რა მოხდა?
გუშინ ტექნოლოგიური კომპანიის — Axon Enterprise-ის აქციების ფასი 15%-ით შემცირდა მას შემდეგ, რაც კომპანიამ 2023 წლის პირველი კვარტლის ფინანსური შედეგები წარადგინა.
და რა?
Axon-მა რეკორდული — $343 მილიონის მოცულობის შემოსავალი გამოიმუშავა, ეს მაჩვენებელი წლიდან წლამდე 34%-ით გაიზარდა. უფრო მეტიც, Axon-ის შემოსავლის დიდი ნაწილი გამოწერის სერვისს ეყრდნობა, რაც განმეორებად შემოსავალს (ARR) მნიშვნელოვან მეტრიკად აქცევს. წლიურმა განმეორებადმა შემოსავალმა პირველ კვარტალში $520 მილიონს მიაღწია, რაც შთამბეჭდავი, 49%-იანი ზრდაა.
თუმცა, მიუხედავად იმისა, რომ Axon-ის წლიური მონაცემები პოზიტიური იყო, ინვესტორები, როგორც ჩანს, კომპანიის მომავალი ზრდის ტემპის შესახებ წუხდნენ. კომპანია აფორმებს გრძელვადიან კონტრაქტებს სამართალდამცავ ორგანოებთან და, ამ მიზეზით, ინვესტორები მომავალი კონტრაქტებიდან მიღებულ შემოსავალს ზრდის პერსპექტივების დასადგენად იყენებენ.
პირველ კვარტალში Axon-ის მომავალმა საკონტრაქტო შემოსავალმა $4.8 მილიარდი შეადგინა. ეს ყველა დროის მაქსიმალურ მაჩვენებელია, მაგრამ წინა კვარტალთან შედარებით მაჩვენებელი მხოლოდ 3%-ზე ნაკლებით გაიზარდა. სამართლიანები რომ ვიყოთ, Axon-ისთვის პირველი კვარტალი, როგორც წესი, უფრო სუსტია.
გუშინდელ კლებამდე Axon-ის აქციების ფასი წლის დასაწყისიდან 37%-ით იყო გაზრდილი.
ახლა რა?
პირველი კვარტლის შედეგების გათვალისწინებით, Axon-ის მენეჯმენტმა 2023 წლის შემოსავლის პროგნოზები გაზარდა და ახლა დაახლოებით 22%-იან ზრდას მოელის (წინა პროგნოზი — 20%-იანი ზრდა).
უფრო მეტიც, Axon-ისთვის ეს არის მომგებიანობის ზედიზედ მეხუთე კვარტალი GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით. შესაბამისად, ბიზნესი ფინანსურად ძლიერდება. გარდა ამისა, კომპანიის GAAP მომგებიანობამ გასულ კვირას Axon-ის აქციებს S&P 500-ისკენ გაუხსნა გზა. Axon-მა ინდექსში First Republic 4 მაისს ჩაანაცვლა.
