გასულ სამშაბათს, სავაჭრო დღის დაწყებამდე, The Walt Disney Company-მ კვარტალური შედეგები გამოაქვეყნა. მას შემდეგ კი ცნობილი კომპანიის აქციების ფასი 9%-ზე მეტით შემცირდა. წლის დასაწყისიდან ეს მაჩვენებელი დაახლოებით 17%-ით არის გაუმჯობესებული.
ფისკალური მეორე კვარტლისთვის, რომელიც 30 მარტს დასრულდა, Walt Disney-ის შემოსავალი წლიურად დაახლოებით 1%-ით —$22.1 მილიარდამდე გაიზარდა (ანალიტიკოსების პროგნოზი — $22.12 მილიარდი). კორექტირებულმა მოგებამ თითო განზავებულ აქციაზე (EPS) კი $1.21-ს მიაღწია, რამაც გადააჭარბა უოლ სტრიტის პროგნოზს — $1.1-ს.
რესტრუქტურიზაციისა და აქტივების გაუფასურების ერთჯერადი ხარჯების ჩათვლით, კომპანიამ $20 მილიონის ოდენობით წმინდა ზარალი, ანუ თითო აქციაზე -$0.1, დააფიქსირა. შედარებისთვის, გასული წლის იმავე კვარტალში, Walt Disney-ის წმინდა მოგებამ $1.27 მილიარდს მიაღწია, ხოლო EPS-მა — $0.69-ს.
კომპანიის მენეჯმენტმა ინვესტორებს განუცხადა, რომ Walt Disney-ის ბიზნესი გამოცდილებების მიმართულებით, რომელიც მოიცავს თემატურ პარკებს და საკრუიზო გემებს, მიმდინარე კვარტალში ნელდება.
| მაჩვენებელი | 2024 წლის I კვ. | ანალიტიკოსების პროგნოზები | 2023 წლის I კვ. | წლიური ცვლილება (%) |
|---|---|---|---|---|
| შემოსავალი | $22.083 მილიონი | $22.121 მილიონი | $21.815 მილიონი | 1% |
| განზავებული EPS | $1.21 | $1.10 | $0.93 | 30% |
| მთლიანი სეგმენტის საოპერაციო შემოსავალი | $3.845 მილიონი | არ არის ცნობილი | $3.285 მილიონი | 17% |
| თავისუფალი ფულადი ნაკადები | $2.407 მილიონი | არ არის ცნობილი | $1.987 მილიონი | 21% |
Disney-ის ბიზნესის გააზრება
დისნეი არის გასართობი ბიზნესის კონგლომერატი, რომელიც ცნობილია თავისი თემატური პარკებით, ფილმებისა და პერსონაჟების კატალოგით, პირდაპირ მომხმარებელზე მიმართული ლაივ სტრიმინგ სერვისებით, როგორიც არის Disney+.
ბოლო წლებში Disney-მ ყურადღება გაამახვილა თავის სტრიმინგ პლატფორმებზე, მათ შორის არის Disney+, ESPN+ და Hulu. ამ პლატფორმების ზრდა და პანდემიის შემდეგ თემატური პარკებში ვიზიტების აღდგენა გადამწყვეტ როლს თამაშობს კომპანიის საერთო სტრატეგიაში.
მნიშვნელოვანი კვარტალური მაჩვენებლები
დისნეის მთლიანი სეგმენტის საოპერაციო შემოსავალი წლიურად 17%-ით გაიზარდა მის ორ მთავარ ბიზნესში — სპორტში და გამოცდილებებში დაფიქსირებული აღმასვლის გამო. უფრო მეტიც, პირდაპირ მომხმარებელზე მიმართულმა სეგმენტმა შემოსავლების 13%-იანი ზრდა დააფიქსირა, რაც Disney-ის სტრიმინგ სერვისების მიმზიდველობაზე მიანიშნებს. მიმდინარე კვარტალში დისნეის მუშაობის მნიშვნელოვანი მამოძრავებელი ფაქტორი იყო მის თემატურ პარკებში და კურორტებზე დაფიქსირებული მუდმივი აღდგენა და გაფართოება. ამ მიმართულებებით კომპანიამ შემოსავალი წლიურად 10%-ით გაზარდა.
გართობის სეგმენტი გამოწვევების წინაშე აღმოჩნდა, თუმცა მისი შემოსავალი წლიურად 5%-ით შემცირდა, რაც ხაზს უსვამს გასართობი ინდუსტრიის კონკურენტულ და ცვალებად ხასიათს. დისნეის მენეჯმენტი იმედოვნებს, რომ განაგრძობს ინვესტირებას კომპანიის კონტენტ ბიბლიოთეკაში და თემატურ პარკებში, რათა ეს წინაღობა დაძლიოს.
ერთ-ერთი ნათელი წერტილი იყო ხარჯების მენეჯმენტი და საოპერაციო ეფექტიანობა, რამაც ხელი შეუწყო თავისუფალი ფულადი ნაკადების (FCF) წლიურ 21%-იან ზრდას.
მომავალი
დისნეი გეგმავს კონტენტის შექმნაზე, ციფრულ გაფართოებასა და საერთაშორისო ბაზარზე შეღწევაზე ფოკუსირებას. მენეჯმენტი მომდევნო ათწლეულში კომპანიის თემატურ პარკებსა და კურორტებში $60 მილიარდის დაბანდებას აპირებს. უფრო მეტიც, Disney-ში მოელიან, რომ ფისკალური 2024 წლის ბოლოს კომპანიის სტრიმინგ სერვისები მომგებიანობას მიაღწევს.
როგორ აფასებენ ანალიტიკოსები Disney-ის აქციებს?
Disney-ის აქციების ამჟამინდელი ფასი დაახლოებით $106.00-ს შეადგენს. ამ ეტაპზე კომპანიას უოლ სტრიტის 23 ანალიტიკოსი აფასებს. საშუალო სამიზნე ფასი $134.81-ს შეადგენს, მაქსიმალური პროგნოზი — $145.00-ს, ხოლო მინიმალური — $120.00-ს. საშუალო სამიზნე ფასი Disney-ის აქციების ამჟამინდელი ფასიდან დაახლოებით 27%-იან ზრდას გულისხმობს. კომპანიის აქციებს ამ 23 ანალიტიკოსიდან 22-მა მიანიჭა ყიდვის რეკომენდაცია, 1-მა — ნეიტრალური რეიტინგი და არცერთმა — გაყიდვის რეკომენდაცია.
Disney-ის აქციების შეძენა საქართველოს ბანკის მობილბანკში შეგიძლიათ ბმულზე.
