The Wall Street Journal-ის თანახმად, რომელმაც კომპანიის შიდა დოკუმენტები განიხილა, Horizon Worlds – Meta Platforms-ის წამყვანი მეტავერსი მომხმარებლებისთვის, შიდა წარმადობის მოლოდინს ვერ აკმაყოფილებს.
Meta თავდაპირველად მიზნად ისახავდა Horizon Worlds-ში 500,000 ყოველთვიურად აქტიური მომხმარებლის მიღწევას წლის ბოლომდე, მაგრამ მოხსენებაში ნათქვამია, რომ ამჟამინდელი მაჩვენებელი 200,000-ზე ნაკლებია. გარდა ამისა, დოკუმენტებმა აჩვენა, რომ მომხმარებელთა უმეტესობა პლატფორმის პირველ თვეს გამოყენების შემდეგ Horizon-ს არ დაბრუნებია და გაზაფხულის შემდეგ მომხმარებელთა რაოდენობა სტაბილურად მცირდება.
მოხსენების თანახმად, სამყაროების მხოლოდ 9%-ს მინიმუმ 50 ადამიანი სტუმრობს, უმეტესობას კი – საერთოდ არავინ.
მოხსენება ემატება იმას, რომ კომპანიის აქციები ფასები, ასევე, მომხმარებელთა რაოდენობა იკლებს და რეკლამის განმთავსებლები ხარჯებს ამცირებენ. წლის დასაწყისიდან Meta-ს აქციების ფასი ჯერჯერობით 62%-ზე მეტით არის შემცირებული.
კომპანიის აღმასრულებელი დირექტორი მარკ ცუკერბერგი დაინტერესებულია მეტავერსის ამუშავებით, რათა მომხმარებლებს ერთად მუშაობისა და თამაშის საშუალება მისცეს. სწორედ ამ ამბიციების გამოსახატად, გასულ წელს კომპანია Facebook-ის სახელი Meta Platforms-ით შეიცვალა.
შედეგად, Meta-მ შექმნა Horizon Worlds, რომელიც წარმოადგენს ვირტუალური სივრცის ქსელს, სადაც მომხმარებლები ავატარების საშუალებით ურთიერთქმედებენ. ინდივიდებს Horizon Worlds-ზე წვდომა Meta’s Quest-ის ვირტუალური რეალობის (VR) ჩაფხუტების საშუალებით ეძლევათ.
მეტავერსის ირგვლივ გარკვეული აჟიოტაჟის შექმნის მიზნით, სამშაბათს Meta’s Connect-ის კონფერენციაზე ცუკერბერგმა თავისი კომპანიის უახლესი ვირტუალური რეალობის ჩაფხუტი – სახელწოდებით Meta Quest Pro წარადგინა. მოწყობილობა $1500 ღირს და შეიცავს ახალ ტექნოლოგიებს, როგორიცაა მოწინავე მობილური Snapdragon კომპიუტერული ჩიპი.
Meta-ს სპიკერმა The Wall Street Journal-ს განუცხადა, რომ კომპანია აგრძელებს მეტავერსის გაუმჯობესებას, რომელიც ყოველთვის მრავალწლიან პროექტად განიხილებოდა.
Meta-ს წარმომადგენლებმა განაცხადეს, რომ წელს კომპანია მობილური მოწყობილობებისთვის და კომპიუტერებისთვის Horizon-ის ვებ ვერსიას გამოუშვებს, თუმცა ზუსტი თარიღი უცნობია.
