Coca-Cola-სთან დაკავშირებით ინვესტორების მხრიდან არსებობს რამდენიმე მნიშვნელოვანი კითხვა, რომელსაც კომპანიამ პასუხები ივლისის ბოლოს უნდა გასცეს. სასმელების ტატანის აქციებმა 2022 წელს ფართო ბაზარს აჯობა იმის გამო, რომ მისი ბიზნესი ნებისმიერი ეკონომიკური ვარდნის პირობებში შედარებით სტაბილურია. ინვესტორები, დივიდენდებისა და აქციების გამოსყიდვის გზით ფულადი სახსრების ანაზღაურების გაზრდის პერსპექტივებით აღფრთოვანებულები არიან.
მოდით განვიხილოთ, თუ როგორ შეიძლება კოკა-კოლამ გააძლიეროს თავისი პოზიცია, როგორც 2022 წლისთვის მიმზიდველმა აქციამ და ყურადღება გავამახვილოთ 26 ივლისს დაგეგმილი კვარტალური ანგარიშის რამდენიმე ძირითად მეტრიკაზე.
- ორგანული გაყიდვები
მთავარი მაჩვენებელი იქნება შემოსავალი და ინვესტორთა უმეტესობა მოელის, რომ ის 13%-ით – $10.5 მილიარდამდე გაიზრდება. Coca-Cola-ს გაყიდვების მატებამ პირველ კვარტალში 16%-ს შეადგინა.
შემოსავლის ეს მაჩვენებელი მოიცავს ვალუტის კურსის რყევებს და მასზე დიდ გავლენას ახდენს პანდემიასთან დაკავშირებული სამომხმარებლო ხარჯების ცვლილებები. სწორედ ამიტომ, ინვესტორებს სურთ, რომ ზრდის უფრო მკაფიო სურათისთვის თვალი ორგანულ გაყიდვებს ადევნონ. გასულ კვარტალში კოკა-კოლამ ამ მიმართულებით 18%-იანი ზრდა დააფიქსირა.
კონკურენტმა PepsiCo-მა განაცხადა, რომ ივლისის შუა რიცხვებში აშშ-ის სასმელების ძირითადი ბიზნესი 9%-ით გაიზარდა და Coca-Cola, სავარაუდოდ, მეორე კვარტალში უფრო დიდ ზრდას გამოავლენს. ეს მოგება ნაწილობრივ განპირობებულია Coke-ის მიერ სასმელების გაყიდვით ისეთ ადგილებში, როგორიც არის სპორტული ღონისძიებები, კონცერტები და რესტორნები. ის ასევე უნდა ასახავდეს ბაზრის წილის ზრდას, რაც შეესაბამება იმ სასიხარულო ამბებს, რომლებიც აქციონერებმა ბოლო რამდენიმე კვარტალურ ანგარიშში იხილეს.
- ხარჯების ზეწოლა
კოკა-კოლას დომინანტური პოზიცია ბაზარზე კომპანიას ხარჯების ზეწოლისგან სრულად არ იცავს. კომპანიას, სავარაუდოდ, გაეზრდება ხარჯები ტრანსპორტირების, ძირითადი საშუალებებისა და ხელფასების მიმართულებით. შესაძლოა, მომხმარებლებმა უარი თქვან უფრო მაღალი ფასების გადახდაზე ამიტომ, მომგებიანობა სწორედ ის მეტრიკაა, რომელსაც ახლა ინვესტორები უნდა დააკვირდნენ.
ახლა Coca-Cola-ს საოპერაციო მარჟა ახალი მწვერვალებისკენ იზრდება მაშინაც კი, როდესაც PepsiCo-ს ეს მაჩვენებელი დაეცა. ეს ფაქტორი, სავარაუდოდ, მთავარი მიზეზია, რის გამოც 2022 წელს კომპანიის აქციებმა აჯობა კონკურენტ კომპანიებსაც და ფართო ბაზარსაც.
ინვესტორებს სურთ, რომ მომდევნო კვირაში კოკა-კოლას უჩვეულოდ მაღალი მოგების სიძლიერის მეტი მტკიცებულება იხილონ.
- ახალი ხედვა
ამ თვის დასაწყისში Pepsi-მ გაყიდვების პერსპექტივა გაზარდა და ინვესტორებს Coca-Cola-სგანაც ანალოგიური განახლების იმედი აქვთ. აღმასრულებელი პროგნოზირებენ, რომ ორგანული გაყიდვები 7%-8%-ით გაიზრდება. მაგრამ PepsiCo-მ თავისი პროგნოზი 8%-დან 10%-მდე გაზარდა და თუ მოთხოვნის ტენდენციები ივლისში ძლიერი დარჩება, შესაძლოა მსგავსი ცვლილებები Coca-Cola-მაც განახორციელოს.
ნებისმიერ შემთხვევაში, ინვესტორები კოკა-კოლას დივიდენდურ აქციებში ჩადებული ინვესტიციებიდან, სავარაუდოდ, მნიშვნელოვან ფულად ანაზღაურებას მიიღებენ. უკვე ზედიზედ 60 წელია, რაც კომპანია დივიდენდურ ანაზღაურებას ყოველწლიურად ზრდის, რაც მას დივიდენდ მეფედ აქცევს. ეს შთამბეჭდავი სერია, სავარაუდოდ, არ დასრულდება მაშინაც კი, თუ ეკონომიკური ზრდის ტენდენციები შენელდება ან ბაზარი კიდევ ერთი რეცესიის წინაშე აღმოჩნდება. ეს კოკა-კოლას აქციებით აღფრთოვანების უმთავრესი მიზეზია.
