გასული წლის განმავლობაში, მრავალი სექტორი დაზარალდა, რადგან ინფლაციამ, საპროცენტო განაკვეთების ზრდამ და სხვა მაკრო წინაღობებმა ინვესტორებს მზარდი პოტენციალის აქციებიდან რეცესიისადმი უფრო მდგრად საინვესტიციო შესაძლებლობებზე გადასვლა აიძულა. ერთ-ერთი უსაფრთხო თავშესაფარი იყო ფუფუნების საქონლის სექტორი, რადგან შეძლებული მომხმარებლები ზოგადად უკეთ არიან ეკონომიკური ვარდნისგან იზოლირებულნი, ვიდრე მათი დაბალი შემოსავლის მქონე და საშუალო კლასის კოლეგები.
LVMH და Richemont ამ გამძლე ინდუსტრიის ორი ლიდერია. LVMH-ის ევროპული აქციების ფასი წელს მხოლოდ 3%-ით შემცირდა, ხოლო Richemont-ის — დაახლოებით 16%-ით. ორივე აქციამ ადვილად აჯობა ძირითადი ინდექსების bear ბაზრით გამოწვეულ ვარდნას. უნდა შეიძინონ თუ არა ინვესტორებმა დღეს რომელიმე ამ აქციებიდან?
საკვანძო განსხვავებები LVMH-სა და Richemont-ს შორის
პარიზში დაფუძნებული LVMH მსოფლიოში ყველაზე დიდი ფუფუნების კომპანიაა. ის ფლობს 75 ბრენდს ხუთ კატეგორიაში — ღვინოები და ალკოჰოლური სასმელები, მოდა და ტყავი, სუნამოები და კოსმეტიკა, საათები და სამკაულები და შერჩევითი საცალო ვაჭრობა. მის საუკეთესო ბრენდებს შორისაა Louis Vuitton, Dior, Loewe, Fendi, Tiffany, Bulgari და Sephora. 2022 წლის პირველ ცხრა თვეში LVMH-მა შემოსავლის 49% მოდის და ტყავის ნაწარმის სეგმენტიდან გამოიმუშავა. დანარჩენი ნაწილი მის შერჩევით საცალო ვაჭრობის (18%), საათებისა და სამკაულების (13%), სუნამოებისა და კოსმეტიკის (10%), ღვინისა და ალკოჰოლური სასმელების (9%) სეგმენტებზე გადანაწილდა.
Richemont, რომელიც შვეიცარიაშია დაფუძნებული, LVMH-ზე მნიშვნელოვნად მცირეა. ის ფლობს 26 ძირითად ბრენდს, მათ შორის არის Cartier, Chloé, Dunhill, Jaeger-LeCoultre, Montblanc, Piaget და Van Cleef & Arpels. 2023 ფისკალური წლის პირველ ნახევარში, რომელიც 30 სექტემბერს დასრულდა კომპანიამ შემოსავლის 87% სამკაულებიდან (66%) და საათების ბრენდებიდან (21%) გამოიმუშავა. დანარჩენი 13% მოდის და აქსესუარების ბრენდებზე, საათების კომპონენტებზე, უძრავი ქონების ინვესტიციებზე და სხვა მცირე ბიზნესებზე მოდის.
ამიტომ, LVMH არის ყოვლისმომცველი არჩევანი ინვესტორებისთვის, რომელთაც ფუფუნების ბაზრების ფართო სპექტრზე წვდომის მიღწევა სურთ. Richemont შესაძლოა უკეთესი იყოს ინვესტორებისთვის, რომელთა მიზანი მაღალი კლასის სამკაულებისა და შვეიცარიული საათების ბაზრებზე ფოკუსირებაა.
რომელი კომპანია იზრდება უფრო ჩქარა?
პანდემიის დროს, როგორც LVMH, ასევე Richemont დაზარალდა, რადგან ფიზიკური მაღაზიები დაიხურა, ამასთან გლობალური მოგზაურობა და ტურიზმი შეჩერდა. თუმცა, ორივე კომპანიის მდგომარეობა სწრაფად გაუმჯობესდა, რადგან ეს წინააღმდეგობები შემცირდა.
2020 წელს LVMH-ის შემოსავალი 17%-ით დაეცა. მისი ხუთივე ძირითადი ბიზნესის შემოსავალი შემცირდა, მაგრამ მისი სპეციალიზებული საცალო ბიზნესი ყველაზე უარეს მდგომარეობაში აღმოჩნდა, რადგან კომპანია Sephora და დაუბეგრავი საქონლის მაღაზიები დახურა. LVMH-ის წმინდა მოგება 34%-ით დაეცა.
თუმცა 2021 წელს, LVMH-ის შემოსავალი და წმინდა მოგება, შესაბამისად, 20%-ით და 68%-ით გაიზარდა, რაც მისი მოდისა და ტყავის ნაწარმის, ასევე საათებისა და სამკაულების სეგმენტების დაჩქარებული ზრდით იყო გამოწვეული. 2022 წლის პირველ ცხრა თვეში, კომპანიის შემოსავალი წლიდან წლამდე კიდევ 20%-ით გაიზარდა, რაც ხუთივე ბიზნეს განყოფილებაში ორნიშნა ზრდამ განაპირობა.
LVMH-ის ზრდა ჩინეთში, ნულოვანი COVID-19 პოლიტიკის ფონზე, ნელია, მაგრამ კომპანიამ ეს შენელება დიდწილად შეერთებულ შტატებში, ევროპასა და იაპონიაში გაყიდვების ძლიერი ზრდით აანაზღაურა. ანალიტიკოსები პროგნოზირებენ, რომ მთელი წლის განმავლობაში კომპანიის შემოსავალი და წმინდა მოგება, შესაბამისად, 23%-ით და 22%-ით, გაიზრდება.
ფისკალურ 2021 წელს, რომელიც 2021 წლის მარტში დასრულდა, Richemont-ის შემოსავალი 8%-ით შემცირდა, მაგრამ წლის მეორე ნახევარში მისი ძირითადი სამკაულებისა და საათების სეგმენტი სწრაფად აღდგა (განსაკუთრებით ჩინეთში). კომპანიის წმინდა მოგება 38%-ით გაიზარდა, მაგრამ ეს ზრდა, საოპერაციო მოგების ნაცვლად (რომელიც წლის განმავლობაში 3%-ით დაეცა), ძირითადად ერთჯერადი შეღავათებით იყო განპირობებული.
ფისკალურ 2022 წელს Richemont-ის შემოსავალი და წმინდა მოგება, შესაბამისად, 46%-ით და 61%-ით გაიზარდა, რაც კომპანიის ყველა ბიზნეს სეგმენტსა და რეგიონში გაყიდვების მაღალი ორნიშნა ზრდით არის განპირობებული. ფისკალური 2023 წლის პირველ ნახევარში Richemont-ის შემოსავალმა წლიდან წლამდე კიდევ 24%-ით მოიმატა, რადგან ევროპასა და ამერიკაში მისმა ძლიერმა ზრდამ ჩინეთში პანდემიით გამოწვეული შენელება აანაზღაურა.
ამ პერიოდის განმავლობაში Richemont-მა დააფიქსირა წმინდა ზარალი მას შემდეგ, რაც მან იტალიური ონლაინ მოდის საცალო ვაჭრობის კომპანიაში — YNAP-ში თავისი წილი Farfetch-ს მიჰყიდა. ამ დივესტიციის (ბიზნესის ან ინვესტიციების გაყიდვა) გამოკლებით, მისი წმინდა მოგება მუდმივი ოპერაციებიდან მაინც 40%-ით გაიზარდა.
ანალიტიკოსები ვარაუდობენ, რომ მთელი წლის განმავლობაში Richemont-ის შემოსავალი მხოლოდ 2%-ით გაიზრდება, რადგან პოსტ-პანდემიურ აღდგენასთან შედარებით კომპანიის ზრდა შენელდება. მაგრამ ისინი მაინც ელიან, რომ Richemont-ის მოგება უწყვეტი ოპერაციებიდან უზარმაზარი 75%-ით მოიმატებს.
შეფასებები და ვერდიქტი
თითოეული აქცია, ზრდის ტემპებთან შედარებით, ჯერ კიდევ გონივრულად არის შეფასებული. LVMH-ისა და Richemont-ის აქციების ფასი მომავალი წლის EPS-ს (მოგება თითო აქციაზე), შესაბამისად, 24-ჯერ და 17-ჯერ აღემატება. Richemont თავდაპირველად შეიძლება უფრო იაფი ჩანდეს, მაგრამ ის (შთამბეჭდავი პოსტ-პანდემიურ აღდგენის გამოკლებით) ისტორიულად უფრო ნელი ტემპით გაიზარდა, ვიდრე LVMH. გარდა ამისა, LVMH უკეთ არის დივერსიფიცირებული ვიდრე Richemont.
