ამერიკის დამოუკიდებლობის დღესთან დაკავშირებით გუშინ აშშ-ის საფონდო ბირჟა ადრე დაიხურა, თუმცა, ხანმოკლე სავაჭრო დღის განმავლობაში, დაფიქსირდა მნიშვნელოვანი ცვლილებები, რომელთა შესახებაც დღეს მოგიყვებით. გაგაცნობთ სიახლეებს ისეთი კომპანიების შესახებ, როგორებიც არის Tesla, Lucid Group, Rivian და UPS.
Tesla
2023 წლის პირველ ნახევარში ელექტრომობილების (EV) ინდუსტრიის ლიდერის — Tesla-ს აქციების ფასი 142%-ზე მეტით გაიზარდა. ეს იმპულსი გაგრძელდა გუშინ მას შემდეგ, რაც ცნობილი გახდა, რომ მეორე კვარტალში კომპანიამ გადააჭარბა მოლოდინებს ავტომობილების წარმოებისა და მიწოდების შესახებ. შედეგად Tesla-ს აქციების ფასი კიდევ დაახლოებით 7%-ით გაიზარდა.
Tesla-ს მიწოდებამ მეორე კვარტალში რეკორდულ მაჩვენებელს მიაღწია და 466,000-ს გადააჭარბა, წარმოება კი თითქმის 480,000 იყო. გამოდის, რომ 2023 წლის პირველ ნახევარში Tesla-ს წარმოების დონე 920,500-ზე მეტ ელექტრომობილს აღწევს და კომპანიას პროგნოზირებულ, 50%-იანი წლიური ზრდის გზაზე აყენებს, რაც წელიწადში დაახლოებით 1,8 მილიონი ერთეულის წარმოებას გულისხმობს. წარმოებისა და მიწოდების მაჩვენებლები წლიდან წლამდე, შესაბამისად, 44%-ით და 36%-ით გაიზარდა.
დეტალებს რომ ჩავუღრმავდეთ, Tesla-მ მთლიანობაში 460,211 Model 3 და Model Y (კომპანიის უფრო ახალი და ხელმისაწვდომი მოდელები) და 19,489 Model S და Model X აწარმოა. რაც შეეხება მიწოდებას, პირველი წყვილისთვის ამ მაჩვენებელმა 446,915 შეადგინა, ხოლო Model S/X-ისთვის — 19,225.
მეორე კვარტლის შედეგებმა გადააჭარბა ანალიტიკოსთა უმეტესობის მოლოდინს, რამაც კომპანიის აქციებს ახალი დადებითი იმპულსი მოუტანა. ინვესტორებისთვის საინტერესოა, თუ რამხელა როლი ითამაშა ფასების შემცირებამ მოთხოვნის გაზრდაში და რა გავლენა ექნება ამას მოგების მარჟაზე. Tesla ამ ინფორმაციას კვარტალური ანგარიშის წარდგენისას გამოავლენს.
ელექტრომობილების ინდუსტრიის ლიდერი კვარტალურ ანგარიშს ოთხშაბათს, 19 ივლისს, სავაჭრო დღის დასრულების შემდეგ წარადგენს. უოლ სტრიტის ანალიტიკოსები პროგნოზირებენ, რომ Tesla-ს შემოსავალი წლიდან წლამდე 42%-ით — $24.08 მილიარდამდე გაიზრდება, ხოლო კორექტირებული EPS (მოგება თითო აქციაზე) 4%-ით მოიმატებს და $0.79-ს შეადგენს.
Lucid Group
რაც შეეხება ძვირადღირებული ელექტრო სედანების მწარმოებელ Lucid Group-ს, გუშინ მისი აქციების ფასი 7%-ზე მეტით გაიზარდა. რაზეც, ძირითადად, ორმა ფაქტორმა იმოქმედა. პირველი Tesla-ს ზემოხსენებული შესანიშნავი შედეგები იყო. ინვესტორები მიიჩნევენ, რომ 2023 წლის მეორე კვარტალში Tesla-ს წარმოებისა და მიწოდების მაღალი მაჩვენებლები წარმოადგენს აშკარა ნიშანს იმისა, რომ ელექტრომობილებზე მოთხოვნა კვლავ ძლიერია. ეს გასათვალისწინებელია და პოტენციური ინვესტორები უნდა დააკვირდნენ, რამდენად შეძლებს Lucid ასეთი კარგი შედეგების დაფიქსირებას.
გარდა ამისა, Citigroup-ის ანალიტიკოსმა — იტაი მიქაელიმ ელექტრომობილების მწარმოებლის აქციებს ნეიტრალური რეიტინგი და $8-ის ტოლი სამიზნე ფასი მიანიჭა. პარასკევის დახურვის ფასთან — $6.89-სთან შედარებით, ეს მაჩვენებელი 16%-იან ზრდას გულისხმობს. The Fly-ის თანახმად, Citigroup-ის პოზიცია Lucid-ის შესახებ ნაწილობრივ ეფუძნება კომპანიის მაღალ ტექნოლოგიასა და გაუმჯობესებულ ლიკვიდობას.
Lucid Group-ის აქციების ამჟამინდელი ფასი დაახლოებით $7.4-ს შეადგენს. კომპანიას ამჟამად უოლ სტრიტის 6 ანალიტიკოსი აფასებს. საშუალო სამიზნე ფასი $8.67-ს შეადგენს, მაქსიმალური პროგნოზი — $10.00-ს, ხოლო მინიმალური — $6.00-ს. საშუალო სამიზნე ფასი Lucid Group-ის აქციების ამჟამინდელი ფასიდან დაახლოებით 17%-იან ზრდას წარმოადგენს. კომპანიის აქციებს 6 ანალიტიკოსიდან 3-მა მიანიჭა ყიდვის რეკომენდაცია, 3-მა — ნეიტრალური რეიტინგი, ხოლო არცერთმა — გაყიდვის რეკომენდაცია.
Rivian
გუშინ ელექტრომობილების მწარმოებელ კიდევ ერთ კომპანიას ჰქონდა შესანიშნავი დღე. სავაჭრო დღის განმავლობაში Rivian-ის აქციების ფასი 17%-ზე მეტით გაიზარდა. წლის დასაწყისიდან ეს მაჩვენებელი დაახლოებით 13%-ით არის მომატებული.
2022 წლის დასაწყისიდან კომპანიის აქციების ფასი 80%-ზე მეტით შემცირდა, ეს იმიტომ ხდება, რომ კომპანიამ ინვესტორებს იმედები გაუცრუა, როდესაც გასული წლის დასაწყისში წარმოების სამიზნე მაჩვენებელი გაანახევრა. მაგრამ Rivian-ის მენეჯმენტმა განაცხადა, რომ მოსალოდნელია კომპანიის წარმოების წინაღობების გადალახვა და ბაზარი აჯილდოებს Rivian-ს მას შემდეგ, რაც კომპანიამ მეორე კვარტლის მიწოდების შედეგები წარადგინა.
მეორე კვარტალში Rivian-მა ბაზარს 12,640 ელექტრო პიკაპი, ჯიპი და ფურგონი მიაწოდა. ეს მაჩვენებელი წლიდან წლამდე 60%-ით გაიზარდა. გარდა ამისა, კომპანიამ თითქმის 14,000 ელექტრომობილი აწარმოა და მენეჯმენტმა გაიმეორა, რომ წლის განმავლობაში 50,000 EV-ს წარმოებას გეგმავს.
UPS
გუშინ, პოზიტიური სიახლის შემდეგ, United Parcel Service-ის (UPS) აქციების ფასი დაახლოებით 2.5%-ით გაიზარდა.
UPS-სა და მსხვილ, გავლენიან პროფკავშირს — Teamsters-ს შორის ამჟამად მიმდინარეობს მოლაპარაკებები, რისი მიზანიც კომპანიის თანამშრომლებისთვის ახალი კონტრაქტების შედგენაა. ვადა 31 ივლისს იწურება და ორივე მხარე მზადაა ამ თარიღამდე მისაღებ შედეგს მიაღწიოს.
UPS-ის უახლესი შეთავაზება პროფკავშირს პარასკევს შუადღისას გადაეცა. გამამხნევებელია ის ფაქტი, რომ Teamsters-ის წარმომადგენლების თქმით, ეს ლოჯისტიკური გიგანტის წინა შეთავაზებასთან შედარებით გაუმჯობესება იყო. თუმცა პროფკავშირის გენერალურმა მდივანმა — ფრედ ცუკერმანმა განაცხადა, რომ მართალია, UPS-მა რეალური მოქმედების სურვილი გამოთქვა, მაგრამ ეს საკმარისი არ არის. მან ასევე თქვა, რომ UPS დათანხმდება გარიგებაზე ან კომპანია სამუშაო ძალის გარეშე დარჩება. პროფკავშირის წარმომადგენლები აცხადებენ, რომ 1 აგვისტოდან მისი წევრები UPS-ში ახალი კონტრაქტის გარეშე არ იმუშავებენ.
Teamsters-ის ცნობით, UPS-ის მენეჯმენტმა პირობა დადო, რომ შეთანხმებას ამ ოთხშაბათს, 5 ივლისს მიაღწევს. კონტრაქტი, სხვადასხვა შეფასებით, UPS-ში დასაქმებულ 330,000-340,000 მუშაკს მოიცავს.
