კენეთ გრიფინი ყველაზე მაღალშემოსავლიანი ჰეჯ-ფონდის — Citadel-ის დამფუძნებელია. მისი ქონების ღირებულება ამჟამად $35.5 მილიარდს შეადგენს და ამ მაჩვენებლით იგი მსოფლიოს უმდიდრესი ადამიანების სიაში 22-ე ადგილს იკავებს. დღეს სწორედ ამ წარმატებული ინვესტორის რჩევებს შემოგთავაზებთ.
დაიწყეთ რაც შეიძლება ადრე
კენის პირველი მთავარი გაკვეთილი ინვესტირების მაქსიმალურად ადრეულ ეტაპზე დაწყებას გულისხმობს. აღსანიშნავია, რომ თავად მან მაშინ, როდესაც ჰარვარდის ახალგაზრდა, 19 წლის სტუდენტი იყო, 1987 წელს დააარსა საკუთარი პირველი ჰეჯ-ფონდი თავის საერთო საცხოვრებელ ოთახში, ბებიისგან, მეგობრებისა და ნაცნობებისგან მიღებული თანხებით.
კენეთი ადრეული ასაკიდანვე იყო დაინტერესებული ფინანსური სამყაროთი და იქ არსებული უამრავი შესაძლებლობებით, ამიტომ მან გადაწყვიტა, მოქმედება დაეწყო რაც შეიძლება ადრე, მიუხედავად იმისა, რომ თავად ამისთვის მცირე კაპიტალი ჰქონდა.
ამის შემდეგ, კენმა დაარწმუნა ჰარვარდის ადმინისტრატორები, მისთვის ნება მიეცათ, დაეყენებინა სატელიტური ანტენა აქციების ფასების შესახებ ინფორმაციის მისაღებად. ამასთან, მან მცირე თანხებით დაიწყო ინვესტირება პატარა ფონდებში.
აქ გაკვეთილი იმაში მდგომარეობს, რომ საინვესტიციო სამყაროში შებიჯება არ გადადოთ და დაიწყოთ ინვესტირება თუნდაც მცირე თანხით. დღეს ეს ბევრად უფრო მარტივი და ხელმისაწვდომია, ვიდრე — 80-იან წლებში.
ქვემოთ მოცემულ ფოტოზე თვალსაჩინოდ ჩანს, თუ რამდენად მნიშვნელოვანია ინვესტირების ადრეულ ეტაპზე დაწყება.
დანაკარგები გარდაუვალია
ფინანსურ ბაზარზე ხანდახან ზარალს განიცდით და ეს გარდაუვალია. წარსულში ყველა ინვესტორს აქვს ასეთი გამოცდილება. 2008 წლის ფინანსური კრახის დროს კენეთ გრიფინის ფონდმა მნიშვნელოვანი ზარალი დააფიქსირა. ერთ-ერთ ინტერვიუში ინვესტორმა განაცხადა, რომ იგი ყოველდღიურად ასობით მილიონ დოლარს კარგავდა.
როგორც ინვესტორს, თქვენ უნდა გესმოდეთ, რომ ყველა ინვესტიცია წარმატებული არ გამოდგება. რაც უფრო მალე გაიაზრებთ ამას, მით უფრო მალე დაიწყებთ საინვესტიციო სამყაროში წარმატებისკენ სვლას.
იყავით მზად ცვლილებებისთვის
ნებისმიერ კარიერულ გზაზე ცვლილებები გარდაუვალია. თუ საინვესტიციო სამყაროში შეაბიჯებთ აღმოაჩენთ, რომ ეს ინდუსტრია ძალიან არის ცვლილებებზე ორიენტირებული. მაგალითად, როგორც უკვე აღვნიშნეთ, 80-იანი წლების ინვესტირება ძალიან განსხვავდება დღევანდლისგან. ასევე ძალიან მნიშვნელოვანია იმის გათვალისწინება, რომ თავად საფონდო ბირჟაზე პირობები ხშირად იცვლება. ცვლილებების მიღება და ადაპტირების უნარი კი დაგეხმარებათ, გახდეთ უკეთესი ინვესტორი.
