გუშინ Apple-მა გამოიყენა თავისი Scary Fast ღონისძიება, რათა დაეანონსებინა კომპიუტერების განახლებული ხაზი, რომელიც კომპანიის შემდეგი თაობის M3 ჩიპებით არის აღჭურვილი. გუშინ, სავაჭრო დღის განმავლობაში, ტექნოლოგიური გიგანტის აქციების ფასი 1%-ზე მეტით გაიზარდა. წლის დასაწყისიდან ეს მაჩვენებელი დაახლოებით 11%-ით არის გაუმჯობესებული.
ღონისძიებას უძღვებოდა Apple-ის აღმასრულებელი დირექტორი — ტიმ კუკი, რომელიც პირდაპირ ეთერში კუპერტინოში, კალიფორნიაში მდებარე შტაბ-ბინიდან ჩაერთო. ახალი M3 ჩიპების დაანონსების შემდეგ, კუკს შეუერთდა მთავარი საოპერაციო ოფიცერი — ჯეფ უილიამსი, რომელმაც, M3-ზე მომუშავე Mac Mini-სთან ერთად, ახალი MacBook Air წარადგინა და მას უწოდა „ყველაზე სწრაფი არა-Pro ლეპტოპი, რომელიც Apple-ს ოდესმე გამოუშვია“. ტიმ კუკმა დააანონსა ახალი 28 დიუმიანი iMac-ისა და MacBook Pro-ის გამოშვება, რომლებიც უფრო მაღალი ხარისხის M3 Pro ან M3 Max ჩიპებით არის ხელმისაწვდომი.
ახალი მოდელების ფასები მერყეობს $649-დან ახალი Mac mini-სთვის, $1599-მდე 14″ და 16″ MacBook Pro-ებისთვის, რომლებიც ბაზარზე ერთი თვის შემდეგ იქნება ხელმისაწვდომი. Apple-ის შემდეგი თაობის GPU-ების მეხსიერება 24-128 GB-ის (გიგაბაიტი) დიაპაზონში მერყეობს. Apple-მა საკუთარი შიდა M1 ნახევარგამტარული ჩიპი პირველად 2020 წელს გამოუშვა, რითაც დაასრულა ხანგრძლივი პარტნიორობა ჩიპების მწარმოებელ Intel-თან.
ახალი Mac ხაზის გამოშვება ხდება Apple-ის ახალი iPhone 15-ის გაყიდვაში ჩაშვებიდან ერთი თვის შემდეგ. ამ კვირაში Bloomberg-მა წარმოადგინა მონაცემთა ანალიტიკისა და რეკომენდაციების გლობალური ლიდერის — GfK-ის მონაცემები, რომლებიც გვიჩვენებს, რომ კომპანიის გაყიდვები ჩინეთში, Apple-ის საკვანძო საერთაშორისო ბაზარზე, იმედგამაცრუებელია შიდა კონკურენტის — Huawei-ს აღორძინების გამო.
აღსანიშნავია, რომ სექტემბერში Wall Street Journal-ის (WSJ) მიერ გავრცელებული ინფორმაციის მიხედვით, ჩინეთის მთავრობის განკარგულების თანახმად, ცენტრალურ სამთავრობო უწყებებში მომუშავე ოფიციალურმა პირებმა არ უნდა გამოიყენონ iPhone-ები (ან სხვა უცხოური ბრენდის მოწყობილობები) სამუშაოდ და ისინი ოფისშიც კი არ უნდა მიიტანონ. შემდეგ კი Bloomberg-მა განაცხადა, რომ ეს აკრძალვები გავრცელდა სახელმწიფოს მიერ მხარდაჭერილ ფირმებზეც, მათ შორის ენერგეტიკულ გიგანტზე — PetroChina-ზე, რომელიც მილიონობით თანამშრომელს აერთიანებს და ჩინეთის ეკონომიკის დიდ ნაწილს აკონტროლებს.
WSJ-ის ვარაუდით, შესაძლოა, მთავრობა მიზნად ისახავს, უცხოურ კომპანიებს ჩინეთიდან „სენსიტიური ინფორმაციის“ მოპოვების შესაძლებლობები შეუზღუდოს. მიზანი ასევე შეიძლება იყოს ადგილობრივი მწარმოებლების მოწყობილობების გამოყენების ხელშეწყობა.
Apple კვარტალურ ანგარიშს მიმდინარე კვირაში, ხუთშაბათს, სავაჭრო დღის დასრულების შემდეგ წარადგენს. უოლ სტრიტის ანალიტიკოსები მოელიან, რომ ტექნოლოგიური გიგანტის კვარტალური შემოსავალი $89.37 მილიარდს მიაღწევს, ხოლო EPS (მოგება თითო აქციაზე) — $1.39-ს.
Apple-ის აქციების ამჟამინდელი ფასი დაახლოებით $170.00-ს შეადგენს. ამ ეტაპზე კომპანიას უოლ სტრიტის 31 ანალიტიკოსი აფასებს. საშუალო სამიზნე ფასი $203.35-ს შეადგენს, მაქსიმალური პროგნოზი — $240.00-ს, ხოლო მინიმალური — $150.00-ს. საშუალო სამიზნე ფასი Apple-ის აქციების ამჟამინდელი ფასიდან დაახლოებით 19.4%-იან ზრდას გულისხმობს. კომპანიის აქციებს ამ 31 ანალიტიკოსიდან 22-მა მიანიჭა ყიდვის რეკომენდაცია, 9-მ — ნეიტრალური რეიტინგი და არცერთმა — გაყიდვის რეკომენდაცია.
