ოთხშაბათს, სავაჭრო დღის დასრულების შემდეგ, HP-მ მოსალოდნელზე ძლიერი კვარტალური შედეგები გამოაქვეყნა. გუშინ კი ამერიკული ტექნოლოგიური კომპანიის აქციების ფასმა 17%-ით მოიმატა და თითქმის ისტორიულ მაქსიმუმს მიაღწია. წლის დასაწყისიდან ეს მაჩვენებელი დაახლოებით 29%-ით არის გაუმჯობესებული.
კვარტალური შედეგები
ფისკალური 2024 წლის მეორე კვარტალში HP-ის შემოსავალმა $12.8 მილიარდს მიაღწია (ანალიტიკოსების პროგნოზი — $12.59 მილიარდი). მოგებამ თითო აქციაზე (EPS) კი $0.82 შეადგინა, რამაც ოდნავ გადააჭარბა უოლ სტრიტის პროგნოზს — $0.81-ს.
გასულმა კვარტალმა აჩვენა მნიშვნელოვანი გაუმჯობესება სფეროებში, რომლებშიც ეს კომპანიას ყველაზე მეტად სჭირდებოდა. კერძოდ, HP-ის ბიზნესის ძირითადი ნაწილი პერსონალურ კომპიუტერებს მოიცავს და უკვე რამდენიმე წელია, მათი გაყიდვები მცირდება. მეორე კვარტალში კი სიტუაცია შეიცვალა — კომპიუტერების გაყიდვები წლიურად 3%-ით გაუმჯობესდა.
გარდა ამისა, ზოგიერთი ინვესტორი შეშფოთებული იყო HP-ის ბალანსით, იმის გათვალისწინებით, რომ მას ჰქონდა უფრო მეტი ვალი, ვიდრე — ნაღდი ფული. თუმცა გასული წლის განმავლობაში ამ მიმართულებით კომპანიამ პროგრესი განიცადა. წინა წელს HP-ის წმინდა ვალი $8.8 მილიარდს შეადგენდა, თუმცა ახლა ეს მაჩვენებელი $7.2 მილიარდამდეა შემცირებული — ვალმა დაიკლო, ხოლო ნაღდი ფული გაიზარდა.
უფრო მეტიც, HP-მ ამ პროგრესს აქციონერების ანაზღაურების მსხვერპლად გაღების გარეშე მიაღწია. კომპანიამ განაგრძო დივიდენდის გადახდა და აქციების გამოსყიდვა. მოკლედ, მეორე კვარტლის ანგარიში საკმარისად დამამშვიდებელი იყო ინვესტორებისთვის.
ასევე შესაძლებელია, რომ ინვესტორები აღფრთოვანებულნი იყვნენ მათი ამჟამინდელი საყვარელი საინვესტიციო ტენდენციით — ხელოვნური ინტელექტით (AI). HP ხაზს უსვამს AI-ით გაძლიერებულ თავის პერსონალურ კომპიუტერებს. მენეჯმენტის თქმით, კომპანია მომხმარებლებს ხელოვნური ინტელექტით აღჭურვილი კომპიუტერების ყველაზე დიდ პორტფელს სთავაზობს.
როგორ აფასებენ ანალიტიკოსები HP-ის აქციებს?
HP-ის აქციების ამჟამინდელი ფასი დაახლოებით $38.00-ს შეადგენს. კომპანიას ამ ეტაპზე 9 ანალიტიკოსი აფასებს. საშუალო სამიზნე ფასი $34.00-ს შეადგენს, მაქსიმალური პროგნოზი — $38.00-ს, ხოლო მინიმალური — $30.00-ს. საშუალო სამიზნე ფასი HP-ის აქციების ამჟამინდელი ფასიდან დაახლოებით 11.4%-იან კლებას გულისხმობს. კომპანიის აქციებს 9 ანალიტიკოსიდან 4-მა მიანიჭა ყიდვის რეკომენდაცია, 4-მა — ნეიტრალური რეიტინგი, ხოლო 1-მა — გაყიდვის რეკომენდაცია.
HP-ის აქციების შეძენა საქართველოს ბანკის მობილბანკში შეგიძლიათ ბმულზე.
