რა მოხდა?
გუშინ, აღმოსავლეთის დროით 13:18 საათისთვის, მას შემდეგ, რაც Bath & Body Works-მა მოსალოდნელზე უკეთესი კვარტალური ანგარიში წარადგინა, კომპანიის აქციების ფასი 24%-ით გაიზარდა.
არასახარბიელო ეკონომიკური მდგომარეობის ფონზე გაყიდვების სუსტმა ზრდამ Bath & Body Works-ის აქციებს დღემდე ღირებულების 44% დააკარგვინა.
და რა?
მენეჯმენტმა კვარტლის ასეთი წარმადობა „ინოვაციას და სიახლეს” მიაწერა, თუმცა უნდა აღინიშნოს, რომ წლიდან წლამდე კომპანიის გაყიდვები 5%-ით შემცირდა. ეს ითარგმნა უწყვეტი ოპერაციებიდან EPS-ის (მოგება თითო აქციაზე) 40%-იან ვარდნაზე ($0,40-მდე).
თუმცა, ინვესტორები უფრო მეტად იყვნენ ორიენტირებული მარაგების მენეჯმენტზე, რაც კომპანიას მოგების კონტროლში ეხმარება. მთლიანი მარაგები წელიწადში 10%-ით გაიზარდა, რაც მოსალოდნელზე უკეთესი შედეგი იყო. ალბათ, წელს ეს იყო ყველაზე დიდი შიში საცალო ვაჭრობის კომპანიებისთვის, განსაკუთრებით Target-ის მიერ ამ წლის დასაწყისში გადადგმული არასწორი ნაბიჯების შემდეგ.
ახლა რა?
მენეჯმენტმა მთელი წლისთვის პროგნოზები გაზარდა და ახლა მოელის, რომ EPS $3.00-3.20-ს მიაღწევს. კომპანიას აქვს უპირატესობა თავისი ლოიალობის პროგრამის საშუალებით, რომელსაც ახლა 21 მილიონზე მეტი წევრი ჰყავს, რაც მომხმარებელთა ბაზის მესამედზე მეტს შეადგენს. არსებულ გარემოში ეს ძალიან ღირებული აქტივია განმეორებითი გაყიდვების განსახორციელებლად.
რაც მთავარია, ინვესტორები მოხარულნი არიან, რომ მენეჯმენტს, მომხმარებელთა მოთხოვნის დასაკმაყოფილებლად, ახალ პროდუქტებში ინვესტიციების ჩადება და, იმავდროულად, მოგების გამოსამუშავებლად ხარჯების გაკონტროლება შეუძლია.
