ბევრი ტექნოლოგიური კომპანია სწრაფად იზრდება და, შესაძლოა, ისინი კარგი გრძელვადიანი ინვესტიციები იყოს. სულ უფრო რთული ხდება ისეთი მაღალტექნოლოგიური კომპანიების პოვნა, რომლებსაც თავიანთ ინდუსტრიაში მნიშვნელოვანი ცვლილებების შეტანა შეუძლია.
გადახედეთ Fiverr International-ს, რათა გაიგოთ, თუ როგორ ცვლის ეს კომპანია სამყაროს თქვენს თვალწინ.
Fiverr International
ფრილანს (შტატგარეშე მუშაობა) სერვისების სპეციალისტი – Fiverr International 2020 წელს გლობალური ყურადღების ცენტრში მოექცა. მას შემდეგ, რაც მთელს მსოფლიოში მთავრობებმა კოვიდ-19-ის პანდემიის გავრცელების გასაკონტროლებლად ლოკდაუნის გადაწყვეტილება მიიღეს, ბევრმა ადამიანმა აღმოაჩინა, რომ ხელთ ძალიან ბევრი დრო ჰქონდა, ხოლო საქმე – ცოტა. გარდა ამისა, თანამდებობიდან გათავისუფლებამ ზოგიერთ ადამიანს შემოსავალი შეუზღუდა, ამიტომ მრავალმა მათგანმა ინტერნეტში თავისუფალი სამუშაო შესაძლებლობების მოძიება დაიწყო. იმავდროულად, ყველა დონის კომპანია, დაწყებული ახალბედებით, დამთავრებული გიგანტებით, კორპორატიულ ბიუჯეტს მჭიდროდ იცავდა. შედეგად მივიღეთ მყიდველი-გამყიდველის განტოლების ორივე მხრიდან ინტერესის უნიკალური ზრდა შტატგარეშე სერვისების მიმართ. ასე რომ, Fiverr-ის ბიზნესი შთამბეჭდავად გაიზარდა.
ასევე გაიზარდა კომპანიის აქციების ფასი, რომელიც ჩვეულ მდგომარეობას 2021 წლის ზაფხულში დაუბრუნდა. ბევრმა ინვესტორმა მიიჩნია, რომ Fiverr-ის დიდების დრო დასრულდა და ბიზნესი ისეთი კარგი აღარასოდეს იქნება, როგორც პანდემიის საწყის ფაზაში. 2021 წლის დასაწყისის ამაღელვებელ მაჩვენებლებს 2022 წლის ივლისში Fiverr-ის აქციების ფასი 90%-ით ჩამორჩება.
მაგრამ Fiverr-ის რეალურ ბიზნესს ეს დარტყმა არ მიუღია. კომპანიის ბოლო გაყიდვები 2020 წლის აბსოლუტური პიკიდან თითქმის სამჯერ გაიზარდა და თავისუფალი ფულადი ნაკადები (FCF) დღესდღეობით 67%-ით მეტია.
Fiverr სერვისების დამატებას და თქვენი უნარების პოპულარიზაციისთვის ახალი გზების პოვნას აგრძელებს. ეს კომპანია წამყვანი ძალაა ე. წ. gig ეკონომიკაში (თავისუფალი ბაზრის სისტემა, რომელშიც დროებითი თანამდებობები საერთოა და ორგანიზაციები მუშაკებს მოკლევადიანი ვალდებულებებისთვის ქირაობენ. ტერმინი „gig” არის ჟარგონული სიტყვა სამუშაოსთვის, რომელიც განსაზღვრული დროის განმავლობაში გრძელდება) , რომელმაც პანდემიისგან სასარგებლო სტიმული მიიღო, მაგრამ დიდი სიჩქარით ზრდას ახლაც განაგრძობს. ბევრი დამკვირვებელი თვლის, რომ ეს სამუშაოს მომავალია. Fiverr და სექტორის სხვა წარმომადგენლები მთელ კონცეფციას ახალი მიმართულებით წარმართავენ და, როგორც ჩანს, ეს ცვლილებები ათწლეულების განმავლობაში გაგრძელდება.
Fiverr ლოდინად ღირს
ინვესტორები მომთმენნი უნდა იყვნენ, რადგან ეს ტექნოლოგიური კომპანია აყალიბებს მომავალს ისეთი ფუნდამენტური კონცეფციებისთვის, როგორიც არის სამუშაო ადგილები და ფული. ანუ, მიუხედავად იმისა, რომ ფასების მოკლევადიანი ზრდა უნდა აღინიშნოს, არ უნდა დანებდეთ, თუ სრულ აღდგენას გარკვეული დრო დასჭირდება ან აქციების ფასი დროებით დაეცემა. ამ ინოვაციური კომპანიისგან სარგებლის მიღების საუკეთესო გზა მისი აქციების რამდენიმე წლით და არა თვეებით შენარჩუნებაა. დაიმახსოვრეთ, ინვესტირება არის მარათონი და არა გარბენი მოკლე დისტანციაზე.
