ბლუმბერგის ცნობით, რუსეთი Fitch Ratings-ის მიერ მეორე ყველაზე დაბალ დონემდე დაქვეითდა. Fitch-მა განაცხადა, რომ, უკრაინის ომის შემდეგ მიღებული ზომების შედეგად, ობლიგაციების „დეფოლტი“ გარდაუვალია.
Fitch Ratings არის საკრედიტო რეიტინგის სააგენტო, რომელიც დეფოლტის ალბათობასთან მიმართებით ინვესტიციების სიცოცხლისუნარიანობას აფასებს.
სამშაბათის განცხადებაში ნათქვამია, რომ კომპანიამ რუსეთის რეიტინგი 6 საფეხურით – C კატეგორიამდე დააქვეითა. ეს კატეგორია მხოლოდ ერთი ნაბიჯით აღემატება მსესხებლებს, რომლებიც უკვე დეფოლტამდე მივიდნენ.
განცხადებაში ასევე ნათქვამია, რომ C რეიტინგი ასახავს Fitch-ის შეხედულებას, რომ სუვერენული დეფოლტი გარდაუვალია. კომპანიის წარმომადგენლების თქმით, სანქციების შემდგომი გამკაცრება და წინადადებები, რომლებმაც შეიძლება ენერგო ვაჭრობა შეზღუდონ, ზრდის ალბათობას რუსეთის მხრიდან პოლიტიკური პასუხისა, რომელიც მისი სუვერენული ვალის მინიმუმ შერჩევით გადაუხდელობას გულისხმობს.
ამ კვირის დასაწყისში Moody’s Investors Service-მა რუსეთის რეიტინგი შეამცირა, ხოლო S&P Ratings-ის შეფასებით, ქვეყანა დეფოლტის მაჩვენებელზე 3 საფეხურით მაღლა იმყოფება.
სინგაპურის ბანკის ფიქსირებული შემოსავლის კვლევის ხელმძღვანელმა – ტოდ შუბერტმა განაცხადა, რომ მიმდინარე შეფასებები დეფოლტის მაღალ ალბათობაზე მიუთითებს. მან დასძინა, რომ Fitch-ის რეიტინგის შემცირება რუსეთის მზარდი ეკონომიკური, ფინანსური და პოლიტიკური იზოლაციის შედეგებს ასახავს.
განცხადებაში ნათქვამია, რომ განვითარებული მოვლენები, მას შემდეგ, რაც Fitch-მა ბოლოს – 6 დღის წინ შეამცირა რუსეთის რეიტინგი, კიდევ უფრო მეტად უთხრის ძირს ქვეყნის მზადყოფნას – გადაიხადოს სახელმწიფო ვალი.
რუსეთი დაგროვებულ ეკონომიკურ სანქციებს ებრძვის და ომის დაწყების შემდეგ ქვეყანას სულ უფრო მეტად იზოლირებულს ხდის. სამშაბათს შეერთებულმა შტატებმა რუსული ნავთობის იპმორტი აკრძალა.
Tellimer-ის (კვლევითი ფირმა, რომელიც სპეციალიზებულია განვითარებად ბაზრებზე) სუვერენული და ფიქსირებული შემოსავლის კვლევის ხელმძღვანელი – სტიუარტ კულვერჰაუსი წერ, რომ რუსული სუვერენული ევროობლიგაციების დეფოლტი გარდაუვალია და გარკვეული პერიოდის განმავლობაში გაგრძელდება. აღდგენის პერსპექტივები კი ბნელია.
ომის გავლენით გამოწვეული შეშფოთება სხვა მსესხებლებზეც ვრცელდება. ბლუმბერგის ინდექსის მიხედვით, მაღალი კლასის დოლარის საკრედიტო სპრედი (შემოსავლიანობის განსხვავება მსგავსი ვადიანობის, მაგრამ განსხვავებული საკრედიტო ხარისხის ობლიგაციებს შორის) სამშაბათს გაფართოვდა იმ დონემდე, რომელიც 2020 წლის შუა პერიოდის შემდეგ არ დაფიქსირებულა.
Morgan Stanley-ის ვიცე პრეზიდენტმა – საიმონ ვივერმა ორშაბათს განაცხადა, რომ რუსეთის დეფოლტი შეიძლება 15 აპრილს დადგეს, მას შემდეგ რაც 2023 წლისა და 2043 წლის დოლარის ობლიგაციების კუპონის გადახდების 30-დღიან საშეღავათო პერიოდი დაასრულდება.
