გუშინ, ბაზრის გახსნამდე, Walmart-მა მოსალოდნელზე ძლიერი კვარტალური ანგარიში წარადგინა. თუმცა სავაჭრო დღის განმავლობაში ამერიკული მრავალეროვნული საცალო კორპორაციის აქციების ფასი 8%-ზე მეტით შემცირდა. წლის დასაწყისიდან ეს მაჩვენებელი დაახლოებით 9%-ით არის გაუმჯობესებული.
Walmart-ის კვარტალურმა შედეგებმა გადააჭარბა ანალიტიკოსების პროგნოზებს რადგან კომპანიამ დააფიქსირა ძლიერი სარეკლამო გაყიდვები მესამე მხარის გამყიდველებზე, მიუხედავად არასაკმარისი სამომხმარებლო ხარჯებისა და სასურსათო პროდუქტების გაყიდვების შემცირებისა.
Walmart-ის შემოსავალი წლიდან წლამდე 5.2%-ით — $160.8 მილიარდამდე გაიზარდა (ანალიტიკოსების პროგნოზი — $159.3 მილიარდი). კორექტირებულმა წმინდა მოგებამ კი $453 მილიონი შეადგინა, ანუ კორექტირებული EPS (მოგება თითო აქციაზე) $1.53 იყო (პროგნოზი — $1.51). GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა კი მხოლოდ $0.17 შეადგინა და ეს მაჩვენებელი უოლ სტრიტის პროგნოზს $1.35-ით ჩამორჩა.
კომპანიის შემოსავლის დიდ ნაწილზე ელექტრონული კომერცია იყო პასუხისმგებელი, რადგან ეს მიმართულება გლობალური მასშტაბით 15%-ით გაიზარდა. ამ სეგმენტში ლიდერობდა აშშ 24%-იანი ნახტომით, რაც სახლში წაღებისა და მიტანის სერვისებით იყო განპირობებული.
Walmart-ის მენეჯმენტმა განაცხადა, რომ კომპანიის სახელის მატარებელი ერთი და იმავე ლოკაციების გაყიდვები1 წლიდან წლამდე 4.9%-ით გაიზარდა, ხოლო Sam’s Club-ის მაღაზიებში მატებამ 3.8% შეადგინა, რასაც საკვებისა და ჯანმრთელობის პროდუქტების გაყიდვებმა შეუწყო ხელი. თუმცა გასული კვარტლის ბოლოს სუსტმა სამომხმარებლო დანახარჯებმა მსხვილი საცალო მოვაჭრეები დააზარალა და გამონაკლისი არც Walmart ყოფილა.
ფასების მიმართ მგრძნობიარე მომხმარებლებმა შეამცირეს ხარჯები დისკრეციულ პროდუქტებზე, რაც უკვე დადასტურდა Walmart-ის კონკურენტების სუსტი გაყიდვებით, როგორიც არის Target. ამ კომპანიამ კვარტალური ანგარიში მიმდინარე კვირის ოთხშაბათს წარადგინა. Target-ის comps 4.9%-ით დაეცა. მთლიანი შემოსავალი კი წლიდან წლამდე 4.2%-ით — $25.4 მილიარდამდე შემცირდა, რაც ოდნავ უსწრებდა ანალიტიკოსების პროგნოზს — $25.29 მილიარდს.
ამ წინაღობების გათვალისწინებით, Walmart-ის მენეჯმენტმა მომავლის პერსპექტივების მიმართ სიფრთხილე გამოიჩინა. კომპანიაში მთელი ფისკალური წლისთვის წმინდა გაყიდვების პროგნოზი 5%-დან 5.5%-მდე გაზარდეს. გარდა ამისა, მენეჯმენტი ახლა მოელის, რომ EPS $6.48-ს მიაღწევს (წინა პროგნოზი — $6.40), რაც ანალიტიკოსების მოლოდინზე დაბალია.
Walmart-ის აქციების ამჟამინდელი ფასი დაახლოებით $156.00-ს შეადგენს. ამ ეტაპზე კომპანიას უოლ სტრიტის 30 ანალიტიკოსი აფასებს. საშუალო სამიზნე ფასი $181.45-ს შეადგენს, მაქსიმალური პროგნოზი — $210.00-ს, ხოლო მინიმალური — $163.00-ს. საშუალო სამიზნე ფასი Walmart-ის აქციების ამჟამინდელი ფასიდან დაახლოებით 16%-იან ზრდას გულისხმობს. კომპანიის აქციებს ამ 30 ანალიტიკოსიდან 26-მა მიანიჭა ყიდვის რეკომენდაცია, 4-მა — ნეიტრალური რეიტინგი და არცერთმა — გაყიდვის რეკომენდაცია.
[1] Comps — ფინანსური მეტრიკა, რომელსაც საცალო ინდუსტრიის კომპანიები იყენებს, რათა შეაფასოს გაყიდვების მთლიანი მოცულობა კომპანიის ლოკაციებზე, რომლებიც ერთი წლის ან მეტი ხნის განმავლობაში ფუნქციონირებს.
