პარასკევს, 1 მარტს, სავაჭრო საათების შემდეგ, Super Micro Computer-ის აქციების ფასი 12%-ზე მეტით გაიზარდა მას შემდეგ, რაც გავრცელდა ინფორმაცია, რომ ხელოვნური ინტელექტის (AI) სერვერების მწარმოებელი S&P 500 ინდექსს შეუერთდება.
AI ბუმის ფონზე, სან ხოსეში, კალიფორნიაში დაფუძნებული კომპანიის აქციების ფასი წლის დასაწყისიდან დაახლოებით 217%-ით გაუმჯობესდა. Super Micro Computer-ის საბაზრო კაპიტალიზაცია ამჟამად $50 მილიარდს აჭარბებს.
ამ კომპანიასთან ერთად S&P 500-ს დაემატება Deckers Outdoor Corp. და ისინი ინდექსში ჩაანაცვლებენ Whirlpool-ს და აშშ-ის რეგიონალურ ბანკ Zion Bancorporation-ს. ეს ცვლილებები ძალაში 18 მარტს, სავაჭრო დღის დაწყებამდე, შევა.
როგორც წესი, S&P 500 ინდექსში დამატების შემთხვევაში, კომპანიის აქციების ღირებულება იზრდება. ამის მიზეზი კი ის არის, რომ იმ საბირჟო ვაჭრობის (ETF) და ერთობლივი საინვესტიციო ფონდების მენეჯერებს, რომლებიც ამ საორიენტაციო ინდექსის წარმადობის გამეორებას ცდილობენ, ფონდების პორტფელებში ახალი პოზიციების დამატება უწევთ.
კვარტალური შედეგები
უფრო მეტიც, Super Micro-მ AI ნარატივი თავისი ფინანსური შედეგებით გაამყარა. გასული კვარტლის ანგარიში კომპანიამ 29 იანვარს წარადგინა. Super Micro-ს მანამდე უკვე გამოქვეყნებული ჰქონდა წინასწარი შედეგები, ამიტომ მეორე კვარტლის ფინანსური მონაცემები გასაკვირი არ იყო, მაგრამ მენეჯმენტის პროგნოზებმა ცხადყო, რომ კომპანიის ხელოვნური ინტელექტის (AI) ბუმით გამოწვეული სწრაფი ზრდა მიმდინარე წლის განმავლობაშიც გაგრძელდება.
გასულ კვარტალში კი კომპანიის შემოსავალი წლიურად 103%-ით — $3.66 მილიარდამდე გაიზარდა და ამ მაჩვენებელმა გადააჭარბა როგორც ანალიტიკოსების პროგნოზს — $3.06 მილიარდს, ასევე მენეჯმენტის თავდაპირველ მითითებებს — $2.7-$2.9 მილიარდს.
მთლიანი მოგების მარჟა 18.7%-დან 15.4%-მდე შემცირდა, მაგრამ კორექტირებული მოგება თითო აქციაზე $3.43-დან $5.59-მდე გაიზარდა (პროგნოზი $4.93).
Super Micro-ს აღმასრულებელმა დირექტორმა — ჩარლზ ლიანგმა განაცხადა: „ჩვენ ახალი პარტნიორების დამატებას განვაგრძობთ, ამასთან ამჟამინდელ საბოლოო მომხმარებლებს უფრო მეტი სურთ Super Micro-სგან“.
რაც შეეხება მომავალს, Supermicro-ს მენეჯმენტი მოელის, რომ მესამე კვარტალში შემოსავალი $3.7-$4.1 მილიარდს მიაღწევს, ხოლო კორექტირებული EPS — $5.20-$6.01-ს (გასული წლის იმავე კვარტალში — $1.63). მთელი წლის განმავლობაში კი მოსალოდნელია, რომ შემოსავალი 104%-ით გაიზრდება და $14.3-$14.7 მილიარდს შეადგენს (პროგნოზი — $10-$11 მილიარდი).
ანალიტიკოსების შეფასებები
Super Micro Computer-ის აქციების ამჟამინდელი ფასი დაახლოებით $905.00-ს შეადგენს. ამ ეტაპზე კომპანიას უოლ სტრიტის 9 ანალიტიკოსი აფასებს. საშუალო სამიზნე ფასი $824.11-ს შეადგენს, მაქსიმალური პროგნოზი — $1,300.00-ს, ხოლო მინიმალური — $160.00-ს. საშუალო სამიზნე ფასი Super Micro Computer-ის აქციების ამჟამინდელი ფასიდან დაახლოებით 9%-იან კლებას გულისხმობს. კომპანიის აქციებს ამ 9 ანალიტიკოსიდან 5-მა მიანიჭა ყიდვის რეკომენდაცია, 3-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Super Micro Computer-ის აქციების შეძენა საქართველოს ბანკის მობილბანკში შეგიძლიათ ბმულზე.
