გუშინ, ბაზრის გახსნამდე, Generac Holdings-მა მოსალოდნელზე უკეთესი კვარტალური ანგარიში წარადგინა. სავაჭრო დღის განმავლობაში კი წამყვანი ენერგეტიკული კომპანიის აქციების ფასი 14%-ზე მეტით გაიზარდა. წლის დასაწყისიდან ეს მაჩვენებელი დაახლოებით 2%-ით არის შემცირებული.
Generac-ის ძლიერი ფინანსური შედეგები, მარაგების მოცულობის შემცირებასთან ერთად, განაპირობა უფრო მაღალმა მოთხოვნამ კომპანიის გენერატორებზე.
Generac Holdings სახლებისა და კომპანიებისთვის ელექტროენერგიის მიმწოდებელ გენერატორებს აწარმოებს. ფისკალური 2023 წლის მესამე კვარტალში კომპანიის შემოსავალი წლიდან წლამდე 1.6%-ით — $1.07 მილიარდამდე გაიზარდა (ანალიტიკოსების პროგნოზი — $1.04 მილიარდი), ხოლო კორექტირებულმა EPS-მა (მოგება თითო აქციაზე) $1.64-ს მიაღწია (უოლ სტრიტის მოლოდინი — $1.55). თუმცა, GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით გამოთვლილმა EPS-მა $0.97 შეადგინა და ეს მაჩვენებელი $0.22-ით ჩამორჩა ანალიტიკოსების პროგნოზს.
ფულადმა ნაკადებმა ოპერაციებიდან $146 მილიონს მიაღწია, გასული წლის იმავე კვარტალში კი ეს მაჩვენებელი -$56 მილიონს შეადგენდა. გარდა ამისა, თავისუფალი ფულადი ნაკადები (FCF) $117 მილიონს გაუტოლდა. წინა წლის იმავე მეოთხედში FCF-მ -$76 მილიონი შეადგინა. მთლიანი მოგების მარჟა 33.2%-დან 35.1%-მდე გაიზარდა.
რაც შეეხება მომავალს, Generac-ის მენეჯმენტი მოელის, რომ კომპანიის მთელი წლის საოპერაციო და თავისუფალი ფულადი ნაკადების გამომუშავება ძლიერ დონეებს დაუბრუნდება. კომპანიაში პროგნოზირებენ, რომ კორექტირებული წმინდა შემოსავლის თავისუფალ ფულად ნაკადებად გარდაქმნის მაჩვენებელი 100%-ს გადააჭარბებს.
Generac Holdings-ის აქციების ამჟამინდელი ფასი დაახლოებით $96.00-ს შეადგენს. კომპანიას ამ ეტაპზე 22 ანალიტიკოსი აფასებს. საშუალო სამიზნე ფასი $138.90-ს შეადგენს, მაქსიმალური პროგნოზი — $175.00-ს, ხოლო მინიმალური — $78.00-ს. საშუალო სამიზნე ფასი Generac Holdings-ის აქციების ამჟამინდელი ფასიდან დაახლოებით 44.5%-იან ზრდას გულისხმობს. კომპანიის აქციებს 22 ანალიტიკოსიდან 14-მა მიანიჭა ყიდვის რეკომენდაცია, 6-მა — ნეიტრალური რეიტინგი, ხოლო 2-მა — გაყიდვის რეკომენდაცია.
