გუშინ, ბაზრის გახსნამდე, Uber Technologies-მა მოსალოდნელზე უკეთესი კვარტალური შედეგები გამოაქვეყნა. სავაჭრო დღის განმავლობაში კი კომპანიის აქციების ფასი თითქმის უცვლელი დარჩა — 0.28%-ით გაიზარდა. გასულ წელს ეს მაჩვენებელი დაახლოებით 149%-ით გაუმჯობესდა.
2023 წლის მეოთხე კვარტალში Uber-ის შემოსავალი წლიურად 15%-ით — $9.94 მილიარდამდე გაიზარდა (ანალიტიკოსების პროგნოზი — $9.76 მილიარდი). ამ მაჩვენებლის გაუმჯობესებას ხელი შეუწყო მთლიანი ჯავშნების წლიურმა 22%-იანმა მატებამ და რეკორდული კორექტირებული EBITDA-ს (მოგება ვალის მომსახურების ხარჯების, გადასახადების, ცვეთისა და ამორტიზაციის გამოკლებამდე) — 3.4% — დაფიქსირებამ. შედარებისთვის, გასული წლის იმავე კვარტალში კორექტირებული EBITDA 2.2%-ს შეადგენდა.
„გასული მეოთხედი იყო გამორჩეული კვარტალი, რომელმაც გამორჩეული წელი დააგვირგვინა“ — განაცხადა Uber-ის აღმასრულებელმა დირექტორმა — დანა ხოსროშაჰიმ პრესრელიზში. „ჩვენი სამომხმარებლო ბაზა ახლა უფრო დიდი და აქტიურია, ვიდრე ოდესმე… და ზედიზედ მეორე კვარტალში, მთლიანი ჯავშნები წლიურად გაუმჯობესდა“. დანამ აღნიშნა, რომ შემოსავლის ძლიერმა ტენდენციებმა, ხარჯების კონტროლთან ერთად, Uber-ს მდგრადი, მომგებიანი ზრდის წელიწადი მოუტანა.
გარდა ამისა, Uber-ის ფინანსურმა დირექტორმა — ფრაშნთ მაჰედრა-რაჯაჰმა განაცხადა, რომ მომდევნო კვირაში კომპანია საზოგადოებას გააცნობს განახლებებს აქციონერებისთვის კაპიტალის დაბრუნების გეგმებთან დაკავშირებით.
რაც შეეხება მთელ 2023 წელს, Uber Technologies-ის მოგება $1.89 მილიარდამდე გაიზარდა. შედარებისთვის, 2022 წელს კომპანიამ $9.4 მილიარდის ოდენობით ზარალი დააფიქსირა. ამასთან, მთლიანმა ჯავშნებმა წლიურად 19%-ით მოიმატა, ხოლო შემოსავალმა — 17%-ით.
Uber-ის მომგებიანობა ნაწილობრივ გამოწვეული იყო ხარჯების შემცირების სტრატეგიით, მათ შორის სამუშაო ძალის შემცირებით. 2023 წელს კომპანიის თანამშრომლების რაოდენობა 7%-ით შემცირდა. Uber-ის ფინანსური დირექტორის ვარაუდით კი, ხარჯების შემცირების კამპანია, შესაძლოა, ჯერ არ დასრულებულა.
რაც შეეხება მომავალს, Uber-ის მენეჯმენტს შემოსავლის ან მოგების კონკრეტული პროგნოზები არ წარმოუდგენია. თუმცა კომპანიაში ვარაუდობენ, რომ 2024 წლის პირველ კვარტალში მთლიანი ჯავშნები $37-$38.5 მილიარდს მიაღწევს, ხოლო კორექტირებული EBITDA $1.26-$1.34 მილიარდამდე გაიზრდება.
ანალიტიკოსების შეფასებები
Uber-ის აქციების ამჟამინდელი ფასი დაახლოებით $71.00-ს შეადგენს. კომპანიას ამ ეტაპზე 31 ანალიტიკოსი აფასებს. საშუალო სამიზნე ფასი $74.97-ს შეადგენს, მაქსიმალური პროგნოზი — $87.00-ს, ხოლო მინიმალური — $62.00-ს. საშუალო სამიზნე ფასი Uber-ის აქციების ამჟამინდელი ფასიდან დაახლოებით 6%-იან ზრდას წარმოადგენს. კომპანიის აქციებს 31 ანალიტიკოსიდან 29-მ მიანიჭა ყიდვის რეკომენდაცია, 2-მა — ნეიტრალური რეიტინგი და არცერთმა — გაყიდვის რეკომენდაცია.
Uber-ის აქციების შეძენა საქართველოს ბანკის მობილბანკში შეგიძლიათ ბმულზე.
