გუშინ, ბაზრის გახსნამდე, Spotify-მ ძლიერი კვარტალური ანგარიში წარადგინა. სავაჭრო დღის განმავლობაში კი აუდიო პლატფორმის აქციების ფასი თითქმის 4%-ით გაიზარდა. გასულ წელს ეს მაჩვენებელი დაახლოებით 138%-ით გაუმჯობესდა.
მოსალოდნელზე უკეთესი შედეგები
Spotify-ის მენეჯმენტმა განაცხადა, რომ გასულ კვარტალში პრემიუმ გამომწერების რაოდენობა 10 მილიონით გაიზარდა. ანალიტიკოსები კი ვარაუდობდნენ, რომ ეს მაჩვენებელი 8.9 მილიონით გაუმჯობესდებოდა. აუდიო პლატფორმის ყოველთვიური აქტიური მომხმარებლების რაოდენობამ წლიურად 23%-ით მოიმატა და 602 მილიონს მიაღწია, რამაც უოლ სტრიტის მოლოდინს 1 მილიონით გადააჭარბა.
Spotify-ის კვარტალური შემოსავალი წლიურად 16%-ით — $3.95 მილიარდამდე გაიზარდა. ეს მაჩვენებელი ოდნავ ჩამოუვარდება ანალიტიკოსების პროგნოზს $4.01 მილიარდს. გასული წლის იმავე კვარტალთან შედარებით, კომპანიის ზარალი $289 მილიონიდან $75 მილიონამდე შემცირდა, ანუ კორექტირებულმა ზარალმა თითო აქციაზე $0.36 შეადგინა (პროგნოზი — -$0.37).
Spotify-ის ზარალის შემსუბუქებაზე პოზიტიურად იმოქმედა კომპანიის მიერ სამუშაო ძალის შემცირებამ. სადღესასწაულო სეზონის დაწყებამდე მენეჯმენტმა თანამშრომლების 17%-ის, ანუ დაახლოებით 1,500 ადამიანის, გათავისუფლება დააანონსა. 2023 წლის ივნისში Spotify-მ 600 თანამშრომელი დაითხოვა, ხოლო იანვარში — 200.
კვარტალურ ანგარიშში ყველაზე შთამბეჭდავი მაჩვენებელი იყო თავისუფალი ფულადი ნაკადები (FCF), რომელმაც $396 მილიონს მიაღწია. შედარებისთვის, გასული წლის იმავე კვარტალში, კომპანიამ ამ მიმართულებით $73 მილიონის მოცულობის ზარალი დააფიქსირა. თავისუფალ ფულად ნაკადებს ხელი შეუწყო როგორც მომხმარებელთა მზარდმა ბაზამ, ასევე დაბალმა საოპერაციო ხარჯებმა.
შესანიშნავი ბიზნესი
ჯერ კიდევ ოქტომბერში, მესამე კვარტლის ანგარიშის წარდგენისას, Spotify-ის აღმასრულებელმა დირექტორმა — დანიელ ეკმა განაცხადა, რომ Spotify შესანიშნავი ბიზნესი უნდა გამხდარიყო და შეიძლება ითქვას, რომ ახლა კომპანია სწორედ ამ გზაზე დგას. ხარჯები სათანადოდ კონტროლდება და Spotify-ის შემოსავალი კვლავ შესანიშნავად იზრდება.
შემდეგი ნაბიჯი იქნება სარეკლამო ბიზნესის გაუმჯობესება — სწორედ ამ მიმართულებით ახერხებს Spotify მომხმარებელთა უმეტესობის მონეტიზაციას თავის პლატფორმაზე. ამ ბიზნესის ზრდა პრემიუმ სეგმენტის ტემპს არ შეესაბამება, ამიტომ ამ მხრივ შესაძლებლობები ჯერ კიდევ არსებობს.
შვედური კომპანია ბიზნესის დივერსიფიკაციას ცდილობს, ამ მიზნით Spotify-მ უკვე შეიძინა უფლებები 200,000 აუდიო წიგნზე, რომლებიც პრემიუმ გამომწერებისთვის არის ხელმისაწვდომი. კომპანია გასული წლის ოქტომბრიდან ყოველთვიურად აუდიოწიგნების 15 უფასო საათს სთავაზობს პრემიუმ გამომწერებს ბრიტანეთში, აშშ-სა და ავსტრალიაში.
ანალიტიკოსების შეფასებები
Spotify-ის აქციების ამჟამინდელი ფასი დაახლოებით $232.00-ს შეადგენს. კომპანიას ამ ეტაპზე 20 ანალიტიკოსი აფასებს. საშუალო სამიზნე ფასი $240.06-ს შეადგენს, მაქსიმალური პროგნოზი — $330.00-ს, ხოლო მინიმალური — $150.00-ს. საშუალო სამიზნე ფასი Spotify-ის აქციების ამჟამინდელი ფასიდან დაახლოებით 3.5%-იან ზრდას გულისხმობს. კომპანიის აქციებს 20 ანალიტიკოსიდან 14-მა მიანიჭა ყიდვის რეკომენდაცია, 5-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Spotify-ის აქციების შეძენა საქართველოს ბანკის მობილბანკში შეგიძლიათ ბმულზე.
