Nike კომპანიაში ძველ აღმასრულებელ დირექტორს აბრუნებს

გუშინ, „after-hours”¹ ვაჭრობაში Nike-ის (NKE) აქციების ფასი დაახლოებით 9%-ით გაიზარდა მას შემდეგ, რაც ფეხსაცმლისა და სპორტული ტანსაცმლის გლობალურმა კომპანიამ ელიოტ ჰილი აღმასრულებელი დირექტორის თანამდებობაზე ჯონ დონაჰოს შემცვლელად დაასახელა.

ელიოტს ექნება დავალება, აღადგინოს აქციები, რომლებმაც, ხუთშაბათის მდგომარეობით, წლის დასაწყისიდან ღირებულების დაახლოებით მეოთხედი დაკარგა. კომპანიამ ივნისში კვარტალური შედეგები გამოაქვეყნა და ბაზარი პერსპექტივების ცვლილებების შესახებ გააფრთხილა. მთლიანობაში ანგარიშმა ინვესტორებს იმედები გაუცრუა.

აღსანიშნავია, რომ ელიოტ ჰილი უბრუნდება Nike-ს 2020 წელს პენსიაზე გასვლის შემდეგ. იმ პერიოდისთვის ეს იყო მისი ხანგრძლივი, 32-წლიანი, კარიერის დასასრული კომპანიაში.

Nike-ის აღმასრულებელმა თავმჯდომარემ, მარკ პარკერმა განცხადებაში აღნიშნა, რომ მომავლის მოთხოვნილებების გათვალისწინებით და ბიზნესის წარსული წარმატებების გააზრებით, საბჭომ დაასკვნა, რომ კომპანიას სჭირდებოდა ელიოტის გლობალური გამოცდილება, ლიდერობის სტილი და ღრმა ცოდნა ინდუსტრიის შესახებ. „მისი გატაცება სპორტით, ჩვენი ბრენდებით, პროდუქტებით, მომხმარებლებით, სპორტსმენებითა და თანამშრომლებით ელიოტს აქცევს სწორ პიროვნებად Nike-ის ზრდის შემდეგი ეტაპისთვის“ — დასძინა მარკმა.

ჯონ დონაჰო თანამდებობას ოფიციალურად ოქტომბრის შუა რიცხვებში დატოვებს. ის იანვრის ბოლომდე კომპანიაში მრჩევლის როლს შეასრულებს.

როგორ აფასებენ ანალიტიკოსები Nike-ის აქციებს?

Nike-ის აქციების ამჟამინდელი ფასი დაახლოებით $86.00-ს შეადგენს. ამ ეტაპზე კომპანიას უოლ სტრიტის 33 ანალიტიკოსი აფასებს. საშუალო სამიზნე ფასი $92.12-ს შეადგენს, მაქსიმალური პროგნოზი — $120.00-ს, ხოლო მინიმალური — $71.00-ს. საშუალო სამიზნე ფასი Nike-ის აქციების ამჟამინდელი ფასიდან დაახლოებით 7.6%-იან ზრდას გულისხმობს. კომპანიის აქციებს ამ 33 ანალიტიკოსიდან 15-მა მიანიჭა ყიდვის რეკომენდაცია, 18-მა — ნეიტრალური რეიტინგი, და არცერთმა — გაყიდვის რეკომენდაცია.

Nike-ის აქციების შეძენა საქართველოს ბანკის მობილბანკში შეგიძლიათ ბმულზე.

[1] სავაჭრო აქტივობის პერიოდი, რომელიც რეგულარული საბაზრო სესიის შემდეგ მიმდინარეობს.