გასულ კვირას აქციების ფასი კვლავ შემცირდა, რადგან ინვესტორებს ეკონომიკური ზრდის შენელება, საპროცენტო განაკვეთისა და ინფლაციის ზრდა აწუხებთ. Dow Jones Industrial Average და S&P 500 3%-ით დაეცა.
დღეს ამ სტატიაში განვიხილავთ 3 კომპანიას, რომელიც ამ კვირაში კვარტალურ ანგარიშებს წარადგენს.
- Zoom Video Communications
Zoom, პანდემიის ადრეულ ფაზებში, უოლ სტრიტის ერთ-ერთი ფავორიტი აქცია იყო, მაგრამ ეს ოპტიმიზმი 2022 წელს გაქრა. ინვესტორები შეშფოთებულნი არიან, რომ ვიდეო კომუნიკაციის სპეციალისტი, რომელიც ფანტასტიკური ზრდით სარგებლობდა, ვეღარ აგრძელებს ამ ტენდენციას.
Zoom-ის კვარტალურმა ანგარიშმა, რომელსაც კომპანია დღეს გამოაქვეყნებს, შესაძლოა ამ პერსპექტივას ნათელი მოჰფინოს. ინვესტორების უმეტესობა მოელის, რომ გაყიდვები წელს 10%-ით შემცირდება, 2021 წლის მაჩვენებლიდან, რომელიც 55%-ს შეადგენდა. ეს შენელება უნდა გამოვლინდეს Zoom-ის მომხმარებელთა ბაზის ცვლილებებში, განსაკუთრებით მცირე ბიზნესის მიმართულებით. კომპანიას მაინც შეიძლება ნათელი მომავალი ჰქონდეს, რადგან ის ჰიბრიდულ სამუშაოზე გადასვლაზე ამყარებს იმედებს, მაგრამ გაფართოების ეს გზა, სავარაუდოდ, მოიცავს აღდგენის პერიოდს, სულ მცირე, 2022 წლის ბოლომდე.
- Ulta Beauty
ინვესტორებს, Ulta Beauty-ის კვარტალურ ანგარიშთან დაკავშირებით, რომელსაც კომპანია ხუთშაბათს [26 მაისს] წარადგენს, დიდი მოლოდინები აქვთ. სილამაზის პროდუქტების საცალო მოვაჭრემ პირველი კვარტალი ძლიერი იმპულსით დაიწყო და იანვრის ბოლოს მენეჯმენტმა, მყარი მოთხოვნის ტენდენციების შესაბამისად, 2022 წლის პერსპექტივა აამაღლა.
თუმცა, მომდევნო თვეებში ბევრი რამ შეიცვალა, მათ შორის, გაიზარდა ინფლაცია და შენელდა ეკონომიკური ზრდა. ამ კვირაში გავიგებთ, თუ რამდენად შეძლო Ulta-მ აღნიშნულ გამოწვევებთან გამკლავება.
- Best Buy
2021 წელს სამომხმარებლო ტექნოლოგიებზე მზარდი მოთხოვნის შემდეგ, Best Buy მომავალი ერთი წლის (ან მეტი) ნელი ზრდისთვის ემზადება. ეს შესუსტებული გარემო აშკარად უნდა გამოჩნდეს ხვალინდელ კვარტალურ ანგარიშში, რომელიც, სავარაუდოდ, გაყიდვებისა და შემოსავლების შემცირებას მოიცავს.
Best Buy ჯერ კიდევ ბევრად უფრო ძლიერ მდგომარეობაშია, ვიდრე პანდემიამდე იყო და მომდევნო რამდენიმე კვარტალში დაგეგმილი ტექნოლოგიური სამუშაოები კომპანიას ზრდის დაბრუნებაში უნდა დაეხმაროს.
სავარაუდოდ, აღმასრულებლები მიმდინარე ფისკალური წლისთვის წლიური გაყიდვების მოკრძალებულ შემცირებას მოელიან. მაგრამ ყველაზე დიდი კითხვა, რაც ინვესტორებს Best Buy-ისთან დაკავშირებით გააჩნიათ არის ის, თუ რამდენად ხედავს მენეჯმენტი მომდევნო წლების განმავლობაში თანდათან გაყიდვების სტაბილური ზრდის მდგომარეობის დაბრუნებისა და მომგებიანობის ზრდის შესაძლებლობას.