გუშინ საფონდო ბირჟა მოიცვა საინტერესო სიახლეებმა, რომლებმაც სხვადასხვა კომპანიის აქციებზე მნიშვნელოვანი გავლენა იქონია. დღეს შემოგთავაზებთ საინტერესო დეტალებს ისეთი კომპანიების შესახებ, როგორებიც არის Roblox, Cava Group და Warner Bros. Discovery.
Roblox
გუშინ, ბაზრის გახსნამდე, Roblox-მა მოსალოდნელზე ძლიერი კვარტალური ანგარიში წარადგინა. სავაჭრო დღის განმავლობაში კი ვიდეოთამაშების ამერიკული დეველოპერის აქციების ფასი თითქმის 12%-ით გაიზარდა. წლის დასაწყისიდან ეს მაჩვენებელი დაახლოებით 41%-ით არის გაუმჯობესებული.
მესამე კვარტალში სათამაშო პლატფორმის კომპანიის ჯავშნები (მომავალი შემოსავლების მაჩვენებელი) 20%-ით გაიზარდა და $839.5 მილიონი შეადგინა (ანალიტიკოსების პროგნოზი — $829.5 მილიონი). შემოსავალმა კვარტალში $713.2 მილიონს მიაღწია.
გარდა ამისა, Roblox-ის ზარალმა თითო აქციაზე $0.45 შეადგინა. ეს შეიძლება არც ისე კარგად ჟღერდეს, მაგრამ ამ მაჩვენებელმა გადააჭარბა უოლ სტრიტის ანალიტიკოსების პროგნოზს — -$0.51-ს.
ითვლება, რომ Roblox-ის ჯავშნების მაჩვენებელი მომავალი შემოსავლის მოცულობას მოასწავებს. მიუხედავად იმისა, რომ მესამე კვარტალში რეალური შემოსავალი მნიშვნელოვნად დაბალი იყო, ვიდრე — ჯავშნები, პირველი მათგანი წლიდან წლამდე 38%-ით გაიზარდა.
![](https://investhub.ge/wp-content/uploads/2023/11/Roblox.png)
თუმცა, მეორე მხრივ, ჯავშნების 20%-იანი მატება მიგვანიშნებს, რომ, როგორც ჩანს, მიმდინარე კვარტალში შემოსავლების ზრდის ტემპი არ შენარჩუნდება. აღსანიშნავია ისიც, რომ კვარტალში ჯავშნები გაიზარდა იმავე ტემპით, როგორც საშუალო დღიური აქტიური მომხმარებლების (DAU) რაოდენობა და პლატფორმაზე მომხმარებლის ჩართულობის საათები — ორივე მათგანმა 20%-ით მოიმატა.
გარდა ამისა, ყოველთვიური უნიკალური გადამხდელების რაოდენობა 15%-ით გაიზარდა.
ყოველივე ამის შემდეგ, ფაქტი, რომ მესამე კვარტალში Roblox წამგებიანია, ფაქტად რჩება. მიუხედავად შემოსავლის ზრდისა, კომპანიის ზარალი მხოლოდ 10%-ით შემცირდა და თითო აქციაზე $0.45 შეადგინა.
კარგი ამბავი ის არის, რომ მიუხედავად ამ ზარალისა, Roblox-მა $59.5 მილიონის მოცულობის თავისუფალი ფულადი ნაკადები გამოიმუშავა.
Roblox-ის აქციების ამჟამინდელი ფასი დაახლოებით $39.00-ს შეადგენს. ამ ეტაპზე კომპანიას უოლ სტრიტის 21 ანალიტიკოსი აფასებს. საშუალო სამიზნე ფასი $39.63-ს შეადგენს, მაქსიმალური პროგნოზი — $54.00-ს, ხოლო მინიმალური — $23.00-ს. საშუალო სამიზნე ფასი Roblox-ის აქციების ამჟამინდელი ფასიდან დაახლოებით 1%-იან ზრდას გულისხმობს. კომპანიის აქციებს ამ 21 ანალიტიკოსიდან 15-მა მიანიჭა ყიდვის რეკომენდაცია, 2-მა — ნეიტრალური რეიტინგი, ხოლო 4-მა — გაყიდვის რეკომენდაცია.
Cava Group
სამშაბათს, სავაჭრო დღის დასრულების შემდეგ, Cava Group-მა კვარტალური ანგარიში წარადგინა, გუშინ კი სარესტორნო ქსელის აქციების ფასი დაახლოებით 8%-ით შემცირდა. Cava-ს პირველადი საჯარო შეთავაზება (IPO) მიმდინარე წლის 15 ივნისს შედგა, მას შემდეგ კი კომპანიის აქციების ფასი თითქმის 29%-ით არის შემცირებული.
კომპანიამ გასულ კვარტალში 11 ახალი ლოკაცია გახსნა რაც წლიდან წლამდე 35.5%-იანი ზრდაა. ერთი და იმავე ლოკაციების გაყიდვები (Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს) 14%-ით გაიზარდა, ხოლო მისი რესტორნის დონის მოგების მარჟა 25.1% იყო (გასული წლის იმავე კვარტალში — 21.7%).
სარესტორნო ქსელის კვარტალურმა შემოსავალმა $175.6 მილიონი შეადგინა (ანალიტიკოსების პროგნოზი — $170.25 მილიონი), ხოლო GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა (მოგება თითო აქციაზე) — $0.06 (პროგნოზი — -$0.01).
![](https://investhub.ge/wp-content/uploads/2023/11/Cava-Group.png)
რაც შეეხება მომავალს, მენეჯმენტის ვარაუდით კომპანია 2023 წელს უფრო მეტი ახალი ლოკაციის გახსნას შეძლებს, ვიდრე ადრე იყო მოსალოდნელი. გასულ კვარტალში Cava-ს წარმომადგენლებმა განაცხადეს, რომ წელს 65-70 ახალი ლოკაციის გახსნას გეგმავდნენ, ახლა კი პროგნოზი 70-73-მდე გაიზარდა.
Cava-ს აქციების ამჟამინდელი ფასი დაახლოებით $31.00-ს შეადგენს. ამ ეტაპზე კომპანიას უოლ სტრიტის 11 ანალიტიკოსი აფასებს. საშუალო სამიზნე ფასი $42.90-ს შეადგენს, მაქსიმალური პროგნოზი — $55.00-ს, ხოლო მინიმალური — $35.00-ს. საშუალო სამიზნე ფასი Cava-ს აქციების ამჟამინდელი ფასიდან დაახლოებით 38%-იან ზრდას გულისხმობს. კომპანიის აქციებს ამ 11 ანალიტიკოსიდან 8-მ მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
Warner Bros. Discovery
გუშინ, ბაზრის გახსნამდე, Warner Bros. Discovery-მ მოსალოდნელზე სუსტი კვარტალური ანგარიში წარადგინა. სავაჭრო დღის განმავლობაში კი გართობის დივერსიფიცირებული კომპანიის აქციების ფასი 19%-ით შემცირდა. წლის დასაწყისიდან ეს მაჩვენებელი დაახლოებით 2%-ით არის დაკლებული.
Warner Bros. Discovery-ის შემოსავალი წლიდან წლამდე 2%-ით — $9.98 მილიარდამდე გაიზარდა (ანალიტიკოსების პროგნოზი — $10 მილიარდი). მისი სატელევიზიო ქსელების სეგმენტის შემოსავალი 7%-ით — $4.87 მილიარდამდე დაეცა, ხოლო პირდაპირ მომხმარებლებზე ორიენტირებული მიმართულების შემოსავალმა 5%-ით მოიმატა და $2.44 მილიარდი შეადგინა. კომპანიის სტუდიების სეგმენტის შემოსავალი 4%-ით — $3.23 მილიარდამდე გაიზარდა, რაშიც დიდი წვლილი ფილმ Barbie-ს მიუძღვის.
პირდაპირ მომხმარებლებზე ორიენტირებული მიმართულების გამომწერების რაოდენობა 700,000-ით — 95.1 მილიონამდე შემცირდა, ხოლო საშუალო შემოსავალი ერთ მომხმარებელზე სეგმენტში 6%-ით — $7.82-მდე გაიზარდა.
![](https://investhub.ge/wp-content/uploads/2023/11/Warner-Bros.png)
კომპანიის კორექტირებული EBITDA (მოგება ვალის მომსახურების ხარჯების, გადასახადების ცვეთისა და ამორტიზაციის გამოკლებამდე) წლიდან წლამდე 22%-ით — $2.97 მილიარდამდე შემცირდა და GAAP-ის მიხედვით Warner-მა $97 მილიონის ოდენობით საოპერაციო მოგება დააფიქსირა. თუმცა საპროცენტო ხარჯები კვლავ მაღალ ნიშნულზეა — $574 მილიონი — რის შედეგადაც კომპანიის წმინდა ზარალმა $417 მილიონი შეადგინა, ანუ თითო აქციაზე ზარალი $0.17 იყო (პროგნოზი — -$0.06).
Warner Bros. Discovery-ის აქციების ამჟამინდელი ფასი დაახლოებით $9.00-ს შეადგენს. ამ ეტაპზე კომპანიას უოლ სტრიტის 12 ანალიტიკოსი აფასებს. საშუალო სამიზნე ფასი $17.18-ს შეადგენს, მაქსიმალური პროგნოზი — $24.00-ს, ხოლო მინიმალური — $13.00-ს. საშუალო სამიზნე ფასი Warner Bros. Discovery-ის აქციების ამჟამინდელი ფასიდან დაახლოებით 83%-იან ზრდას გულისხმობს. კომპანიის აქციებს ამ 12 ანალიტიკოსიდან 10-მა მიანიჭა ყიდვის რეკომენდაცია, 2-მა — ნეიტრალური რეიტინგი და არცერთმა — გაყიდვის რეკომენდაცია.