Nasdaq Composite ინდექსის დონე წლის დასაწყისიდან დღემდე დაახლოებით 25%-ით დაეცა და ნახევარგამტარების ბევრი კომპანიის აქციამ 2022 წლის განმავლობაში მასიური გაყიდვები განიცადა. გახანგრძლივებული რეცესიის და სხვა მაკროეკონომიკური ზეწოლის შესაძლებლობით გამოწვეულ შეშფოთებასთან ერთად, რომელიც ფართო ბაზარზე იმოქმედებს, წარმოების პრობლემებმა და გეოპოლიტიკურმა რისკ-ფაქტორებმა ასევე ინვესტორების მიერ ნახევარგამტარების მწარმოებელი კომპანიების აქციების გაყიდვა გამოიწვია.
Nvidia და Intel ჩიპების მწარმოებელი წამყვანი კომპანიებია, რომელთა აქციების ფასებიც წელს, შესაბამისად, 40%-ით და 53%-ით შემცირდა. დღეს კი განვიხილავთ, თუ რომელ კომპანიაში ინვესტირება უფრო ხელსაყრელია არსებული bear market-ის პირობებში.
Nvidia
ინოვაციების დადასტურებული უნარი არის ერთ-ერთი ფაქტორი, რომელიც ტექნოლოგიური კომპანიისთვის ძალიან მნიშვნელოვანია. ეს ნიშნავს ბევრად მეტს, ვიდრე მხოლოდ ერთი შესანიშნავი პროდუქტის განვითარებაა. Nvidia-მ თავისი ინოვაციური შესაძლებლობები გრაფიკული დამუშავების ერთეულების (GPU) განმეორებითი გაუმჯობესებით დაამტკიცა. ეს უაღრესად სასურველი კომპიუტერული ჩიპები დღევანდელ სათამაშო მოწყობილობებს, სერვერებს და ავტომობილების ინტერიერში არსებულ ეკრანებს აძლიერებს.
მომხმარებელთა მძლავრმა მოთხოვნამ Nvidia-ს შემოსავალი $4.1 მილიარდიდან (2014 წელი), ბოლო დასრულებულ წელს $26.9 მილიარდამდე გაზარდა. რა თქმა უნდა, გაყიდვები პანდემიის დაწყების შემდეგ გაიზარდა, რადგან ხალხი ინვესტიციას ახორციელებდა სახლის ოფისებში და უფრო ხშირად იყო გეიმინგით დაკავებული, ხოლო ადგილობრივ კომპანიებს სერვერებისთვის მეტი სიმძლავრე სჭირდებოდა. Nvidia-მ მომხმარებელთა ქცევის ცვლილება გამოიყენა, თავისი GPU-ები პრემიუმ ფასებში გაყიდა და ზედიზედ სამი წლის განმავლობაში 62%-ზე მაღალი მთლიანი მოგების მარჟა გამოიმუშავა.
Nvidia-ს რთულად მისაბაძმა პროდუქტებმა კომპანიას საშუალება მისცა თითო აქციაზე მოგება (EPS) ბოლო 10 წლის განმავლობაში 32.3%-იანი კომბინირებული წლიური ტემპით გაეზარდა. Nvidia-ს ახლო ვადაში წინააღმდეგობები ემუქრება, რადგან, პანდემიის შემდეგ, ეკონომიკა ხელახლა გაიხსნა და მომხმარებელთა ქცევა სწრაფად შეიცვალა. გარდა ამისა, Nvidia-ს ჩიპების გაყიდვები მჭიდრო კავშირშია კრიპტოვალუტების ფასებთან. ამ ორმა ფაქტორმა შეიძლება მომდევნო რამდენიმე კვარტალში კომპანიის გაყიდვები და მოგება შეანელოს, მაგრამ, იმის გათვალისწინებით, თუ სად შეიძლება Nvidia 5 წელიწადში აღმოჩნდეს, ინვესტორებმა შეიძლება კომპანიის აქციების შემცირებული ფასებით შექმნილი ხელსაყრელი მდგომარეობა გამოიყენონ და გრძელვადიანი სარგებელი მიიღონ.
Intel
Intel-ს ჰქონდა პრობლემები სუსტი მოთხოვნისა და მარჟების, ასევე, AMD-სთან კონკურენციის გამო მის ძირითად ცენტრალური დამუშავების განყოფილებაში და სერვერის პროდუქტების კატეგორიებში. კომპანიის მეორე კვარტლის შედეგები საკმაოდ იმედგამაცრუებელი იყო – არა-GAAP (მოგება, რომელიც არ არის გამოთვლილი GAAP-ის (ბუღალტრული აღრიცხვის საყოველთაოდ მიღებული პრინციპები) მიხედვით) შემოსავალი 17%-ით შემცირდა $15.3 მილიარდამდე, ხოლო კორექტირებულმა EPS-მა 79%-ით დაიკლო. იმავდროულად, კომპანიის ფორვარდული P/E (ფასი/მოგება) კოეფიციენტი სულ რაღაც 13.5-ს შეადგენს.
გარდა ამისა, Intel დივიდენდებს იხდის და ამჟამინდელი ანაზღაურება 4.7%-ს შეადგენს. უნდა შეწყვიტოს თუ არა კომპანიამ დივიდენდების გადახდა და ყურადღება რესურსების ზრდის ინიციატივებზე გაამახვილოს – ეს არის საკითხი, რომლის შესახებაც ინვესტორებს, როგორც ჩანს, განსხვავებული მოსაზრებები აქვთ, მაგრამ კომპანიის უნარი, მხარი დაუჭიროს ანაზღაურებას გაუმჯობესდა დაფინანსების ვარიანტების წყალობით, რომლებიც ახლახან მიღებული CHIPS და Science Act-დან მომდინარეობს. აქციის მაღალმა შემოსავლიანობამ შეიძლება უახლოეს პერსპექტივაში ინვესტორები გარკვეული ბუფერით უზრუნველყოს იმ შემთხვევისთვის, თუ საფონდო ბირჟაზე ცვალებადობა გაგრძელდება.
Intel ემზადება გააუმჯობესოს თავისი კონკურენტული პოზიციები ძირითად კატეგორიებში და მისი ნაბიჯი, უზრუნველყოს ადრეული წვდომა ASML Holding-ის შემდეგი თაობის ნახევარგამტარების წარმოების მანქანებზე, შეიძლება მიუთითებდეს, რომ კომპანიას აქვს ჩიპების რამდენიმე პერსპექტიული დიზაინი, რომელიც მას შემდეგი რამდენიმე წლის განმავლობაში მდგომარეობის შემობრუნებაში დაეხმარება.
Intel-ის პროდუქტები, Nvidia-სთან შედარებით, უფრო სუსტად გამოიყურება და მისი ბიზნესის ბოლოდროინდელი შენელება უფრო დრამატულია, მაგრამ Nvidia-ს ფორვარდული P/E დაახლოებით 41-ს შეადგენს, ხოლო ფორვარდული P/S (ფასი/გაყიდვები) – 12.6-ს მასიური გაყიდვების შემდეგაც კი. Intel-ის უფრო კონსერვატიულმა შეფასებამ და აღდგენის პოტენციალმა შეიძლება ეს კომპანია უკეთეს საინვესტიციო შესაძლებლობად აქციოს.
რომელი უკეთესი არჩევანია?
Nvidia-ს ძლიერი მხარეები მაღალი ხარისხის GPU-ებსა და ჩიპებში, რომლებიც შეიძლება გამოყენებულ იქნას მონაცემთა ცენტრებისთვის, ხელოვნური ინტელექტისთვის და სხვა აპლიკაციებისთვის, დაეხმარა კომპანიას სწრაფად განვითარებულიყო და ბოლო წლებში მან უმაღლესი მარჟა გამოიმუშავა. Nvidia-ს პოზიცია, Intel-თან შედარებით, ნახევარგამტარების ინდუსტრიაში უფრო ძლიერია და ზრდაზე ორიენტირებული ინვესტორებისთვის, Nvidia, ალბათ, უკეთესი აქციაა.
მაგრამ, თუ ის ფაქტი გაწუხებთ, რომ Nasdaq-ის bear market შეიძლება გარკვეული დროით გაგრძელდეს და Nvidia არსებული დონიდან კიდევ უფრო დაეცეს, Intel შეიძლება უკეთესი შესაძლებლობა იყოს. ინვესტორებისთვის, რომლებიც კონსერვატიულ ინვესტიციებზე არიან ორიენტირებულნი, Intel უკეთესი შესაძლებლობაა. ეს არის შემთხვევა, როდესაც არჩევანი რისკისადმი თქვენს ტოლერანტობაზე, კომპანიის შეფასებასა და ზრდის პერსპექტივებზე დაყრდნობით უნდა გაკეთდეს.
