გუშინ, ბაზრის დახურვის შემდეგ, Disney-მ კვარტალური ანგარიში წარადგინა. სავაჭრო საათების შემდეგ კი გასართობი ინდუსტრიის კომპანიის აქციების ფასი 6%-ზე მეტით გაიზარდა. გასული წლის განმავლობაში ეს მაჩვენებელი დაახლოებით 4%-ით გაუმჯობესდა.
Disney-ის კვარტალურმა შემოსავალმა $23.5 მილიარდი შეადგინა (ანალიტიკოსების პროგნოზი — $23.75 მილიარდი), ხოლო კორექტირებულმა მოგებამ თითო აქციაზე (EPS) $1.22-ს მიაღწია (პროგნოზი — $1). ბუღალტრული აღრიცხვის საყოველთაოდ აღიარებული პრინციპების (GAAP) მიხედვით გამოთვლილი EPS კი $1.04 იყო და ამ მაჩვენებელმა უოლ სტრიტის პროგნოზს $0.16-ით გადააჭარბა.
გარდა ამისა, Disney-ის მენეჯმენტმა განაცხადა, რომ კომპანია $1.5 მილიარდის მოცულობის ინვესტიციას ჩადებს ვიდეო თამაშ Fortnite-ის გამომშვებ Epic Games-ში.
განცხადებაში, რომელიც გუშინ, კომპანიის კვარტალურ ანგარიშთან ერთად გამოქვეყნდა, ნათქვამია, რომ ორი ფირმა ერთად იმუშავებს გეიმინგ სამყაროს შესაქმნელად, რომელიც დისნეის პერსონაჟებსა და ისტორიებს გამოიყენებს. ეს გეიმინგ გამოცდილება დაკავშირებულია Epic-ის პოპულარულ საბრძოლო თამაშთან — Fortnite-თან.
Disney-ის აღმასრულებელი დირექტორის — ბობ აიგერის თქმით, კომპანია ამ ნაბიჯს დგამს, რადგან ახალგაზრდა თაობები დროის დიდ ნაწილს ვიდეო თამაშებთან ატარებენ. „ჩვენ ვფიქრობთ, რომ შეგვიძლია ეს მიმართულება მომგებიან ბიზნესად ვაქციოთ“ — დასძინა მან.
ამ ორმა კომპანიამ წარსულშიც ითანამშრომლა, როდესაც მარველისა და ვარსკვლავური ომების პერსონაჟები Fortnite-ში გამოჩნდნენ.
ხარჯების შემცირება მოგებას აძლიერებს
ბობ აიგერმა განაცხადა, რომ დისნეის ხარჯების შემცირების ინიციატივები იყო ძირითადი მიზეზი, რამაც კომპანიის ძლიერი მოგება განაპირობა. მისი თქმით, ხარჯების შემცირების სტრატეგიამ, რომელიც Disney-მ ერთი წლის წინ დანერგა, გასულ კვარტალზე $500 მილიონის ოდენობით დადებითი გავლენა იქონია. ბობმა აღნიშნა, რომ Disney გასულ წელს დასახულ მიზანს მიაღწევს და ხარჯების $7.5 მილიარდზე მეტით შემცირებას შეძლებს.
ბოლო პერიოდში ბობ აიგერი აქტივისტი ინვესტორის — ნელსონ პელცის და მისი Trian Fund Management-ის ზეწოლის ქვეშ მოექცა. პელცმა, რომელიც მიზნად ისახავს კომპანიის დირექტორთა საბჭოში გაწევრიანებას, დისნეის ყოფილ ფინანსურ დირექტორთან — ჯეი რასულოსთან ერთად გააკრიტიკა კომპანიის ფინანსური მდგომარეობა და აქციების წარმადობა. მათ ეს მდგომარეობა საბჭოს სტრატეგიულ შეცდომებს მიაწერეს.
აღმასრულებელმა დირექტორმა განაცხადა, რომ პელცთან საუბარს არ აპირებს. „უკანასკნელი, რაც ახლა გვჭირდება, არის ჩვენი დროისა და ენერგიის დახარჯვა იმ აქტივისტების მიერ, რომლებსაც, გულწრფელად გითხრათ, სრულიად განსხვავებული დღის წესრიგი აქვთ და ჩვენი კომპანიის არსი არ ესმით“ — თქვა მან.
ექსპანსია
Disney-ის აღმასრულებელმა დირექტორმა ასევე ხაზი გაუსვა ახლახან დაანონსებულ სპორტულ სტრიმინგ პარტნიორობას, რომელიც კომპანიის ESPN-ის განყოფილებამ გააფორმა Fox-თან და Warner Bros. Discovery-სთან.
ამ სიახლესთან დაკავშირებით ბობ აიგერმა განაცხადა: „ეს იყო ნაბიჯი, რომელიც უნდა გადაგვედგა ამჟამინდელი მრავალარხიანი ეკოსისტემის და იმის გათვალისწინებით, თუ რა სურთ სპორტის გულშემატკივრებს“.
აიგერის თქმით, დისნეი საკაბელო ტელევიზიის ერთგულია და ეს ბიზნესი მომგებიანი რჩება. „მაგრამ ჩვენ ასევე უნდა გვახსოვდეს, სად არის მომხმარებელი ახლა და როგორია მომავალი“ — დასძინა მან.
ანალიტიკოსების შეფასებები
Disney-ის აქციების ამჟამინდელი ფასი დაახლოებით $99.00-ს შეადგენს. კომპანიას ამ ეტაპზე უოლ სტრიტის 16 ანალიტიკოსი აფასებს. საშუალო სამიზნე ფასი $108.71-ს შეადგენს, მაქსიმალური პროგნოზი — $120.00-ს, ხოლო მინიმალური — $88.00-ს. საშუალო სამიზნე ფასი Disney-ის აქციების ამჟამინდელი ფასიდან დაახლოებით 9.7%-იან ზრდას წარმოადგენს. კომპანიის აქციებს 16 ანალიტიკოსიდან 12-მა მიანიჭა ყიდვის რეკომენდაცია, 4-მა — ნეიტრალური რეიტინგი და არცერთმა — გაყიდვის რეკომენდაცია.
Disney-ის აქციების შეძენა საქართველოს ბანკის მობილბანკში შეგიძლიათ ბმულზე.
