რა მოხდა?
S&P Global Market Intelligence-ის მონაცემების თანახმად, ელექტრონული კომერციის პლატფორმის — Shopify-ის აქციების ფასი თებერვალში 16.5%-ით დაეცა. ამ ვარდნის თითქმის მთლიანი ნაწილი დაფიქსირდა მას შემდეგ, რაც კომპანიამ კვარტალური ანგარიში წარადგინა. ეს კი უცნაურია იმის გათვალისწინებით, რომ შედეგებმა აჯობა მოლოდინს და უოლ სტრიტის ანალიტიკოსებმა, ზოგადად, Shopify-ს აქციების პერსპექტივა გააუმჯობესეს.
და რა?
Shopify-მ კვარტალური ანგარიში 15 თებერვალს წარადგინა. შემოსავალი წლიდან წლამდე 26%-ით — $1.7 მილიარდამდე გაიზარდა, ანალიტიკოსების პროგნოზი კი $1.65 მილიარდი იყო.
Piper Sandler-ის ანალიტიკოსმა — ბრენტ ბრეისლინმა, დადებით ფაქტორად დაასახელა კომპანიის შემოსავლების ძლიერი მატება, როდესაც აქციის სამიზნე ფასი $36-დან $45-მდე გაზარდა. ხოლო Credit Suisse-ის ანალიტიკოსმა — ტიმოთი ჩიოდომ მოიხსენია Shopify-ის მომგებიანობის გაუმჯობესება, როგორც ოპტიმიზმის მიზეზი და სამიზნე ფასი $34-დან აქციაზე $40-მდე გაზარდა.
რაც შეეხება მომგებიანობას, ტიმოთი შედარებით გაუმჯობესებაზე საუბრობს. მეოთხე კვარტალში, Shopify-ის ზარალმა ოპერაციებიდან $189 მილიონი შეადგინა. მაგრამ ეს შესამჩნევი გაუმჯობესება იყო წინა კვარტალში $345 მილიონის ოდენობით საოპერაციო ზარალთან შედარებით.
ახლა რა?
Shopify-ს მენეჯმენტი მოელის, რომ 2023 წლის პირველ კვარტალში შემოსავალი წლიდან წლამდე 10%-19%-იანი დიაპაზონის ზედა ზღვართან ახლო ზრდას დააფიქსირებს. როგორც ქვემოთ მოცემული დიაგრამა გვიჩვენებს, 2015 წელს საჯარო კომპანიად გარდაქმნის შემდეგ ეს Shopify-სთვის ყველაზე ნელი ზრდის კვარტალი იქნება.
თუმცა ყველაფერი დაკარგული არ არის. მაგალითად, Shopify ზრდის ფასებს და ეს ნაბიჯი კომპანიის არსებული მომხმარებლებისთვის 2023 წლის მეორე კვარტალში შევა ძალაში. ამიტომ, სავარაუდოა, რომ 2023 წლის მესამე და მეოთხე კვარტალში უკეთესი ზრდა დაფიქსირდება, თუ Shopify, გაზრდილი ფასების პირობებში, არსებული მომხმარებლების შენარჩუნებას შეძლებს.
