გუშინ გავრცელდა ინფორმაცია, რომ უორენ ბაფეტის Berkshire Hathaway (BRK.A) (BRK.B) კვლავ შეამცირა თავისი წილი Bank of America-ში.
აშშ-ის ფასიანი ქაღალდებისა და ბირჟის კომისიაში (SEC) სამშაბათს შეტანილი დოკუმენტის მიხედვით, უორენ ბაფეტის კომპანიამ მთლიანობაში Bank of America-ს დაახლოებით 5.8 მილიონი აქცია (ღირებულება დაახლოებით $228.7 მილიონი) გაყიდა პარასკევს, ორშაბათს და სამშაბათს. საშუალო გასაყიდი ფასი თითო აქციაზე $39.5 იყო.
ბოლო ტრანზაქციის შემდეგ, Berkshire Bank of America-ს 858.2 მილიონ აქციას ფლობს, რაც უორენ ბაფეტის კომპანიის საინვესტიციო პორტფელის 11%-ს აღემატება. აღსანიშნავია, რომ ივლისის შუა რიცხვებიდან Berkshire-მა BofA-ს $7 მილიარდზე მეტის ღირებულების აქციები გაყიდა.
აღსანიშნავია, რომ მეორე კვარტლის ბოლოს, Berkshire-მა თითქმის გაანახევრა თავისი წილი Apple-ში — 400,000 აქციამდე, რომლის ღირებულებაც, კომპანიის მეორე კვარტლის ანგარიშის მიხედვით, დაახლოებით $84.2 მილიარდს შეადგენს. პირველ მეოთხედში ბაფეტმა თავისი წილი ტექნოლოგიურ კომპანიაში 13%-ით შეამცირა.
ამასთან, Berkshire-მა გაყიდა Chevron Corp.-ის (CVX) თითქმის 4.3 მილიონი აქცია. მიუხედავად ამისა, ნავთობკომპანიის წონა Berkshire-ის პორტფელში 30 ივნისის მდგომარეობით 6.6%-მდე გაიზარდა, პირველი კვარტლის ბოლოს დაფიქსირებულ 5.8%-თან შედარებით.
გარდა ამისა, უორენ ბაფეტის კომპანიამ Capital One-ის (COF) 2.6 მილიონი, Floor & Decor-ის (FND) — 800,000-ზე მეტი და T-Mobile-ის (TMUS) დაახლოებით 570,000 აქცია გაყიდა.
რას ამბობს BofA-ს აღმასრულებელი დირექტორი ამ საკითხთან დაკავშირებით?
როდესაც უორენ ბაფეტის გადაწყვეტილების შესახებ ჰკითხეს, Bank of America-ს აღმასრულებელმა დირექტორმა — ბრაიან მოინიჰანმა Barclays-ის Global Financial Services კონფერენციაზე თქვა: „ის შესანიშნავი აქციონერია“.
„არ ვიცი კონკრეტულად რატომ ყიდის ის აქციებს, რადგან, გულწრფელად რომ ვთქვათ, ამის შესახებ ვერ და არ ვკითხავთ. თუმცა, მეორე მხრივ, ამ აქციებს ბაზარი ითვისებს და ჩვენც გამოვისყიდით. ასე გაგრძელდება ცხოვრება“ — დასძინა მოინიჰანმა.
როგორ აფასებენ ანალიტიკოსები Bank of America-ს აქციებს?
Bank of America-ს აქციების ამჟამინდელი ფასი დაახლოებით $39.00-ს შეადგენს. ამ ეტაპზე კომპანიას უოლ სტრიტის 18 ანალიტიკოსი აფასებს. საშუალო სამიზნე ფასი $45.41-ს შეადგენს, მაქსიმალური პროგნოზი — $52.00-ს, ხოლო მინიმალური — $39.00-ს. საშუალო სამიზნე ფასი Bank of America-ს აქციების ამჟამინდელი ფასიდან დაახლოებით 17%-იან ზრდას გულისხმობს. კომპანიის აქციებს ამ 18 ანალიტიკოსიდან 12-მა მიანიჭა ყიდვის რეკომენდაცია, 6-მა — ნეიტრალური რეიტინგი და არცერთმა — გაყიდვის რეკომენდაცია.
ამ კომპანიების აქციების შეძენა საქართველოს ბანკის მობილბანკში შეგიძლიათ ბმულზე.
