ბლუმბერგის ცნობით, ჩინური ტექნოლოგიური კომპანიების აქციების ულმობელი გაყიდვა ორშაბათსაც გაგრძელდა, რადგან პეკინის მჭიდრო ურთიერთობა რუსეთთან რისკის შემცველია აქ არსებული კომპანიებისთვის, რომლებიც განახლებული მარეგულირებელი წინააღმდეგობებით უკვე დაზარალდა.
დილის ვაჭრობაში Hang Seng Tech ინდექსი 8%-ზე მეტით დაეცა. Golden Dragon ინდექსი, რომელიც ჩინური ფირმების ამერიკულ სადეპოზიტო ქვითრებს (ADR) მიჰყვება, გასულ კვირას, ზედიზედ ორ დღეში 10%-ით შემცირდა. ეს ინდექსის 22-წლიანი არსებობის მანძილზე არასოდეს მომხდარა.
ამგვარი დაცემა მოჰყვა მოხსენებას, იმის შესახებ, რომ რუსეთმა ჩინეთს უკრაინაში ომისთვის სამხედრო დახმარება სთხოვა. მოვაჭრეები შიშობენ, რომ ვლადიმირ პუტინთან დაკავშირებით პეკინის ნებისმიერმა პოტენციურმა ინიციატივამ შეიძლება ჩინური ფირმების წინააღმდეგ გამოიწვიოს გლობალური რეაქცია, თუნდაც სანქციები.
გარდა ამისა, გასულ კვირას აშშ-ის ფასიანი ქაღალდებისა და ბირჟის კომისიამ დაასახელა ჩინური კომპანიების აქციების პირველი ნაკრები, როგორც უცხურ ფირმებზე ზეწოლის ნაწილი, რადგან ისინი აშშ-ის მარეგულირებლისთვის საანგარიშო წიგნის გახსნაზე უარს აცხადებენ. ასევე კოვიდ-19-ის მზარდი გავრცელება და შენჟენის ტექნოლოგიური ცენტრის ჩაკეტვა შემოსავლების პერსპექტივას ანელებს.
Power Pacific Investment Management-ის მთავარმა საინვესტიციო ოფიცერმა – ჯუნ ლიმ განაცხადა, რომ ამ ეტაპზე ტექნოლოგიური სივრცე კვლავ დაუცველია. მან ასევე დასძინა, რომ ფირმა ჩინურ ADR-ებს თავს არიდებს, რადგან ამ ეტაპზე რისკის პროფილის შეფასება ძალიან რთულია.
ორშაბათს Hang Sang ინდექსი 4.1%-ით დაეცა, ხოლო ჩინეთის საორიენტაციო ინდექსი – CSI 300 2%-ით შემცირდა. გარდა ამისა, ჩინური იუანი ბოლო ერთი თვის ყველაზე სუსტ ნიშნულამდე ჩამოვიდა, რადგან ჩინეთის აქტივების მიმართ განწყობა გაუარესდა.
Hang Sang და Golden Dragon ინდექსები მაქსიმალური მაჩვენებლებიდან 60%-ით დაეცა. ორშაბათს Alibaba Group Holding Ltd.-ის აქციების ფასი ჰონგ-კონგში 8.4%-ით შემცირდა, ხოლო Tencent Holdings Ltd., რომლის სათაო ოფისიც შენჟენში მდებარეობს, 4%-ზე მეტით დაეცა.
ამ ყველაფრის ფონზეც კი, ტრეიდერები 22 თებერვლიდან, ყოველ სესიაზე ყიდულობენ ჰონგ-კონგის აქციებს საფონდო კავშირის საშუალებით, თუმცა ეს, აქციების ფასის შესანარჩუნებლად საკმარისი არ არის.
ტექნოლოგიური აქციების ფასები ისტორიული ვარდნა იმედს უცრუებს ჩინეთის „ხარებს“ (ინვესტორები, რომლებიც ყიდულობენ აქციებს, რადგან თვლიან, რომ მომავალში მათი ფასები გაიზრდება), რომელთა რიცხვი გაიზარდა წელს, როდესაც, ჩინეთის სახალხო ბანკის პოლიტიკის შემსუბუქების ფონზე, სტრატეგები ფსონს ფასების ზრდაზე დებდნენ.
Goldman Sachs Group Inc.-ის სტრატეგებმა ჩინეთის აქციების მიმართ ოპტიმიზმი ოდნავ შეარბილეს და MSCI China ინდექსის შეფასება შეამცირეს.
2021 წლის თებერვლის პიკთან შედარებით, MSCI China ინდექსის შეფასება განახევრდა. მისი აქციების ღირებულება ამჟამად დაახლოებით 9-ჯერ აღემატება 12-თვიან პროგნოზირებულ მოგებას. ზოგიერთ სტრატეგს ახლა ჩინეთის აქციების შესაძენად კარგი შესაძლებლობა აქვს.
Morningstar Investment Management Asia Ltd.-ის ანალიტიკოსმა – ივან სუმ განაცხადა, რომ შეფასებები ისტორიულ მინიმუმზეა და ინვესტორებისთვის ეს კარგი შესვლის პუნქტებია. მან დასძინა, რომ კლება, რომელსაც ჰონგ-კონგში ვხედავთ, მხოლოდ სენტიმენტებთან არის დაკავშირებული და საბოლოო ჯამში, ძირითად ბიზნესში ძირეულად არაფერი შეცვლილა.
