ბევრი ინვესტორი მოუთმენლად ელის კვარტალურ ანგარიშებს სხვადასხვა ინდუსტრიის ლიდერებისგან. ამ კვირის ყველაზე გამორჩეულ კომპანიებს შორის არის ვიდეო სტრიმინგის გიგანტი — Netflix და სამომხმარებლო პროდუქტების სპეციალისტი — Procter & Gamble.
ამ სტატიაში უკეთ გაიგებთ, თუ რატომ აკვირდებიან ინვესტორები ამ ორ კომპანიას და რას უნდა ელოდოთ მათი ანგარიშებისგან.
Netflix
Netflix მეოთხე კვარტლის ფინანსურ შედეგებს ხვალ, სავაჭრო დღის დასრულების შემდეგ, გამოაქვეყნებს. მიუხედავად იმისა, რომ 2022 წლის პირველ ნახევარში კომპანიის აქციებმა მნიშვნელოვანი ვარდნა განიცადა, Netflix-მა გასული წლის უმეტესი ნაწილი დაკარგული „ტერიტორიების“ დაბრუნებაში გაატარა და ინვესტორებს, მასთან დაკავშირებით, ახლა პოზიტიური მოლოდინები აქვთ.
სტრიმინგ კომპანიამ სამი თვის წინ აქციონერები მესამე კვარტლის ძლიერი ანგარიშით გააოცა. მიუხედავად იმისა, რომ წლიდან წლამდე შემოსავლების ზრდა შენელებას განაგრძობდა და ეს მაჩვენებელი, რეალურად, ოდნავ შემცირდა მეორე კვარტალთან შედარებით, Netflix, ვარდნის გარკვეული პერიოდის შემდეგ, გამომწერების რაოდენობის ზრდას დაუბრუნდა.
მოგება ოდნავ შემცირდა, მაგრამ შედეგი ბევრად უკეთესი იყო, ვიდრე ამას ბევრი მოელოდა. უფრო მეტიც, თავისუფალი ფულადი ნაკადებიც გაიზარდა.
თუმცა, Netflix-ის მოკლევადიან მეტრიკებზე უფრო მნიშვნელოვანია ის ტენდენციები, რომლებსაც კომპანია ზოგადად სტრიმინგ ვიდეო ბიზნესში ხედავს. შესაძლოა, ყველაზე მნიშვნელოვანი გრძელვადიანი გავლენა Netflix-ის ახალმა, რეკლამებით მხარდაჭერილმა სერვისმა (Basic with Ads) იქონიოს. მიუხედავად იმისა, რომ ამჟამინდელ სარეკლამო გარემოზე მაკროეკონომიკური შეფერხებები ნეგატიურად მოქმედებს, ამ სერვისის გრძელვადიანი პოტენციალი შეიძლება უზარმაზარი იყოს.
P&G
Procter & Gamble-ის აქციების ფასი მაქსიმალური მაჩვენებლიდან მხოლოდ ოდნავ არის შემცირებული. კომპანია ფისკალური მეორე კვარტლის ფინანსურ შედეგებს ხვალ, სავაჭრო დღის დაწყებამდე, წარადგენს.
ინვესტორების უმეტესობა მოელის, რომ P&G-ის კვარტალური მაჩვენებლები, წინა წლის შედეგებთან შედარებით, ოდნავ შემცირდება. სავარაუდოდ, გაყიდვები დაახლოებით 1%-ით დაიკლებს, ხოლო მოგება თითო აქციაზე (EPS) უფრო მეტ პროცენტულ კლებას განიცდის და $1.59-ს შეადგენს.
ხარჯების ზრდამ ზეწოლა იქონია Procter & Gamble-ის მარჟებზე, მაგრამ, სავარაუდოდ, არა იმდენად, რამდენადაც სხვა კომპანიებზე. ბრენდის სიძლიერე კომპანიას ანიჭებს პრივილეგიას, გაზრდილი ხარჯების ნაწილი მომხმარებლებზე გადაიტანოს და გრძელვადიან პერსპექტივაში ფულის გამომუშავება განაგრძოს.
საერთო ჯამში, ხვალ ინვესტორები, ორი განსხვავებული, მაგრამ მნიშვნელოვანი ინდუსტრიის ლიდერებისგან, საჭირო ფინანსურ ინფორმაციას მიიღებენ. ეს მაჩვენებლები უფრო ნათელს გახდის მომხმარებელთა ხარჯვის პერსპექტივებს როგორც აშშ-ში, ასევე მის ფარგლებს გარეთ და უფრო ადვილი იქნება იმის განსაზღვრა, თუ როგორ შეიძლება წარიმართოს კვარტალური ანგარიშების სეზონი.
