რა მოხდა?
19 იანვარს Netflix-ის მენეჯმენტმა აქციონერებს გაუგზავნა წერილი, რომელშიც ხაზი გაუსვა 2022 წლის მეოთხე კვარტალში მოგების ზრდას და სამომავლო გეგმებს. კომპანიამ განიხილა, თუ როგორ აგრძელებს მუშაობას, რათა გამომწერები მეტი საფასო ოფციებით და მათ ანგარიშებზე კონტროლით უზრუნველყოს. მენეჯმენტმა ასევე ახსენა უფრო ხელმისაწვდომი — რეკლამით მხარდაჭერილი სერვისის ამოქმედება, რამაც კომპანიას მეტი ფასიანი გამომწერი შემატა.
Netflix-ის წარმომადგენლებმა ასევე განიხილეს გეგმები — მომხმარებლებს, დამატებითი საფასურის სანაცვლოდ, მისცენ საშუალება, თავიანთი ანგარიშები ოჯახის წევრების გარდა სხვა ადამიანებსაც გაუზიარონ. მოსალოდნელია, რომ ეს ცვლილება 2023 წლის პირველ კვარტალში განხორციელდება, რაც სტრიმინგის კომპანიის შემოსავლის კიდევ ერთ გამაძლიერებელ ფაქტორად იქცევა.
და რა?
წერილში ნათქვამია, რომ კომპანიას ამჟამად 231 მილიონი ფასიანი გამომწერი ჰყავს. თუმცა, მენეჯმენტმა აღნიშნა, რომ 100 მილიონზე მეტი ოჯახი აზიარებს ანგარიშებს, რაც ბრენდის გამოყენების პირობებს ეწინააღმდეგება.
Netflix-ის წარმომადგენლებმა განაცხადეს, რომ ამჟამად პლატფორმის გაზიარება, გამოყენების პირობების მიხედვით, ოჯახის წევრებით არის ლიმიტირებული. ახალი წესების ამოქმედების შემდეგ კი გამომწერები, დამატებითი საფასურის სანაცვლოდ, შეძლებენ თავიანთი ანგარიშები ადამიანთა უფრო ფართო წრეს გაუზიარონ.
ახლა რა?
საერთო ჯამში, Netflix-ის ეს ახალი ინიციატივა შეიძლება ყველა მხარისთვის მომგებიანი იყოს. გამომწერები შეძლებენ მეგობრებს და მათ ოჯახებს თავიანთი ანგარიშები ლეგალურად გაუზიარონ, ხოლო მათ მიერ დამატებითი საფასურის გადახდა, კომპანიის შემოსავალს გაზრდის.
თუ ასეთ სერვისებს მეტი სტრიმინგ კომპანია განახორციელებს, ამან, შესაძლოა, თითოეული ოჯახის მიერ ამ მიმართულებით გადახდილი საფასური შეამციროს, რაც მთავარია, კონტენტის რაოდენობის შეზღუდვის გარეშე.
