პარასკევს, 1987 წლის 16 ოქტომბერს – ბოლო სავაჭრო დღეს „შავ ორშაბათამდე“ (შავი ორშაბათი არის მსოფლიო საფონდო ბირჟის დამანგრეველი კრახი, რომელიც 1987 წლის 19 ოქტომბერს მოხდა. ეს მოვლენა წარმოადგენს Dow Jones Industrial Average-ის ყველაზე დიდ ერთდღიან ვარდნას, ამ დღეს ინდექსი 508 პუნქტით, ანუ 22.6%-ით დაეცა. სხვა მსხვილ საფონდო ბირჟებზეც ანალოგიურად დიდი კლება დაფიქსირდა) სუპერმაღაზიების ქსელის – Walmart-ის აქციების ფასმა ყველაზე მკვეთრი ერთდღიანი ვარდნა (11.7%) განიცადა.
ეს კვირაც საკმაოდ ცუდი აღმოჩნდა. სამშაბათს [17 მაისი], წარდგენილი პირველი კვარტლის ანგარიშის შემდეგ, ვოლმარტის აქციების ფასი 11.4%-ით დაეცა. ერთი შეხედვით, როგორც ჩანს ეს ყველაზე ჩვეულებრივი მიზეზის გამო მოხდა – კომპანიამ პროგნოზები ვერ გაამართლა.
მოსალოდნელი იყო, რომ მოგება თითო აქციაზე (EPS) $1.48 იქნებოდა, თუმცა რეალური შედეგი $1.30 გამოვიდა. Walmart-მა გაყიდვების თვალსაზრისით ანალიტიკოსების პროგნოზებს გადააჭარბა, კომპანიამ $141.6 მილიარდის მოცულობის შემოსავალი დააფიქსირა, რაც პროგნოზს – $138.9 მილიარდი – უსწრებს, მაგრამ, როგორც ჩანს, ინვესტორებს ეს არ აინტერესებთ. ნუთუ ბაზრის შემქმნელები ირაციონალურად მოქმედებენ მხოლოდ ერთი სუსტი კვარტლის გამო? გამოდის, რომ ეს კვარტალი განსაკუთრებით სუსტი იყო.
Walmart-ის მოგება და ნაღდი ფული მკვეთრად მცირდება
Walmart-ის თითო განზავებულ აქციაზე (წილის განზავება – ახალი აქციების გამოშვების შედეგად, ძველი აქციონერების ფლობის წილის პროცენტული რაოდენობის შემცირება) GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილი მოგება 24%-ით შემცირდა.
ეს ცოტა ჩახლართულია, მაგრამ შედეგი ასეთია: ფისკალური 2022 წლის პირველ კვარტალში Walmart-მა GAAP-ის მიხედვით, თითო აქციაზე $0.97-ის ტოლი მოგება გამოიმუშავა. 2023 წლის პირველ კვარტალში კი ეს მაჩვენებელი $0.74-მდე შემცირდა. კომპანიის P/E (ფასი/მოგება) კოეფიციენტი ამჟამად დაახლოებით 25-ს შეადგენს, რაც ამ ყველაფრის გათვალისწინებით საკმაოდ ძვირია. Walmart პროგნოზირებს, რომ შემოსავალი წელს კიდევ 1%-ით შემცირდება და ამ შემთხვევაში P/E თანაფარდობა კიდევ უფრო ძვირად გამოიყურება.
ყველაფერი აქ არ სრულდება. აღმოჩნდა, რომ მოგება ვოლმარტის ყველაზე მცირე პრობლემა არ არის. კომპანიას ბოლო კვარტალში ოპერაციებიდან ფულადი სახსრები არ გამოუმუშავებია, სამაგიეროდ $3.8 მილიარდი მოიხმარა. ამას თუ $3.5 მილიარდის ტოლ კაპიტალურ დანახარჯებს დავამატებთ, უარყოფით $7.3 მილიარდს მივიღებთ.
ანგარიშის წარდგენის შემდეგ მენეჯმენტმა ფულადი სახსრების ნაკლებობა ახსნა და თქვა, რომ კვარტლის განმავლობაში კომპანიამ ინვენტარის შესაძენად დიდი თანხა დახარჯა და ინფლაციის გამო ინვენტარის ღირებულება კიდევ უფრო გაიზარდა. S&P Global Market Intelligence-ის ისტორიული მონაცემების მიხედვით, 1995 წლის მესამე კვარტლის შემდეგ Walmart-ს საოპერაციო ფულადი ნაკადების თვალსაზრისით უარყოფითი მაჩვენებელი არ დაუფიქსირებია.
ვოლმარტის აღმასრულებელმა დირექტორმა – დუგ მაკმილონმა განაცხადა, რომ კომპანიას, სულ მცირე, ძლიერი შემოსავალი მაინც ჰქონდა, მაგრამ ყველაფერს კონტექსტში თუ განვიხილავთ, გასაკვირი არ არის, რომ ვოლმარტის პროგნოზმა წელს გაყიდვების 4%-ის შესახებ ინვესტორები არ გაახარა.