ეკონომისტები აცხადებენ, რომ აშშ-ში აგვისტოში სამომხმარებლო და საბითუმო ფასები საკმარისად ნელი ტემპით გაიზარდა იმისთვის, რომ ფედერალური სარეზერვო ბანკისგან (Fed) ამ თვეში გასამართ შეხვედრაზე საპროცენტო განაკვეთების შემცირებას კვლავ მოველოდეთ.
2024 წლის აგვისტოში სამომხმარებლო ფასების ინდექსი (CPI) თვიურად 0.2%-ით გაიზარდა, ხოლო მისი წლიური ზრდა, ივლისთან შედარებით, 2.9%-დან 2.5%-მდე შემცირდა. ეს არის ყველაზე მცირე წლიური ზრდა 2021 წლის თებერვლის შემდეგ და მიუთითებს იმაზე, რომ ინფლაციის დონე Fed-ის 2%-იანი სამიზნე მაჩვენებლისკენ მიემართება.
თუმცა საიჯარო ინფლაციის ზრდის ტემპი ხელახლა დაჩქარდა — თავშესაფრის ხარჯები აგვისტოში თვიურად 0.5%-ით გაიზარდა.
აღსანიშნავია, რომ Fed-ის მიერ საპროცენტო განაკვეთების ცვლილებისთვის გადამწყვეტი მნიშვნელობა აქვს „ძირითად“ ინფლაციას, რომელიც გამორიცხავს საკვებისა და ენერგიის არასტაბილურ ფასებს. ეს მაჩვენებელი აგვისტოში თვიურად 0.3%-ით გაიზარდა, რაც აღემატება ანალიტიკოსების პროგნოზს — 0.2%-იან მატებას. თუმცა „ძირითადი“ ინფლაციის წლიურმა ზრდამ 3.2% შეადგინა და ეს მაჩვენებელი მოლოდინებს შეესაბამება. აშშ-ის შრომის სტატისტიკის ბიუროს წარმომადგენლების თქმით, „ძირითადი“ ინფლაციის ზრდა იჯარის ხარჯების აღმასვლამ გამოიწვია.
გარდა ამისა, გუშინ გამოქვეყნებული მონაცემებით, საბითუმო გაყიდვების ფასები აგვისტოში თვიურად ასევე 0.2%-ით გაიზარდა. გასული წლის იმავე თვესთან შედარებით კი, მწარმოებელთა ფასების ინდექსმა (PPI) 1.7%-ით მოიმატა. შედარებისთვის, ივლისში ამ მაჩვენებლის წლიურმა ზრდამ 2.2% შეადგინა.
ეკონომისტების თქმით, მიმდინარე კვირაში გამოქვეყნებული ინფლაციის მონაცემები აჩვენებს, რომ ფასები ზოგიერთი მიმართულებით ამაღლებული რჩება, თუმცა მთლიანობაში ინფლაციის დონე კვლავ Fed-ის სამიზნე მაჩვენებლისკენ მიემართება. PPI ინდექსის გუშინდელმა ანგარიშმა კიდევ ერთხელ განამტკიცა ეკონომისტებისა და ტრეიდერების პროგნოზი, რომ აშშ-ის ფედერალური სარეზერვო ბანკი მიმდინარე თვეში გასამართ შეხვედრაზე საპროცენტო განაკვეთებს მეოთხედი პროცენტული პუნქტით შეამცირებს.
ფედერალური სარეზერვო ბანკის (Fed) ოფიციალური პირები ინფლაციის მაჩვენებლებს ყურადღებით აკვირდებიან. ისინი, საორიენტაციო საპროცენტო განაკვეთების შემცირებამდე, ეძებენ დამატებით მტკიცებულებებს იმისა, რომ ფასების ზეწოლა კონტროლის ქვეშ არის. Fed საპროცენტო განაკვეთებს 23-წლიან მაქსიმუმზე ინარჩუნებს, რათა ხელი შეუშალოს მოსახლეობის დანახარჯების ზრდას და დათრგუნოს მაღალი ინფლაცია მთელ ეკონომიკაში მიწოდებისა და მოთხოვნის გადაბალანსებით.
შეგახსენებთ, რომ მაღალი განაკვეთები ანელებს ეკონომიკას და ამცირებს ინფლაციას სესხების აღების და ხარჯვის შეზღუდვით, მაგრამ ამ დროს თავს იჩენს რეცესიის გამოწვევის რისკი.
