2021 წლის ნოემბერში პიკის მიღწევის შემდეგ, Netflix-ის აქციების ფასი სასტიკად დაეცა და ღირებულების ნახევარი დაკარგა. სტრიმინგ ვიდეოს პიონერმა მასიური გაყიდვების ცეცხლზე ნავთი მაშინ დაასხა, როდესაც 2022 წლის პირველ კვარტალში გამომწერების გაცილებით დაბალი ზრდის ორიენტირი აიღო, რაც იმაზე მიუთითებს, რომ კომპანიის პანდემიასთან დაკავშირებული მოულოდნელი ზრდის ტალღა ნამდვილად დასრულდა.
ერთი მნიშვნელოვანი მაჩვენებელი
დიდი ხანია ინვესტორების შეპყრობილნი არიან Netflix-ის გამომწერთა რაოდენობის ზრდით, როგორც კომპანიის ამჟამინდელი შესაძლებლობების მაჩვენებლით. ამიტომ, იანვარში, როდესაც მენეჯმენტმა პირველი კვარტლისთვის გამომწერების მხოლოდ 2.5 მილიონიანი ზრდა ივარაუდა (მეოთხე კვარტალში გამომწერთა რაოდენობა 8.28 მილიონით გაიზარდა), კომპანიის აქციები მასიურად გაიყიდა. მნიშვნელოვანია გვახსოვდეს, რომ ისტორიულად, Netflix-ისთვის პირველი კვარტალი უფრო მოკრძალებულია, ამიტომ მენეჯმენტის ასეთი პროგნოზები აზრს მოკლებული არ არის.
2021 წლის ნოემბრის პიკის შემდეგ, ნეტფლიქსის აქციების ფასი 50%-ზე მეტით შემცირდა. უოლ სტრიტის მრავალი ანალიტიკოსი დარწმუნებულია, რომ გამომწერების რაოდენობის რეალური ზრდა შეფასებებს გადააჭარბებს, რამაც, შეიძლება, აქციების მნიშვნელოვანი აღდგენა გამოიწვიოს.
ანალიტიკოსების შეფასებების კონსენსუსის თანახმად, Netflix-ის გლობალური გამომწერების ბაზა კომპანიის პროგნოზს გადააჭარბებს და 2.8 მილიონით გაიზრდება, მაგრამ უოლ სტრიტის ზოგიერთი ანალიტიკოსი კიდევ უფრო მძლავრ ზრდას ელის. Well Fargo-ს ანალიტიკოსმა – სტივენ კეჰოლმა ცოტა ხნის წინ გაზარდა თავისი პროგნოზი 2.5 მილიონიდან 2.9 მილიონამდე და ფირმის ყოველთვიური აქტიური მომხმარებლების (MAU) ანალიზი დაიმოწმა. Guggenheim-ის ანალიტიკოსი – მაიკლ მორისი კიდევ უფრო ოპტიმისტურად არის განწყობილი და მესამე მხარის – Apptopia-ს მონაცემებზე დაყრდნობით, Netflix-ის გამომწერთა რაოდენობის 3 მილიონით ზრდას ვარაუდობს.
არაპროგნოზირებადი სიტუაცია
Netflix-ის გამომწერთა რაოდენობის თვალსაზრისით მდგომარეობა არაპროგნოზირებადია. კომპანიამ გასული თვის დასაწყისში განაცხადა, რომ, უკრაინაში შეჭრის საპასუხოდ, რუსეთში მომსახურება შეაჩერა. ეს მოჰყვა ადრინდელ ნაბიჯებს, როდესაც სტრიმინგ კომპანიამ უარი თქვა რუსული, სახელმწიფოს მიერ კონტროლირებადი არხების ტრანსლაციაზე და რუსულენოვანი საავტორო გადაცემების წარმოება შეაჩერა.
ნეტფლიქსის მენეჯმენტს არასოდეს უთქვამს, თუ რამდენი გამომწერი ჰყავდა კომპანიას რუსეთში, მაგრამ ანალიტიკოსების უმეტესობის აზრით, ეს რიცხვი 1-2 მილიონს აღწევდა.
ამჟამად Netflix-ის აქციის ფასი 23-ჯერ აღემატება 2023 წლის საპროგნოზო მოგებას თითო აქციაზე (EPS), რაც თითქმის ათწლეულის განმავლობაში კომპანიის აქციის ყველაზე დაბალი შეფასებაა. ეს იმაზე მეტყველებს, რომ Netflix-ის აქციების გაყიდვები ზედმეტად შორს წავიდა. კომპანია კვარტალურ ანგარიშს დღეს, ბაზრის დახურვის შემდეგ წარადგენს და მას საშუალება ეძლევა ინვესტორები მოულოდნელი მაჩვენებლებით გააკვირვოს.
