2022 წელი მზარდი პოტენციალის აქციებისთვის რთულად დაიწყო, რადგან ბაზრის არასტაბილურობის პირობებში ინვესტორების ინტერესმა უფრო სტაბილური, ნელა მზარდი აქციებისკენ გადაინაცვლა.
Airbnb არის კომპანია, რომლის აქციების ფასი ყველა დროის უმაღლესი მაჩვენებლებიდან 47%-ით შემცირდა. ეს შესანიშნავი ყიდვის შესაძლებლობაა, თუ ღირებულების მახე? დღეს სწორედ ამ საკითხს განვიხილავთ და გავარკვევთ, რამდენად ღირს რისკი პოტენციურ ჯილდოდ.
Bull შემთხვევა: უწყვეტი ინოვაციების შედეგი
Airbnb ცნობილია 6 მილიონზე მეტი აქტიური განცხადებით, ტრადიციული ბინებით დაწყებული, უნიკალური ხის სახლებით დამთავრებული. კომპანიამ თავისი ბრენდის შეთავაზების შეუდარებელი უნიკალურობა შეიმუშავა, რამაც მას საოცარი შედეგი მოუტანა: მხოლოდ პირველი კვარტალში პლატფორმაზე 102 მილიონზე მეტი ღამე და გამოცდილება დაიჯავშნა.
ამ წარმატების წყალობით, Airbnb-მა უფრო დიდ კონკურენტებს აჯობა. Expedia Group-მა პირველ კვარტალში მთლიანი ჯავშნების ღირებულება (GBV) წლიურად 58%-ით გაზარდა, ხოლო Airbnb-მა – 67%-ით. პირველ კვარტალში ამ უკანასკნელის წმინდა ზარალი, ასევე, არსებითად დაბალი იყო და $19 მილიონი შეადგინა, ხოლო, რაც შეეხება Expedia-ს, მისმა წმინდა ზარალმა $122 მილიონს მიაღწია.
Arbnb-ის მთავარი საზრუნავი მისი არათანმიმდევრული ხარისხია. ბევრი მომხმარებელი ვერ იღებს იმ გამოცდილებას, რომელსაც ჯავშნის და Airbnb ამ პრობლემის აღმოსაფხვრელად ბევრს მუშაობს. კომპანიამ ცოტა ხნის წინ დააანონსა AirCover – სრული დაზღვევა მოგზაურებისთვის. ეს დამსვენებლებს მასპინძლის მიერ შეთანხმების გაუქმებისგან და აღწერითი ინფორმაციის უზუსტობებისგან იცავს და უბრუნებს მას თანხას, თუ აღწერა ადეკვატური არ არის. Airbnb-ის ამ ნაბიჯმა უნდა აღმოფხვრას ხარისხის ცვალებადობა და დამსვენებლებს მისცეს იმის საშუალება, რომ მიიღონ ის, რაშიც ფული გადაიხადეს.
გასული 12 თვის თითქმის $2.9 მილიარდის ტოლი თავისუფალი ფულადი ნაკადით, კომპანიას აქვს საკმარისი ნაღდი ფული, რათა თავისი პლატფორმა და რეპუტაცია გააუმჯობესოს. გარდა ამისა, Airbnb-ს სტუმარმასპინძლობის სექტორში ერთ-ერთი ყველაზე ძლიერი ბრენდი აქვს და, შედეგად, ბაზრის წილს სწრაფად იძენს. მიუხედავად იმისა, რომ კომპანია სრულყოფილი არ არის, Airbnb, შესაძლოა, გრძელვადიან პერსპექტივაში ერთ-ერთი მთავარი გამარჯვებული იყოს.
Bear შემთხვევა: Airbnb-ს გამოყენება შოკოლადის ყუთს ჰგავს
როგორ უკვე აღვნიშნეთ, Airbnb-ის ერთ-ერთი პრობლემა ის არის, რომ პლატფორმაზე დაჯავშნილი მომსახურების ხარისხი არათანმიმდევრულია. კომპანია თავად არ ფლობს პლატფორმაზე განთავსებულ უძრავ ქონებას და ამიტომ, სტუმრების მიერ მიღებული გამოცდილება მასპინძლების მიხედვით განსხვავდება.
იქიდან გამომდინარე, რომ კომპანიას მთელი მსოფლიოს მასშტაბით მასპინძელთა ფართო ბაზა გააჩნია, უარყოფითი სცენარები გარდაუვალია. ეს განასხვავებს Airbnb-ს, მაგალითად, სასტუმროებისგან, რომლის შემთხვევაშიც მოგზაურები მომსახურების თანმიმდევრულ დონეს არიან მიჩვეულნი.
რა თქმა უნდა, Airbnb-ის მიმზიდველობის ნაწილი კომპანიის მიერ შემოთავაზებული უნიკალური გამოცდილებაა. სწორედ ამან გამოიწვია Airbnb-ს შემოსავლის $2.5 მილიარდიდან (2017წ) $6 მილიარდამდე (2021წ) ზრდა. მაგრამ „უნიკალური“ , შესაძლოა, როგორც მოსალოდნელზე უკეთეს, ასევე უარეს გამოცდილებას ნიშნავდეს. გაურკვეველია, თუ რამდენად ტოლერანტული იქნება მომხმარებელი გრძელვადიან პერსპექტივაში ამ პრობლემის მიმართ.
ვერდიქტი
Airbnb-ს წარსულშიც ჰქონდა პრობლემები, მაგრამ კომპანია მუდამ ბევრს მუშაობს იმ სირთულეების მოსაგვარებლად, რომლებიც მომხმარებელს შეექმნა. Airbnb-ს საკუთარ ბიზნესში რეინვესტირება მოუწევს, რათა პლატფორმის ხარვეზები გამოასწოროს. ამან შეიძლება კომპანიის წარმატება გააძლიეროს, რის გამოც ინვესტორები აქციების მიმართ ოპტიმისტურად უნდა იყვნენ განწყობილნი.
25-ის ტოლი P/FCF (ფასი/თავისუფალი ფულადი ნაკადები) თანაფარდობის მიხედვით, აქციები გონივრულად არის შეფასებული. თუ კომპანია ერთიანი სამომხმარებლო გამოცდილების შექმნას გააგრძელებს, მაშინ, შეიძლება ითქვას, რომ Airbnb, გრძელვადიან პერსპექტივაზე ორიენტირებული ინვესტორებისთვის ხელსაყრელი არჩევანია.
