გუშინ, ბაზრის დახურვის შემდეგ, Palo Alto Networks-მა მოსალოდნელზე ძლიერი კვარტალური შედეგები გამოაქვეყნა. თუმცა სავაჭრო საათების შემდეგ კიბერუსაფრთხოების კომპანიის აქციების ფასმა 21%-ზე მეტით დაიკლო. ვარდნა, სავარაუდოდ, გამოწვეული იყო იმით, რომ მენეჯმენტმა შეამცირა შემოსავლების პროგნოზი და აღნიშნა, რომ მომხმარებლები IT უსაფრთხოების ხარჯებს ამცირებენ და უფრო მომთხოვნები ხდებიან.
გასული წლის განმავლობაში Palo Alto Networks-ის აქციების ფასი დაახლოებით 111%-ით გაუმჯობესდა.
კვარტალური შედეგები
ფისკალური 2024 წლის მეორე კვარტალში კიბერუსაფრთხოების კომპანიის შემოსავალი წლიურად 19%-ით — $2 მილიარდამდე გაიზარდა (ანალიტიკოსების პროგნოზი — $1.97 მილიარდი). ბუღალტრული აღრიცხვის საყოველთაოდ მიღებული პრინციპების (GAAP) მიხედვით გამოთვლილმა მოგებამ კი $1.7 მილიარდს მიაღწია, ანუ მოგება თითო განზავებულ აქციაზე (EPS) $4.89 იყო (პროგნოზი — $4.38).
Palo Alto-ს აღმასრულებელმა დირექტორმა — ნიკეშ არორამ განაცხადა, რომ იგი ხედავს მომავალი ზრდის შესაძლებლობებს ხელოვნურ ინტელექტში (AI), რადგან მომხმარებლებს სურთ ამ ტექნოლოგიის პასუხისმგებლობიანი ინტეგრაცია თავიანთ IT ინფრასტრუქტურაში.
პროგნოზები
რაც შეეხება მომავალს, Palo Alto Networks-ის მენეჯმენტი მოელის, რომ მიმდინარე კვარტალში შემოსავალი $1.95-$1.98 მილიარდს მიაღწევს და ეს დიაპაზონი ჩამოუვარდება ანალიტიკოსების პროგნოზს — $2.04 მილიარდს. გარდა ამისა, კომპანიაში მოელიან, რომ EPS $1.24-$1.26-ს შეადგენს (უოლ სტრიტის პროგნოზი — $1.29).
ამასთან, საწარმოებისთვის კიბერუსაფრთხოების გადაწყვეტების შემქმნელმა 2024 წლის შემოსავლების პროგნოზი $8.15-$8.2-დან $7.95-$8 მილიარდამდე შეამცირა. Palo Alto Networks-ის მენეჯმენტი ასევე მოელის, რომ კომპანიის გადავადებული შემოსავალი $10.1-$10.2 მილიარდს მიაღწევს (ძველი პროგნოზი — $10.7-$10.8 მილიარდი).
ანალიტიკოსების შეფასებები
Palo Alto Networks-ის აქციების ამჟამინდელი ფასი დაახლოებით $366.00-ს შეადგენს. ამ ეტაპზე კომპანიას უოლ სტრიტის 29 ანალიტიკოსი აფასებს. საშუალო სამიზნე ფასი $391.82-ს შეადგენს, მაქსიმალური პროგნოზი — $450.00-ს, ხოლო მინიმალური — $335.00-ს. საშუალო სამიზნე ფასი Palo Alto Networks-ის აქციების ამჟამინდელი ფასიდან დაახლოებით 7%-იან ზრდას გულისხმობს. კომპანიის აქციებს ამ 29 ანალიტიკოსიდან 26-მა მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
Palo Alto Networks-ის აქციების შეძენა საქართველოს ბანკის მობილბანკში შეგიძლიათ ბმულზე.
