გუშინ Nvidia-ს (NVDA) აქციების ფასი 8%-ზე მეტით გაიზარდა მას შემდეგ, რაც ჩიპების მწარმოებელი გიგანტის აღმასრულებელმა დირექტორმა — ჯენსენ ჰუანგმა განაცხადა, რომ კომპანიის პროდუქტებზე მოთხოვნა წარმოუდგენლად მაღალია
ჰუანგმა Goldman Sachs-ის Communacopia + Technology კონფერენციაზე თქვა, რომ „უკვე ყველაფერი გაყიდულია“, რადგან მომხმარებლები ხელოვნური ინტელექტის (AI) ინიციატივების მხარდასაჭერად Nvidia-ს ინფრასტრუქტურას ეყრდნობიან.
„დღესდღეობით Nvidia მსოფლიოს მასშტაბით ყველა AI კომპანიასთან თანამშრომლობს. ყველა ჩვენზეა დამოკიდებული“ — განაცხადა ჯენსენ ჰუანგმა.
Nvidia-ს ჩიპები გამოიყენება ქლაუდ ინფრასტრუქტურის რამდენიმე ძირითადი პროვაიდერის მიერ — მათ შორის არიან ტექნოლოგიური გიგანტები, Microsoft (MSFT) და Amazon (AMZN). მიმდინარე წლის მეორე კვარტლის ანგარიშის წარდგენისას კი ორივე კომპანიის მენეჯმენტმა განუცხადა ინვესტორებს, რომ AI ინფრასტრუქტურის ხარჯების ზრდას მოელიან.
ჯენსენ ჰუანგმა ასევე ისაუბრა Nvidia-ს პროდუქტების ანაზღაურებაზე მომხმარებლებისთვისაც და თქვა, რომ ყოველი დოლარი, რომელსაც ქლაუდ კომპანია დახარჯავს Nvidia-ს ინფრასტრუქტურაზე, მას $5-ის ოდენობით ქლაუდ სივრცის საიჯარო შემოსავალს მოუტანს.
Nvidia-ს GPU
აღსანიშნავია, რომ გუშინ Oracle-ის (ORCL) CloudWorld კონფერენციაზე Nvidia GPU-ები (გრაფიკული დამუშავების ერთეული) იყო წარმოდგენილი. კომპანიამ წარმოადგინა Oracle Cloud Infrastructure (OCI) Supercluster, რომელსაც მხარს უჭერს Nvidia-ს Blackwell პლატფორმა. ეს უკანასკნელი აღჭურვილია 100,000-ზე მეტი GPU-თი, რათა გაწვრთნას და აამუშაოს AI მოდელები. OCI Supercluster, სავარაუდოდ, ხელმისაწვდომი იქნება 2025 წლის პირველი ნახევრიდან.
Oracle-მა და Nvidia-მ ითანამშრომლეს კონფერენციაზე, რათა ეჩვენებინათ, თუ როგორ შეუძლია Nvidia-ს პლატფორმას ააჩქაროს AI-სა და მონაცემთა დამუშავების პროცესი მომხმარებლებისთვის.
როგორ აფასებენ ანალიტიკოსები Nvidia-ს აქციებს?
Nvidia-ს აქციების ამჟამინდელი ფასი $117.00-ს შეადგენს. კომპანიას ამ ეტაპზე უოლ სტრიტის 42 ანალიტიკოსი აფასებს. საშუალო სამიზნე ფასი $153.24-ს შეადგენს, მაქსიმალური პროგნოზი — $200.00-ს, ხოლო მინიმალური — $90.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 31%-იან ზრდას გულისხმობს. კომპანიის აქციებს 43 ანალიტიკოსიდან 39-მა მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.
Nvidia-ს აქციების შეძენა საქართველოს ბანკის მობილბანკში შეგიძლიათ ბმულზე.
