იანვარი შესანიშნავი დროა თქვენი ფინანსური მდგომარეობის გაუმჯობესებაზე ფოკუსირებისთვის. მიუხედავად იმისა, რომ შეიძლება 2023 წელს სხვადასხვა ფინანსური საკითხების მოგვარება გსურდეთ, არსებობს ერთი პრიორიტეტული ნაბიჯი, რომლის გადადგმაც დიდ სარგებელს მოგიტანთ.
შექმენით ფინანსური „უსაფრთხოების ბადე“
ფინანსური ექსპერტებისგან ხშირად ისმის გაფრთხილება იმის შესახებ, რომ, შესაძლოა, 2023 წელს რეცესია დადგეს. მთელი მსოფლიოს მასშტაბით მრავალმა სხვადასხვა პრობლემამ იჩინა თავი და ამან შეიძლება ბევრი ადამიანი მძიმე ფინანსურ მდგომარეობაში ჩააყენოს.
სწორედ ამიტომ, ყველაზე მნიშვნელოვანი ფინანსური ნაბიჯი, რომლის გადადგმაც 2023 წელს შეგიძლიათ, არის სარეზერვო ფონდის შექმნა ან არსებული დანაზოგების გაზრდა. იდეალურ შემთხვევაში, თქვენ გჭირდებათ 3 თვის საცხოვრებელი ხარჯებისთვის საკმარისი თანხა — ეს მხოლოდ მინიმუმია. უკეთეს შემთხვევაში, სჯობს ორიენტირად 6 თვე ან უფრო დიდი ვადა აიღოთ.
თუ ვალი გაქვთ გადასახდელი, შეიძლება იფიქროთ, რომ სჯობს პირველ რიგში ეს საქმე მოაგვაროთ და შემდეგ კონცენტრირდეთ სარეზერვო ფონდის შექმნაზე. სესხის დაფარვა შესანიშნავი და მნიშვნელოვანი მიზანია — რაც უფრო ადრე გააკეთებთ ამას, საპროცენტო გადასახადში მით უფრო ნაკლებ ფულს დაკარგავთ.
მაგრამ აი, რატომ უნდა იყოს პრიორიტეტი სარეზერვო ფონდის შექმნა — თუ დანაზოგი არ გაქვთ და სამუშაოს გარეშე აღმოჩნდებით ან რაიმე დაუგეგმავი ხარჯი წარმოგექმნებათ, შესაძლოა კიდევ მოგიწიოთ სესხის აღება, რაც თქვენს ფინანსურ მდგომარეობას გააუარესებს.
დაცვა ყოველთვის გჭირდებათ
თუ დარწმუნებული ხართ, რომ ბოლოდროინდელი პესიმიზმი გადაჭარბებულია, მაშინ შეიძლება არ იყოთ იმდენად მოტივირებული, რომ 2023 წელს თქვენს სარეზერვო ფონდზე ფოკუსირდეთ. მაგრამ გახსოვდეთ, იმისთვის, რომ თქვენი დანაზოგი გამოგადგეთ, აუცილებელი არ არის ფართო ეკონომიკური კრიზისი დადგეს. თქვენ შეიძლება სამსახური მაშინაც კი დაკარგოთ, როდესაც ეკონომიკა კარგი წარმადობით ხასიათდება. ამასთან, ვერასოდეს განსაზღვრავთ წინასწარ, თუ როდის აღმოჩნდებით გაუთვალისწინებელი ხარჯების წინაშე.
სწორედ ამიტომ, პრიორიტეტული უნდა იყოს სარეზერვო ფონდის შექმნა მიუხედავად იმისა, თუ როგორ განვითარდება ეკონომიკური მოვლენები.
