შაბათს ლეგენდარული ინვესტორის — უორენ ბაფეტის Berkshire Hathaway-მ კვარტალური ანგარიში წარადგინა. შედეგებში გამოვლინდა, რომ კომპანიის წმინდა ზარალმა $12.77 მილიარდი შეადგინა, მაგრამ საოპერაციო შემოსავალი წლიდან წლამდე 40.64%-ით — $10.76 მილიარდამდე გაიზარდა.
ბაფეტს აქციონერებისთვის არ მიუმართავს, მაგრამ კომპანიის წარმომადგენლებმა განაცხადეს, რომ ზარალი გამოწვეული იყო მესამე კვარტალში არარეალიზებული მოგების ცვლილებით, რომელიც Berkshire Hathaway-ს კაპიტალის საინვესტიციო ჰოლდინგებში არსებობდა.
დღეს შემოგთავაზებთ ოთხ სხვა მნიშვნელოვან მაჩვენებელს კომპანიის კვარტალური ანგარიშიდან.
ნაღდი ფული გაიზარდა
Berkshire-მა განაგრძო ფულადი სახსრების უზარმაზარი მარაგის გაფართოება რეკორდულ $157.2 მილიარდამდე. მეორე კვარტალში ამ მაჩვენებელმა $147.4 მილიარდი შეადგინა.
კომპანიის ნაღდი ფული უმეტესად ინვესტირებულია აშშ-ის სახაზინო ობლიგაციებში, რომელთა სარგებელიც ახლახან 5%-მდე გაიზარდა. გასულ წელს Berkshire-მა 36%-ით გაზარდა სახაზინო ობლიგაციებში ჩადებული ინვესტიციები, რომლებმაც მესამე კვარტალში $126 მილიარდს მიაღწია.
სავარაუდოდ, Berkshire-ის მენეჯმენტი ცდილობს, გამოიყენოს სარგებელი, რომელიც სამომხმარებლო ინფლაციას 1 პროცენტულ პუნქტზე მეტით აღემატება, რადგან მზარდმა საპროცენტო განაკვეთებმა სახაზინო ობლიგაციებში ინვესტირება უფრო მიმზიდველი გახადა.
აქციების გამოსყიდვა შენელებას განაგრძობს
მესამე კვარტალში აქციების გამოსყიდვა შემცირდა და $1.1 მილიარდი შეადგინა (მეორე მეოთხედში — $1.4 მილიარდი).
ბაფეტმა აქციების გამოსყიდვის პრაქტიკა 2022 წლის ყოველწლიურ წერილში დაიცვა: „როდესაც გეუბნებიან, რომ აქციების ყოველი გამოსყიდვა საზიანოა აქციონერებისთვის ან ქვეყნისთვის, ან განსაკუთრებით სასარგებლოა აღმასრულებელი დირექტორებისთვის, თქვენ უსმენთ ეკონომიკურ გაუნათლებელს ან მჭევრმეტყველ დემაგოგს“.
მესამე კვარტალში Berkshire Hathaway-მ მთლიანობაში 145,574-ზე მეტი A და B კლასის აქცია გამოისყიდა.
აქციების პორტფელმა დარტყმა მიიღო
გასულ კვარტალში კომპანიის პორტფელში Apple-ის აქციები გამოირჩეოდა ყველაზე დიდი — 12%-იანი ვარდნით, რაც ჩინეთის მთავრობის მიერ კომპანიის მთავარი პროდუქტის — iPhone-ის აკრძალვით იყო გამოწვეული. შეგახსენებთ, რომ სექტემბერში Wall Street Journal-ის (WSJ) მიერ გავრცელებული ინფორმაციის მიხედვით, ჩინეთის მთავრობის განკარგულების თანახმად, ცენტრალურ სამთავრობო უწყებებში მომუშავე ოფიციალურმა პირებმა არ უნდა გამოიყენონ iPhone-ები (ან სხვა უცხოური ბრენდის მოწყობილობები) სამუშაოდ და ისინი ოფისშიც კი არ უნდა მიიტანონ. შემდეგ კი Bloomberg-მა განაცხადა, რომ ეს აკრძალვები გავრცელდა სახელმწიფოს მიერ მხარდაჭერილ ფირმებზეც, მათ შორის ენერგეტიკულ გიგანტზე — PetroChina-ზე, რომელიც მილიონობით თანამშრომელს აერთიანებს და ჩინეთის ეკონომიკის დიდ ნაწილს აკონტროლებს.
ბაფეტის წილი Apple-ში Berkshire-ის პორტფელის დაახლოებით 50%-ს უტოლდება, ხოლო ტექნოლოგიური გიგანტის აქციების ფასის 12%-იანი ვარდნა $20 მილიარდს შეადგენს. მეორე კვარტალში კი Apple-ში Berkshire-ის ინვესტიციების ღირებულება, აქციების ფასის ზრდის წყალობით, $26.6 მილიარდით გაიზარდა.
Apple-ის გარდა დაზარალდა Berkshire-ის სხვა მსხვილი ჰოლდინგებიც, როგორებიც არის Bank of America და Coca-Cola.
ამასთან, უორენ ბაფეტი დაინტერესდა აშშ-ში სახლების მშენებლობების ფირმებით და მან D.R. Horton Inc.-ის 6 მილიონი აქცია შეიძინა, რისთვისაც $726 მილიონზე მეტი გადაიხადა. ერთი კვირის წინ კი ინვესტორმა Occidental Petroleum-ის მეტი აქცია იყიდა, რაც ნიშნავს რომ Berkshire ახლა ნავთობკომპანიის 25%-ზე მეტს ფლობს.
სხვა შესამჩნევი ცვლილებები, რომლებიც აგვისტოში SEC-ში (ფასიანი ქაღალდებისა და ბირჟის კომისია) შეტანილ დოკუმენტში გამოვლინდა იყო General Motors Co.-ს წილის თითქმის 50%-იანი შემცირება და სადაზღვევო ფირმის — Globe Life Inc.-ის 4 მილიონი აქციის გაყიდვა, რამაც კომპანიის წილი ამ კომპანიაში დაახლოებით $700 მილიონიდან $275 მილიონამდე შეამცირა.
იაპონური ინვესტიციები
გასულ კვირაში ბაფეტის დიდი ხნის საინვესტიციო პარტნიორმა — ჩარლი მანგერმა Berkshire-ის „იაპონური ფსონები“ შეაქო.
აპრილში Berkshire Hathaway-მ წილები იაპონურ კომპანიებში — Itochu, Marubeni, Mitsubishi Corporation, Mitsui & Co. და Sumitomo — დაახლოებით 7.4%-მდე გაზარდა. ეს იყო შემთხვევა, როდესაც კომპანიამ ყველაზე დიდი ფსონი გააკეთა აშშ-ის ფარგლებს გარეთ. Berkshire-ის მენეჯმენტმა ისარგებლა მომენტით, როდესაც საპროცენტო განაკვეთები დაბალი იყო, რათა მიეღო აქტივები უზარმაზარი ფულადი ნაკადებით და დაბალი რისკით.
„თუ ისეთი ჭკვიანი ხარ, როგორც — უორენ ბაფეტი, შეიძლება საუკუნეში ორჯერ ან სამჯერ თავში ასეთი იდეა მოგივიდეს“ — განაცხადა მანგერმა.
ბოლო კვარტალში აქციების წარმადობა შემცირდა, მაგრამ წლის დასაწყისიდან — Itochu-ს, Marubeni-სა და Mitsubishi Corporation-ის აქციების ფასი, შესაბამისად, დაახლოებით 51%-ით, 37%-ით და 62%-ით გაუმჯობესდა.
Berkshire Hathaway-ის აქციების ამჟამინდელი ფასი $533,815.00-ს შეადგენს. ამ ეტაპზე კომპანიას უოლ სტრიტის მხოლოდ 3 ანალიტიკოსი აფასებს. საშუალო სამიზნე ფასი $611,000.00-ს შეადგენს, მაქსიმალური პროგნოზი — $622,000.00-ს, ხოლო მინიმალური — $600,000.00-ს. საშუალო სამიზნე ფასი Berkshire Hathaway-ის აქციების ამჟამინდელი ფასიდან დაახლოებით 14.4%-იან ზრდას გულისხმობს. კომპანიის აქციებს ამ 3 ანალიტიკოსიდან 1-მა მიანიჭა ყიდვის რეკომენდაცია, 2-მა — ნეიტრალური რეიტინგი და არცერთმა — გაყიდვის რეკომენდაცია.
