გუშინ, სავაჭრო დღის დაწყებამდე, Dollar Tree-მ მოსალოდნელზე სუსტი კვარტალური შედეგები გამოაქვეყნა. გარდა ამისა, მენეჯმენტმა განაცხადა, რომ Family Dollar ბრენდის გაყიდვას ან სპინოფს განიხილავს.
აღსანიშნავია, რომ ეს იყო პირველი კვარტალური ანგარიში მას შემდეგ, რაც Dollar Tree-ის მენეჯმენტმა მარტში დაახლოებით 1000 ლოკაციის დახურვის გეგმა დააანონსა.
წლის დასაწყისიდან Dollar Tree-ის აქციების ფასი დაახლოებით 17%-ით არის შემცირებული.
კვარტალური შედეგები
2024 წლის პირველ კვარტალში Dollar Tree-ის შემოსავალი წლიურად 4.2%-ით — $7.63 მილიარდამდე გაიზარდა, თუმცა ეს მაჩვენებელი ჩამორჩა ანალიტიკოსების პროგნოზს — $7.65 მილიარდს.
Dollar Tree-ის წმინდა მოგებამ $300.1 მილიონი შეადგინა, ანუ მოგება თითო აქციაზე (EPS) $1.38 იყო, რაც ასევე ჩამოუვარდება უოლ სტრიტის მოლოდინს — $1.43-ს.
მარტში Dollar Tree-ის მენეჯმენტმა განაცხადა, რომ ფისკალური 2024 წლის პირველ ნახევარში Family Dollar-ის 600 ლოკაციის, ხოლო დამატებით 370 მაღაზიის შემდეგი რამდენიმე წლის განმავლობაში დახურვას აპირებდა. პირველი კვარტლის ბოლოსთვის კი კომპანიის წარმომადგენლებმა განაცხადეს, რომ 550 ლოკაცია დახურეს და ფისკალური წლის ბოლოსთვის კიდევ 150 მაღაზიის გაუქმება იგეგმება.
მომავლის პროგნოზები
რაც შეეხება მომავალს, Dollar Tree-ის მენეჯმენტი მოელის, რომ მიმდინარე კვარტალში შემოსავალი $7.3-$7.6 მილიარდს მიაღწევს. შედარებისთვის, ანალიტიკოსების პროგნოზი $7.58 მილიარდს შეადგენს. კომპანიაში ასევე მოელიან, რომ კორექტირებული EPS $1-$1.10-ს მიაღწევს (უოლ სტრიტის პროგნოზი — $1.16).
Dollar Tree-ის ბიზნესზე ასევე იმოქმედა სადისტრიბუციო ცენტრის დაკარგვამ მარიეტაში, ოკლაში, რომელიც აპრილის ბოლოს ტორნადოს გამო განადგურდა. მენეჯმენტმა განაცხადა, რომ ამ ბუნებრივი კატასტროფის გამო კომპანიამ $117 მილიონის მოცულობის ზარალი განიცადა.
Family Dollar-ის პოტენციური გაყიდვა ან სპინოფი
გუშინ Dollar Tree-ის წარმომადგენლებმა ასევე განაცხადეს, რომ შეძენიდან თითქმის 10 წლის შემდეგ, Family Dollar-ის ბრენდის გაყიდვას ან სპინოფს განიხილავენ.
„ჩვენი მიზანია, მოვახერხოთ როგორც Dollar Tree-ის, ისე Family Dollar-ის პოზიციონირება სწრაფი პროგრესისთვის და განვსაზღვროთ, მოუტანს თუ არა ექსკლუზიური გუნდის ჩამოყალიბება თითოეულ ბრენდს სარგებელს. ამასთან რამდენად შექმნის ეს ნაბიჯი ფასეულობას Dollar Tree-ის აქციონერებისთვის და სხვა დაინტერესებული მხარეებისთვის“ — განაცხადა კომპანიის აღმასრულებელმა დირექტორმა, რიკ დრეილინგმა.
როგორ აფასებენ ანალიტიკოსები Dollar Tree-ის აქციებს?
Dollar Tree-ის აქციების ამჟამინდელი ფასი დაახლოებით $115.00-ს შეადგენს. ამ ეტაპზე კომპანიას უოლ სტრიტის 18 ანალიტიკოსი აფასებს. საშუალო სამიზნე ფასი $151.29-ს შეადგენს, მაქსიმალური პროგნოზი — $180.00-ს, ხოლო მინიმალური — $109.00-ს. საშუალო სამიზნე ფასი Dollar Tree-ის აქციების ამჟამინდელი ფასიდან დაახლოებით 32%-იან ზრდას გულისხმობს. კომპანიის აქციებს ამ 18 ანალიტიკოსიდან 12-მა მიანიჭა ყიდვის რეკომენდაცია, 5-მა — ნეიტრალური რეიტინგი, ხოლო 1-მა — გაყიდვის რეკომენდაცია.
Dollar Tree-ის აქციების შეძენა საქართველოს ბანკის მობილბანკში შეგიძლიათ ბმულზე.
