იმის ფონზე, რომ ამ კვირაში, რუსეთის თავდასხმის ქვეშ მყოფმა უკრაინამ კვლავ გვიჩვენა შთამაგონებელი სიმამაცისა და გმირობის მაგალითი, მსოფლიო ბაზრებმა გაურკვევლობისაკენ სვლა განაგრძეს. ევროპულმა ბაზრებმა მილიარდობით დოლარის ზარალი განიცადა და აშშ-ის ფონდების მმართველები მთელი ძალისხმევით ცდილობენ „ტოქსიკური“ რუსული აქციებისგან გათავისუფლებას.
მიეცით მშვიდობას შანსი
ბლუმბერგის ცნობით, 18 თებერვლიდან, მას შემდეგ, რაც აშშ-ის მთავრობამ მსოფლიო რუსეთის მიერ უკრაინაზე გარდაუვალი თავდასხმის შესახებ გააფრთხილა, ევროპის Stoxx 600 ბირჟის სიაში მყოფი, რუსეთის ბაზარზე 5%-ით ან მეტით დამოკიდებული 22 კომპანიის საბაზრო ღირებულება $100 მილიარდით შემცირდა. Renault-მა და Wizz Air-მა შემოსავლის 20%-ზე მეტი დაკარგა. თუმცა, Citigroup-ის ის ანალიტიკოსები, რომლებიც 1991 წლის სპარსეთის ყურის ომს, 2003 წლის ერაყის ომსა და 2014 წლის ყირიმის კრიზისს სწავლობენ, იტყობინებიან, რომ ომის დასრულების შემდეგ სწრაფი აღდგენის იმედი არსებობს. Stoxx 600-მა, წარსული კრიზისებიდან 12 თვეში, დაახლოებით 20%-ით მოიმატა.
მხოლოდ ამის იმედად ნუ იქნებით: ევროპაში ომისგან ყველაზე დიდ ზიანს საბანკო სექტორი განიცდის. Stoxx 600 Banks Index, 10 თებერვლის ბოლო უმაღლესი მაჩვენებლის შემდეგ, 20%-ით დაეცა. ყველაზე დიდი დარტყმა ავსტრალიურ Raiffeisen-ს მიადგა, რომელმაც ღირებულების ნახევარი დაკარგა. თუმცა BNP Paribas Wealth Management-ის მთავარმა საინვესტიციო მეთაურმა – ედმუნდ შინგმა, Bloomberg-ს განუცხადა, რომ ბაზრები რისკების ზედმეტად შეფასების პროცესში იმყოფება და ევროპული ბანკები ამ მომენტისთვის შეიძლება დაუფასებელი იყოს.
გართულებული გაყიდვა: მიუხედავად იმისა, რომ 10 თებერვლიდან, აშშ-ის S&P მხოლოდ 3%-ით შემცირდა, ხოლო Stoxx 600 – 4.3%-ით შემცირდა, უოლ სტრიტი კვლავ უნიკალური პრობლემების წინაშე დგას. Morningstar Direct-ის ცნობით, 31 იანვარს, აშშ-ის ერთობლივი ფონდები და გაცვლითი სავაჭრო ფონდები $71 მილიარდის ღირებულების რუსულ აქციებსა და ობლიგაციებს ფლობდნენ. თუმცა მოსკოვის ბირჟა მთელი კვირის განმავლობაში დაკეტილია და უცხოელებს აქციების გაყიდვა აეკრძალათ. ისინი ფაქტობრივად დაიბლოკნენ და აქტივების თავიდან მოშორების საშუალება არ გააჩნიათ. აშშ-ის ზოგიერთი ფინანსური მმართველი, რომელიც, რუსეთთან დაკავშირებულ ბიზნესს აწარმოებს, განიხილავს შესაძლებლობას, ფასიანი ქაღალდებისა და ბირჟის კომისიას (SEC) მიმართოს თხოვნით, მოხსნას 15%-იანი ლიმიტი იმ არალიკვიდურ ფასიან ქაღალდებზე, რომლის ფლობის უფლებაც მათ გააჩნიათ. The Wall Street Journal-ის ცნობით, Blackrock-მა – მსოფლიოს უდიდესმა აქტივების მმართველმა, SEC-თან არაფორმალური დისკუსიები უკვე დაიწყო.
