ხელოვნური ინტელექტი (AI) კვლავაც რჩება მრავალი ინვესტორისთვის საინტერესო ტექნოლოგიად, რომლებიც იმედოვნებენ, რომ AI-ის ათვისება მათ პორტფელებში არსებულ კომპანიებს სარგებელს მოუტანს. სწორედ ამ შემთხვევასთან გვქონდა გუშინ საქმე, როდესაც Snap-ის (SNAP) აქციების ფასი 3%-ზე მეტით გაიზარდა. შედარებისთვის, ეს აღმასვლა ბევრად აღემატებოდა S&P 500 ინდექსის გუშინდელ წარმადობას — 0.25%-ს.
წლის დასაწყისიდან კი სოციალური მედიის კომპანიის აქციების ფასი დაახლოებით 34%-ით არის შემცირებული.
გრძელვადიანი პარტნიორობა და AI
გუშინ, ბაზრის გახსნამდე, Alphabet-ის (GOOG) (GOOGL) Google Cloud-ის განყოფილების წარმომადგენლებმა განაცხადეს, რომ Snap-თან გააფართოვეს არსებული სტრატეგიული პარტნიორობა, რათა ამ უკანასკნელის „My AI“ ჩეთბოტისთვის ხელოვნური ინტელექტის ფუნქციები უზრუნველყონ.
გაფართოებული გარიგების პირობების თანახმად, სოციალური მედიის ფუნდამენტური პროდუქტი — Snapchat, „My AI“-ის ფუნქციონირების გასაუმჯობესებლად, გამოიყენებს Google-ის უახლესი Gemini AI ჩეთბოტის ტექნოლოგიას.
Google Cloud-ში განაცხადეს, რომ Snap განსაკუთრებით ისარგებლებს „ტექნოლოგიის უნარით, გააანალიზოს და დაამუშაოს სხვადასხვა ტიპის ინფორმაცია, როგორიცაა ტექსტი, აუდიო, სურათი, ვიდეო და კოდი. შედეგად, კომპანია Snapchat საზოგადოებას უფრო მიმზიდველ და ინოვაციურ ფუნქციებს შესთავაზებს“.
Snap-ს და Alphabet-ს პარტნიორობის საკმაოდ ხანგრძლივი ისტორია აკავშირებთ. აღსანიშნავია, რომ Snapchat 2011 წელს სწორედ Google Cloud-ის საშუალებით ამოქმედდა.
ინოვაცია მომხმარებლის ჩართულობის გასაძლიერებლად
Google Cloud-ის წარმომადგენლებს გაფართოებული თანამშრომლობის ფინანსური პირობები არ გაუმჟღავნებია. ისინი ციტირებენ Snap-ის აღმასრულებელ დირექტორს, ევან შპიგელს, რომელმაც განაცხადა, რომ Gemini-ის წყალობით Snapchat-ის მომხმარებლებს შეუძლიათ, გაიგონ ბევრად მეტი სამყაროს შესახებ, გააკეთონ ეს ძალიან სწრაფად და საკუთარი გამოცდილება მეგობრებს მარტივად გაუზიარონ.
როგორ აფასებენ ანალიტიკოსები Snap-ის აქციებს?
Snap-ის აქციების ამჟამინდელი ფასი დაახლოებით $9.00-ს შეადგენს. კომპანიას ამ ეტაპზე უოლ სტრიტის 29 ანალიტიკოსი აფასებს. საშუალო სამიზნე ფასი $15.59-ს შეადგენს, მაქსიმალური პროგნოზი — $20.00-ს, ხოლო მინიმალური — $12.00-ს. საშუალო სამიზნე ფასი Snap-ის აქციების ამჟამინდელი ფასიდან დაახლოებით 66.6%-იან ზრდას გულისხმობს. კომპანიის აქციებს 29 ანალიტიკოსიდან 8-მ მიანიჭა ყიდვის რეკომენდაცია, 19-მა — ნეიტრალური რეიტინგი, ხოლო 2-მა — გაყიდვის რეკომენდაცია.
Snap-ის აქციების შეძენა საქართველოს ბანკის მობილბანკში შეგიძლიათ ბმულზე.
