ორშაბათს, სავაჭრო დღის დასრულების შემდეგ, Zscaler-მა მოსალოდნელზე ძლიერი კვარტალური ანგარიში წარადგინა. გუშინ კი ქლაუდზე დაფუძნებული კიბერუსაფრთხოების პროვაიდერის აქციების ფასი 1%-ით გაიზარდა. მიმდინარე წლის განმავლობაში ეს მაჩვენებელი დაახლოებით 76%-ით არის გაუმჯობესებული.
ფისკალური 2024 წლის პირველ კვარტალში Zscaler-ის შემოსავალი წლიდან წლამდე თითქმის 40%-ით — $496.6 მილიონამდე გაიზარდა (უოლ სტრიტის ანალიტიკოსების პროგნოზი — $473.36 მილიონი). წმინდა მოგებამ, ფისკალური 2023 წლის პირველ კვარტალთან შედარებით, $44 მილიონიდან $106.5 მილიონამდე მოიმატა. კორექტირებულმა EPS-მა (მოგება თითო აქციაზე) $0.67-ს მიაღწია და ანალიტიკოსების პროგნოზს — $0.49-ს — ამ მაჩვენებელმაც გადააჭარბა. GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით კი კომპანიამ თითო აქციაზე $0.23-ის ოდენობით ზარალი დააფიქსირა (პროგნოზი — -$0.32).
თუმცა აღსანიშნავია, რომ საოპერაციო ხარჯები კვარტალში 24%-ით გაიზარდა და $431.4 მილიონს მიაღწია. Zscaler-ის აღმასრულებელი დირექტორი — ჯეი ჩაუდრი ამბობს, რომ მზარდი მოთხოვნის დასაკმაყოფილებლად მენეჯმენტი ბაზარზე გასვლის (GTM — go-to-market) და R&D (კვლევა და განვითარება) ძალისხმევებს აძლიერებს. GTM სტრატეგია არის გეგმა, რომელიც ასახავს იმას, თუ როგორ შეუძლია ორგანიზაციას, კავშირი დაამყაროს მომხმარებლებთან, რათა დაარწმუნოს ისინი, საკუთარი პროდუქტის ან მომსახურების შეძენაში.
ანგარიშების გამოწერა (მომხმარებლებზე დარიცხული ინვოისების ოდენობა) წლიდან წლამდე 34%-ით გაიზარდა და $456.6 მილიონს მიაღწია, რამაც ასევე გადააჭარბა მოლოდინს. თუმცა ამ შედეგის მიუხედავად, კომპანიის მენეჯმენტს წლიური ანგარიშების გამოწერის საპროგნოზო დიაპაზონი — $2.52-$2.56 მილიარდი — არ გაუზრდია.
მიუხედავად ამისა, Zscaler-მა სრული ფისკალური 2024 წლისთვის შემოსავლის პროგნოზი $2.05-$2.07 მილიარდიდან $2.09-$2.10 მილიარდამდე, ხოლო EPS-ის მითითება $2.20-$2.25-დან $2.45-$2.48-მდე გაზარდა.
Zscaler-ის აქციების ამჟამინდელი ფასი დაახლოებით $194.00-ს შეადგენს. კომპანიას ამ ეტაპზე 36 ანალიტიკოსი აფასებს. საშუალო სამიზნე ფასი $206.59-ს შეადგენს, მაქსიმალური პროგნოზი — $229.00-ს, ხოლო მინიმალური — $165.00-ს. საშუალო სამიზნე ფასი Zscaler-ის აქციების ამჟამინდელი ფასიდან დაახლოებით 6.6%-იან ზრდას გულისხმობს. კომპანიის აქციებს 36 ანალიტიკოსიდან 28-მ მიანიჭა ყიდვის რეკომენდაცია, 8-მ — ნეიტრალური რეიტინგი და არცერთმა — გაყიდვის რეკომენდაცია.
