დღეს Advanced Micro Devices-ის (AMD) მენეჯმენტი აპირებს, წარადგინოს თავისი უახლესი ჩიპი, რომელიც ხელოვნური ინტელექტის (AI) სისტემების გასაძლიერებლად არის შექმნილი. ეს ნაბიჯი ჩიპების მწარმოებელს დაეხმარება, AI ბუმის პირობებში კონკურენცია გაუწიოს Nvidia-ს.
კომპანიამ დღეს, AMD “Advancing AI” ღონისძიებაზე უნდა წარადგინოს Instinct MI300, მონაცემთა ცენტრის გრაფიკული დამუშავების ერთეულის (GPU) აქსელერატორი. AMD-ის წარმომადგენლების თქმით, ახალი AI ჩიპის დაანონსებასთან ერთად, ისინი ისაუბრებენ AI მიმართულებით კომპანიის მზარდი იმპულსის შესახებ.
AMD-ს მენეჯმენტმა ადრე განაცხადა, რომ, მათი მოლოდინით, 2024 წელს MI300-ის გაყიდვები კომპანიას $2 მილიარდს მოუტანს.
Wedbush Securities-ის ანალიტიკოსებმა სამშაბათს განაცხადეს, რომ ღონისძიებაზე AMD-ს წარმომადგენლებს შეუძლიათ, კომპანიის ახალი MI300 ჩიპის შესაძლებლობები Nvidia-ს H100-ს შეადარონ.
საინვესტიციო ბანკის — Jefferies-ის ანალიტიკოსების ანალიზის მიხედვით, Nvidia, AMD-ის ერთ-ერთი მთავარი კონკურენტი, ბაზარზე შესანიშნავი პოზიციონირებით გამოირჩევა და AI ბუმის გამო მისი საბაზრო წილი 80%-მდე გაიზარდა.
![](https://investhub.ge/wp-content/uploads/2023/12/AMD-Stock.png)
Nvidia-მ გასულ თვეში წარადგინა თავისი უახლესი გრაფიკული დამუშავების ერთეული — H200, რომელიც ასევე ხელოვნური ინტელექტის (AI) სისტემების გასაძლიერებლად არის შექმნილი. თუმცა ნოემბერში ასევე გავრცელდა ინფორმაცია, რომ ნახევარგამტარების მწარმოებელი აჭიანურებს ჩინეთისთვის ახალი ხელოვნური ინტელექტის (AI) იმ ჩიპის გამოშვებას, რომელიც აშშ-ის ექსპორტის უახლეს შეზღუდვებს შეესაბამება. შეფერხება სერვერის შემქმნელის ინტეგრაციის საკითხებთან არის დაკავშირებული.
Wedbush-ში ვარაუდობენ, რომ, შესაძლოა, AMD-ის ღონისძიებაში ჩართული იყოს Microsoft, რადგან ტექნოლოგიური გიგანტის წარმომადგენლებმა უკვე განაცხადეს, რომ კომპანია თავის ქლაუდ გამოთვლით სეგმენტს — Azure-ს AMD-ის ახალ ჩიპს Azure-ს დაამატებს.
Wedbush-ის ანალიტიკოსებმა განაცხადეს, რომ AMD-ს შეუძლია ისარგებლოს მომავალი ზრდით, რომელიც მისი ამჟამინდელი AI ინვესტიციებით იქნება განპირობებული.
Jefferies-ის ანალიტიკოსებმა კი აღნიშნეს, რომ MI300 ჩიპის გამოშვებით, AMD ხდება ერთ-ერთი საუკეთესო საინვესტიციო შესაძლებლობა Nvidia-სთან ერთად.
![](https://investhub.ge/wp-content/uploads/2023/12/Nvidia-Stock-1.png)
მიმდინარე წლის განმავლობაში AMD-ის აქციების ფასი დაახლოებით 85%-ით არის გაუმჯობესებული, ხოლო Nvidia-სი — 225%-ზე მეტით.
AMD-ის აქციების ამჟამინდელი ფასი დაახლოებით $118.40-ს შეადგენს. კომპანიას ამ ეტაპზე 29 ანალიტიკოსი აფასებს. საშუალო სამიზნე ფასი $126.79-ს შეადგენს, მაქსიმალური პროგნოზი — $150.00-ს, ხოლო მინიმალური — $98.00-ს. საშუალო სამიზნე ფასი AMD-ის აქციების ამჟამინდელი ფასიდან დაახლოებით 7%-იან ზრდას გულისხმობს. კომპანიის აქციებს 29 ანალიტიკოსიდან 22-მა მიანიჭა ყიდვის რეკომენდაცია, 7-მა — ნეიტრალური რეიტინგი და არცერთმა — გაყიდვის რეკომენდაცია.
Nvidia-ს აქციების ამჟამინდელი ფასი დაახლოებით $466.00-ს შეადგენს. კომპანიას ამ ეტაპზე 34 ანალიტიკოსი აფასებს. საშუალო სამიზნე ფასი $661.00-ს შეადგენს, მაქსიმალური პროგნოზი — $1,100.00-ს, ხოლო მინიმალური — $560.00-ს. საშუალო სამიზნე ფასი Nvidia-ს აქციების ამჟამინდელი ფასიდან დაახლოებით 42%-იან ზრდას გულისხმობს. კომპანიის აქციებს 34 ანალიტიკოსიდან 31-მ მიანიჭა ყიდვის რეკომენდაცია, 3-მა — ნეიტრალური რეიტინგი და არცერთმა — გაყიდვის რეკომენდაცია.