაბეჭდილებას ბაზარზე, თუმცა კომპანია მუდმივად ზრდის შესაძლებლობებს და კარგად არის პოზიციონირებული, რათა ეს ტენდენცია მომავალშიც შეინარჩუნოს.
