გუშინ სპორტული ფეხსამცლისა და ტანსაცმლის მწარმოებელი ამერიკული კომპანიის — Nike-ის აქციების ფასი თითქმის 3%-ით გაიზარდა. წლის დასაწყისიდან ეს მაჩვენებელი დაახლოებით 30%-ით არის დაკლებული.
Nike-ის აქციები აფიქსირებს აღმასვლას იმის ფონზე, რომ კომპანია 2024 წლის ზაფხულის ოლიმპიური თამაშების ახალ სარეკლამო კამპანიას იწყებს. მასშტაბური სპორტული ღონისძიება ამ პარასკევს პარიზში დაიწყება და 11 აგვისტომდე გაგრძელდება. ზოგიერთი ინვესტორი იმედოვნებს, რომ ეს კომპანიისთვის ბრენდინგის აღდგენის დასაწყისი იქნება.
Nike-ის აგრესიული სარეკლამო კამპანია
ბოლო პერიოდში Nike რთულ მდგომარეობაში აღმოჩნდა, მაგრამ კომპანიის მენეჯმენტი მიზნად ისახავს, ეს სიტუაცია ახალი მარკეტინგული ბიძგებითა და სტრატეგიებით გამოასწოროს. შაბათ-კვირას Nike-ის ოლიმპიური თამაშების სარეკლამო კამპანიის — „გამარჯვება ყველასთვის არ არის“ — დებიუტი შედგა. Nike-ის სამი დღის წინ გამოქვეყნებულ სარეკლამო რგოლს მსახიობი — უილემ დეფო ახმოვანებს ყურადღების ცენტრში კი არიან ცნობილი სპორტსმენები, მათ შორის სერენა უილიამსი და ლებრონ ჯეიმსი.
გარდა ამისა, ჩინეთში და სხვა საკვანძო საერთაშორისო ბაზრებზე წინაღობების გამო (რაც მოთხოვნის შემცირებას იწვევს) ზოგიერთი ანალიტიკოსი და აქციონერი ეჭვობს, რომ ბოლო პერიოდში Nike-ის ბრენდი შესუსტდა. კომპანიის ბოლო კვარტალური შედეგების გამოქვეყნებისას მენეჯმენტმა განაცხადა, რომ, მიმდინარე კვარტალში გაყიდვები წლიურად, სავარაუდოდ, 10%-ით შემცირდება და არსებობს გარკვეული მტკიცებულება, რომ ახალგაზრდა სპორტსმენები სულ უფრო მეტად ანიჭებენ უპირატესობას მცირე ბრენდებს. ოლიმპიადის დიდი სარეკლამო კამპანიის დაწყების შემდეგ კი, როგორც ჩანს, სპორტული ტანსაცმლისა და ფეხსაცმლის გიგანტი მზად არის გარკვეული აგრესიული ნაბიჯების გადასადგმელად, რათა თავისი ბრენდის პოპულარობა გაზარდოს.
Nike-ის აქციების შეფასება
Nike-ის აქციები დაეცა იმ დონემდე, რომელიც ისტორიულად იაფად გამოიყურება. ამჟამად მისი P/E1 (ფასი/მოგება) კოეფიციენტი დაახლოებით 20-ს შეადგენს, ხოლო ფორვარდული P/E2 — თითქმის 24-ს. გარდა ამისა, Nike-ის კვარტალური დივიდენდი დაახლოებით 1.9%-ს აღწევს, რაც ახლოსაა კომპანიის უმაღლეს ნიშნულთან.
უფრო მაღალი ფორვარდული P/E თანაფარდობა ასახავს მოლოდინს, რომ Nike-ს უახლოეს პერსპექტივაში მნიშვნელოვანი წინააღმდეგობების წინაშე აღმოჩნდება. თუმცა არსებობს შანსი, რომ კომპანია კვლავ შეძლებს მაღალი შემოსავლის გამომუშავებას და გრძელვადიან პერსპექტივაში ზრდას. Nike-ს ჯერ კიდევ გააჩნია მსოფლიოში ერთ-ერთი ყველაზე ძლიერი ბრენდი, წარმოებისა და დისტრიბუციის უპირატესობები.
ბოლო კვარტალური ანგარიში
Nike-მა ფისკალური 2024 წლის მეოთხე კვარტლის ფინანსური შედეგები 27 ივნისს გამოაქვეყნა:
| მაჩვენებელი | ფისკალური 2024 წლის IV კვ. | ანალიტიკოსების პროგნოზები | ფისკალური 2023 წლის IV კვ. |
| შემოსავალი | $12.6 მილიარდი | $12.88 მილიარდი | $12.83 მილიარდი |
| განზავებული EPS | $0.99 | $0.84 | $0.66 |
| წმინდა მოგება | $1.5 მილიარდი | $1.27 მილიარდი | $1.03 მილიარდი |
უფრო დეტალური მონაცემების სანახავად შეგიძლიათ ეწვიოთ ბმულს.
როგორ აფასებენ ანალიტიკოსები Nike-ის აქციებს?
Nike-ის აქციების ამჟამინდელი ფასი დაახლოებით $75.00-ს შეადგენს. ამ ეტაპზე კომპანიას უოლ სტრიტის 32 ანალიტიკოსი აფასებს. საშუალო სამიზნე ფასი $92.48-ს შეადგენს, მაქსიმალური პროგნოზი — $120.00-ს, ხოლო მინიმალური — $67.00-ს. საშუალო სამიზნე ფასი Nike-ის აქციების ამჟამინდელი ფასიდან დაახლოებით 23.5%-იან ზრდას გულისხმობს. კომპანიის აქციებს ამ 32 ანალიტიკოსიდან 13-მა მიანიჭა ყიდვის რეკომენდაცია, 17-მა — ნეიტრალური რეიტინგი, ხოლო 2-მა — გაყიდვის რეკომენდაცია.
Nike-ის აქციების შეძენა საქართველოს ბანკის მობილბანკში შეგიძლიათ ბმულზე.
[1] კომპანიის აქციების ფასის შეფარდება მის EPS-სთან. მაღალი P/E კოეფიციენტი შეიძლება ნიშნავდეს, რომ კომპანიის აქციების ფასი გადაჭარბებულია ან ინვესტორები მაღალი ზრდის ტემპებს მოელიან.
[2] ეს არის P/E თანაფარდობის ვერსია, რომელიც ამ კოეფიციენტის გაანგარიშებისთვის პროგნოზირებულ მოგებას იყენებს. პროგნოზირებული მოგება, როგორც წესი, შემდეგ 12 თვეს ან მომდევნო სრულ წელს მოიცავს.
